I KORINTHIËRS 1

₁PAULUS, 'n geroepe apostel van Jesus Christus deur die wil van God, en die broeder Sósthenes,

₂aan die gemeente van God wat in Korinthe is, aan die geheiligdes in Christus Jesus, die geroepe heiliges, saam met almal wat die Naam van onse Here Jesus Christus in elke plek aanroep, hulle sowel as onse Here:

₃Genade vir julle en vrede van God onse Vader en die Here Jesus Christus!

₄Ek dank my God altyd oor julle vir die genade van God wat aan julle in Christus Jesus gegee is,

₅dat julle in alle opsigte in Hom ryk gemaak is, in elke woord en alle kennis;

₆soos die getuienis aangaande Christus bevestig is onder julle,

₇sodat julle in geen enkele genadegawe agterstaan nie, terwyl julle wag op die openbaring van onse Here Jesus Christus,

₈wat julle ook sal bevestig tot die einde toe, om in die dag van onse Here Jesus Christus onberispelik te wees.

₉God is getrou, deur wie julle geroep is tot die gemeenskap met sy Seun Jesus Christus, onse Here.

₁₀MAAR ek vermaan julle, broeders, in die Naam van onse Here Jesus Christus, om almal eenstemmig te wees, en dat daar geen skeuringe onder julle moet wees nie, maar dat julle verenig moet wees in dieselfde gesindheid en in dieselfde mening.

₁₁Want dit is aan my deur die huisgenote van Chloë bekend gemaak aangaande julle, my broeders, dat daar twiste onder julle is.

₁₂Ek bedoel dit, dat elkeen van julle sê: Ek is van Paulus, en ek van Apollos, en ek van Céfas, en ek van Christus.

₁₃Is Christus verdeel? Is Paulus miskien vir julle gekruisig? Of is julle in die naam van Paulus gedoop?

₁₄Ek dank God dat ek niemand van julle gedoop het nie, behalwe Crispus en Gajus,

₁₅sodat niemand kan sê dat ek in my naam gedoop het nie.

₁₆Ek het ook nog die huisgesin van Stéfanas gedoop. Verder weet ek nie of ek iemand anders gedoop het nie.

₁₇WANT Christus het my nie gestuur om te doop nie, maar om die evangelie te verkondig, nie met wysheid van woorde nie, sodat die kruis van Christus nie verydel mag word nie.

₁₈Want die woord van die kruis is wel dwaasheid vir die wat verlore gaan, maar vir ons wat gered word, is dit die krag van God;

₁₉want daar is geskrywe: Ek sal die wysheid van die wyse mense vernietig en die verstand van die verstandige mense tot niet maak.

₂₀Waar bly die wyse? Waar bly die skrifgeleerde? Waar die redetwister van hierdie eeu? Het God nie die wysheid van hierdie wêreld dwaas gemaak nie?

₂₁Want aangesien in die wysheid van God die wêreld deur die wysheid God nie geken het nie, het dit God behaag om deur die dwaasheid van die prediking die wat glo, te red;

₂₂want die Jode vra 'n teken en die Grieke soek wysheid,

₂₃maar ons verkondig Christus wat gekruisig is, 'n struikelblok vir die Jode en dwaasheid vir die Grieke;

₂₄maar vir die wat geroep is, Jode sowel as Grieke: Christus, die krag van God en die wysheid van God.

₂₅Want wat dwaas is by God, is wyser as die mense; en wat swak is by God, is sterker as die mense.

₂₆Want let op julle roeping, broeders: julle is nie baie wyse na die vlees nie, nie baie magtiges, nie baie edeles nie;

₂₇maar wat dwaas is by die wêreld, het God uitverkies om die wyse te beskaam; en wat swak is by die wêreld, het God uitverkies om wat sterk is, te beskaam;

₂₈en wat onedel is by die wêreld en wat verag is, het God uitverkies, en wat niks is nie, om wat iets is, tot niet te maak,

₂₉sodat geen vlees voor Hom sou roem nie.

₃₀Maar deur Hom is julle in Christus Jesus, wat vir ons geword het wysheid uit God en geregtigheid en heiligmaking en verlossing.

₃₁Daarom, soos geskrywe is: Die wat roem, moet in die Here roem.