Spreuke 26

₁Soos sneeu in die somer

en reën in die oestyd,

so is eer nie gepas vir 'n dwaas nie.

₂Soos 'n voëltjie rondfladder,

soos 'n swaeltjie wegvlieg,

so is 'n onverdiende vervloeking –

daar kom niks van nie.

₃'n Sweep is vir 'n perd,

'n toom vir 'n donkie,

en 'n lat is vir die rug van dwase.

₄Moenie 'n dwaas antwoord

in ooreenstemming

met sy sotheid nie,

anders word jy ook dieselfde as hy.

₅Antwoord 'n dwaas

in ooreenstemming

met sy sotheid,

anders is hy wys in sy eie oë.

₆Iemand wat sy eie voete afkap,

geweld indrink,

is hy wat boodskappe

stuur met 'n dwaas.

₇Die bene van 'n verlamde

hang slap,

so is 'n spreuk in die mond

van dwase.

₈Soos om 'n klip in 'n slingervel

vas te bind,

so is hy wat aan 'n dwaas

eer bewys.

₉'n Doring wat in 'n dronk mens

se hand gesteek het,

so is 'n spreuk in die mond

van dwase.

₁₀'n Boogskutter wat alles wond,

so is hy wat 'n dwaas huur,

wat verbygangers huur.

₁₁Soos 'n hond wat terugkeer

na sy braaksel,

so is 'n dwaas wat sy sotheid

herhaal.

₁₂Sien jy 'n mens wat wys is

in sy eie oë?

Daar is meer hoop vir 'n dwaas

as vir hom.

₁₃Die luiaard sê:

“Daar is 'n jong leeu in die pad,

'n leeu êrens tussen

die dorpspleine!”

₁₄'n Deur draai op sy skarnier

en 'n luiaard op sy bed.

₁₅'n Luiaard steek sy hand

in die skottel,

maar hy is te moeg om dit

na sy mond terug te bring.

₁₆'n Luiaard is in sy eie oë wyser

as sewe mense

wat sinvol antwoord.

₁₇Iemand wat 'n hond

aan sy ore gryp,

so is 'n verbyganger

wat hom vererg oor 'n geskil

wat hom nie aangaan nie.

₁₈Soos 'n waansinnige

wat brandpyle, dodelike pyle,

rondskiet,

₁₉so is iemand wat sy vriend

bedrieg en dan sê:

“Ek het maar net 'n grap gemaak.”

₂₀Sonder hout gaan 'n vuur dood,

en in die afwesigheid

van 'n kwaadstoker

raak 'n stryery stil.

₂₁Gloeiende kole vir houtskool,

hout vir 'n vuur,

dit is 'n twissieke man

by die aanblaas van 'n geskil.

₂₂Die woorde van 'n kwaadstoker

is soos lekkernye –

dit gaan af na die binneste

van die liggaam.

₂₃Soos glasuur wat op 'n potskerf

aangebring is,

so is vurige lippe en 'n bose hart.

₂₄Met sy lippe verbloem

'n hater hom,

maar in sy binneste huisves

hy bedrog.

₂₅As hy sy stem innemend maak,

moet jy hom nie vertrou nie;

want daar is sewe afskuwelikhede

in sy hart.

₂₆Al word sy haat deur misleiding

verberg,

sy boosheid sal in die byeenkoms

onthul word.

₂₇Wie 'n vanggat grawe,

val self daarin,

en wie 'n klip rol,

na hom kom dit terug.

₂₈'n Vals tong haat dié

wat hy verpletter het,

en 'n gladde mond bewerk 'n ramp.