I THESSALONICENSE 5

₁MAAR oor die tye en geleenthede, broeders, het julle nie nodig dat aan julle geskryf word nie;

₂want julle weet self baie goed dat die dag van die Here kom net soos 'n dief in die nag.

₃Want wanneer hulle sê: Vrede en veiligheid — dan oorval 'n skielike verderf hulle soos die barensnood 'n swanger vrou, en hulle sal sekerlik nie ontvlug nie.

₄Maar julle, broeders, is nie in duisternis, dat die dag julle soos 'n dief sou oorval nie.

₅Julle is almal kinders van die lig en kinders van die dag; ons is nie van die nag of die duisternis nie.

₆Laat ons dan nie slaap soos die ander nie, maar laat ons waak en nugter wees.

₇Want die wat slaap, slaap in die nag; en die wat dronk word, is in die nag dronk.

₈Maar laat ons wat van die dag is, nugter wees, met die borswapen van geloof en liefde aan, en as helm die hoop op die saligheid.

₉Want God het ons nie bestem tot toorn nie, maar om die saligheid te verkry deur onse Here Jesus Christus

₁₀wat vir ons gesterf het, sodat ons, of ons waak en of ons slaap, saam met Hom kan lewe.

₁₁Daarom, bemoedig mekaar en bou die een die ander op, soos julle ook doen.

₁₂MAAR ons vra julle, broeders, erken die wat onder julle arbei en julle voorgangers in die Here is en julle vermaan;

₁₃en bewys hulle in liefde die hoogste agting ter wille van hulle werk. Hou vrede onder mekaar.

₁₄En ons versoek julle, broeders, vermaan die onordelikes, bemoedig die kleinmoediges, ondersteun die swakkes, wees lankmoedig teenoor almal.

₁₅Sorg dat niemand 'n ander kwaad vir kwaad vergeld nie; maar jaag altyd ná wat goed is, teenoor mekaar sowel as teenoor almal.

₁₆Wees altyddeur bly.

₁₇Bid sonder ophou.

₁₈Wees in alles dankbaar, want dit is die wil van God in Christus Jesus oor julle.

₁₉Blus die Gees nie uit nie.

₂₀Verag die profesieë nie.

₂₁Beproef alle dinge; behou die goeie.

₂₂Onthou julle van elke vorm van kwaad.

₂₃En mag Hy, die God van die vrede, julle volkome heilig maak, en mag julle gees en siel en liggaam geheel en al onberispelik bewaar word by die wederkoms van onse Here Jesus Christus!

₂₄Hy wat julle roep, is getrou; Hy sal dit ook doen.

₂₅Broeders, bid vir ons.

₂₆Groet die broeders almal met 'n heilige kus.

₂₇Ek besweer julle by die Here dat hierdie brief aan al die heilige broeders voorgelees word.

₂₈Die genade van onse Here Jesus Christus sy met julle! Amen.