II TIMÓTHEÜS 4

₁EK besweer jou dan voor God en die Here Jesus Christus, wat die lewende en die dode sal oordeel by sy verskyning en sy koninkryk:

₂verkondig die woord; hou aan tydig en ontydig; weerlê, bestraf, vermaan in alle lankmoedigheid en lering;

₃want daar sal 'n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle 'n menigte leraars sal versamel volgens hulle eie begeerlikhede,

₄en die oor sal afkeer van die waarheid en hulle sal wend tot fabels.

₅Maar wees jy in alles nugter; ly verdrukking; doen die werk van 'n evangelis; vervul jou bediening.

₆WANT ek word alreeds as 'n drankoffer uitgegiet, en die tyd van my heengaan is naby.

₇Ek het die goeie stryd gestry; ek het die wedloop voleindig; ek het die geloof behou.

₈Verder is vir my weggelê die kroon van die geregtigheid wat die Here, die regverdige Regter, my in dié dag sal gee; en nie aan my alleen nie, maar ook aan almal wat sy verskyning liefgehad het.

₉Beywer jou om gou na my te kom.

₁₀Want Demas het my verlaat, omdat hy die teenwoordige wêreld liefgekry het, en het na Thessaloníka vertrek, Crescens na Galásië, Titus na Dalmásië.

₁₁Lukas is alleen by my. Markus moet jy gaan haal en saam met jou bring, want hy kan my baie tot diens wees.

₁₂Tíchikus het ek na Éfese gestuur.

₁₃As jy kom, moet jy die reismantel bring wat ek by Carpus in Troas laat bly het, en die boeke, veral die perkamente.

₁₄Alexander, die kopersmid, het my baie kwaad aangedoen. Mag die Here hom vergeld na sy werke!

₁₅Jy moet ook vir hom oppas, want hy het ons woorde sterk teëgestaan.

₁₆In my eerste verdediging het niemand my bygestaan nie, maar almal het my verlaat. Mag dit hulle nie toegereken word nie!

₁₇Maar die Here het my bygestaan en my krag gegee, sodat deur my die prediking heeltemal volbring kan word en al die heidene dit kan hoor; en ek is uit die bek van die leeu verlos.

₁₈En die Here sal my verlos van elke bose werk en my red om in sy hemelse koninkryk in te gaan. Aan Hom die heerlikheid tot in alle ewigheid! Amen.

₁₉Groet Prisca en Áquila en die huis van Onesíforus.

₂₀Erástus het in Korinthe gebly. Trófimus het ek siek in Miléte agtergelaat.

₂₁Beywer jou om voor die winter te kom. Eubúlus en Pudens en Linus en Claudia en al die broeders groet jou.

₂₂Mag die Here Jesus Christus met jou gees wees! Die genade sy met julle! Amen.