I PETRUS 5

₁EK vermaan die ouderlinge onder julle, ek wat 'n mede-ouderling en getuie van die lyde van Christus is, wat ook 'n deelgenoot is van die heerlikheid wat geopenbaar sal word:

₂Hou as herders toesig oor die kudde van God wat onder julle is, nie uit dwang nie, maar gewilliglik; nie om vuil gewin nie, maar met bereidwilligheid;

₃ook nie as heersers oor die erfdeel nie, maar as voorbeelde vir die kudde.

₄En wanneer die Opperherder verskyn, sal julle die onverwelklike kroon van heerlikheid ontvang.

₅Net so moet julle, jongeres, aan die oueres onderdanig wees; en wees almal met ootmoed bekleed in onderdanigheid aan mekaar, want God weerstaan die hoogmoediges, maar aan die nederiges gee Hy genade.

₆Verneder julle dan onder die kragtige hand van God, sodat Hy julle kan verhoog op die regte tyd.

₇Werp al julle bekommernis op Hom, want Hy sorg vir julle.

₈Wees nugter en waaksaam, want julle teëstander, die duiwel, loop rond soos 'n brullende leeu en soek wie hy kan verslind.

₉Hom moet julle teëstaan, standvastig in die geloof, omdat julle weet dat dieselfde lyding opgelê word aan julle broederskap wat in die wêreld is.

₁₀EN mag die God van alle genade self, wat ons geroep het tot sy ewige heerlikheid in Christus Jesus, nadat ons 'n kort tyd gely het, julle volmaak, bevestig, versterk en grondves!

₁₁Aan Hom die heerlikheid en die krag tot in alle ewigheid! Amen.

₁₂Deur Silvánus, die getroue broeder, soos ek meen, het ek kortliks aan julle geskrywe om julle te vermaan en om te betuig dat dit die ware genade van God is waarin julle staan.

₁₃Die mede-uitverkorene in Babilon en Markus, my seun, groet julle.

₁₄Groet mekaar met 'n kus van liefde. Vrede vir julle almal wat in Christus Jesus is! Amen.