I KORINTHIËRS 12

₁EN wat die geestelike gawes betref, broeders, wil ek nie hê dat julle onkundig moet wees nie.

₂Julle weet dat julle heidene was, weggevoer na die stomme afgode net soos julle ook al gelei is.

₃Daarom maak ek julle bekend dat niemand wat deur die Gees van God spreek, Jesus 'n vervloeking noem nie; en niemand kan sê dat Jesus die Here is nie, behalwe deur die Heilige Gees.

₄Daar is wel verskeidenheid van genadegawes, maar dit is dieselfde Gees;

₅en daar is verskeidenheid van bedieninge, en tog is dit dieselfde Here;

₆en daar is verskeidenheid van werkinge, en tog is dit dieselfde God wat alles in almal werk.

₇Maar aan elkeen word die openbaring van die Gees gegee met die oog op wat nuttig is.

₈Want aan die een word deur die Gees 'n woord van wysheid gegee, en aan die ander 'n woord van kennis vanweë dieselfde Gees;

₉aan 'n ander weer geloof deur dieselfde Gees, en aan 'n ander genadegawes van gesondmaking deur dieselfde Gees;

₁₀aan 'n ander werkinge van kragte, aan 'n ander profesie, aan 'n ander onderskeiding van die geeste, aan 'n ander allerhande tale, aan 'n ander uitleg van tale.

₁₁Maar al hierdie dinge werk een en dieselfde Gees wat aan elkeen afsonderlik uitdeel soos Hy wil.

₁₂WANT net soos die liggaam een is en baie lede het, en al die lede van die een liggaam, al is hulle baie, een liggaam is, so ook Christus.

₁₃Want ons is almal ook deur een Gees gedoop tot een liggaam, of ons Jode of Grieke is, slawe of vrymanne; en ons is almal van een Gees deurdronge.

₁₄Want ook die liggaam is nie een lid nie, maar baie.

₁₅As die voet sou sê: Omdat ek nie die hand is nie, behoort ek nie aan die liggaam nie — behoort hy daarom nie aan die liggaam nie?

₁₆En as die oor sou sê: Omdat ek nie die oog is nie, behoort ek nie aan die liggaam nie — behoort hy daarom nie aan die liggaam nie?

₁₇As die hele liggaam oog was, waar sou die gehoor wees? As dit geheel en al gehoor was, waar sou die reuk wees?

₁₈Maar nou het God elkeen van die lede in die liggaam gestel soos Hy gewil het.

₁₉As almal een lid was, waar sou die liggaam wees?

₂₀Maar nou is daar wel baie lede, maar net een liggaam.

₂₁En die oog kan nie vir die hand sê: Ek het jou nie nodig nie; of ook die hoof vir die voete: Ek het julle nie nodig nie.

₂₂Maar veel eerder is dié lede van die liggaam noodsaaklik wat die swakste lyk;

₂₃en dié lede van die liggaam wat vir ons minder eerbaar lyk, beklee ons met oorvloediger eer, en so het ons onsierlike lede oorvloediger sierlikheid,

₂₄terwyl ons sierlike lede dit nie nodig het nie; maar God het die liggaam saamgestel en aan die misdeelde lid oorvloediger eer gegee,

₂₅sodat daar geen verdeeldheid in die liggaam mag wees nie, maar dat die lede gelyke sorg vir mekaar mag dra.

₂₆En as een lid ly, ly al die lede saam; en as een lid geëer word, is al die lede saam bly.

₂₇Maar julle is die liggaam van Christus en lede afsonderlik.

₂₈En God het sommige in die gemeente gestel: in die eerste plek apostels, ten tweede profete, ten derde leraars, daarna kragte, daarna genadegawes van gesondmaking, helpers, regeringe, allerhande tale.

₂₉Almal is tog nie apostels nie, almal is tog nie profete nie, almal is tog nie leraars nie, almal is tog nie kragte nie?

₃₀Het almal genadegawes van gesondmaking, spreek almal in tale, kan almal dit uitlê?

₃₁Maar beywer julle met die oog op die beste gawes; en ek wys julle 'n nog uitnemender weg.