GÉNESIS 11

₁EN die hele aarde het dieselfde taal gehad en een en dieselfde woorde.

₂En toe hulle wegtrek na die ooste, vind hulle 'n laagte in die land Sínear; en daar het hulle gaan woon.

₃Daarop sê hulle vir mekaar: Kom laat ons stene vorm en dit goed brand. Hulle gebruik toe die bakstene vir bousteen en die lymgrond vir klei.

₄En hulle sê: Kom, laat ons vir ons 'n stad bou en 'n toring waarvan die spits tot aan die hemel reik; en laat ons vir ons 'n naam maak, sodat ons nie oor die hele aarde verstrooid raak nie.

₅Toe daal die Here neer om die stad en die toring te besien waaraan die mensekinders gebou het.

₆En die Here sê: Daar is hulle nou een volk en het almal een taal! En dit is net die begin van hulle onderneming: nou sal niks vir hulle meer onmoontlik wees van wat hulle van plan is om te doen nie.

₇Kom, laat Ons neerdaal en hulle taal daar verwar, sodat die een die taal van die ander nie kan verstaan nie.

₈So het die Here hulle dan daarvandaan oor die hele aarde verstrooi; en hulle het opgehou om die stad te bou.

₉Daarom het hulle dit Babel genoem, want daar het die Here die taal van die hele aarde verwar, en daarvandaan het die Here hulle oor die hele aarde verstrooi.

₁₀DIT is die stamboom van Sem: Toe Sem honderd jaar oud was, het hy die vader van Arpágsad geword, twee jaar ná die vloed.

₁₁En Sem het ná die geboorte van Arpágsad nog vyfhonderd jaar gelewe. En hy het seuns en dogters gehad.

₁₂Toe Arpágsad vyf-en-dertig jaar oud was, het hy die vader van Selag geword.

₁₃En Arpágsad het ná die geboorte van Selag nog vierhonderd-en-drie jaar gelewe. En hy het seuns en dogters gehad.

₁₄Toe Selag dertig jaar oud was, het hy die vader van Heber geword.

₁₅En Selag het ná die geboorte van Heber nog vierhonderd-en-drie jaar gelewe. En hy het seuns en dogters gehad.

₁₆Toe Heber vier-en-dertig jaar oud was, het hy die vader van Peleg geword.

₁₇En Heber het ná die geboorte van Peleg nog vierhonderd-en-dertig jaar gelewe. En hy het seuns en dogters gehad.

₁₈Toe Peleg dertig jaar oud was, het hy die vader van Rehu geword.

₁₉En Peleg het ná die geboorte van Rehu nog tweehonderd-en-nege jaar gelewe. En hy het seuns en dogters gehad.

₂₀Toe Rehu twee-en-dertig jaar oud was, het hy die vader van Serug geword.

₂₁En Rehu het ná die geboorte van Serug nog tweehonderd-en-sewe jaar gelewe. En hy het seuns en dogters gehad.

₂₂Toe Serug dertig jaar oud was, het hy die vader van Nahor geword.

₂₃En Serug het ná die geboorte van Nahor tweehonderd jaar gelewe. En hy het seuns en dogters gehad.

₂₄Toe Nahor negen-en-twintig jaar oud was, het hy die vader van Tera geword.

₂₅En Nahor het ná die geboorte van Tera nog honderd-en-negentien jaar gelewe. En hy het seuns en dogters gehad.

₂₆Toe Tera sewentig jaar oud was, het hy die vader geword van Abram, Nahor en Haran.

₂₇En dit is die stamboom van Tera: Tera het die vader geword van Abram, Nahor en Haran, en Haran van Lot.

₂₈En Haran het gesterwe terwyl sy vader Tera nog geleef het, in sy geboorteland, in Ur van die Chaldeërs.

₂₉En Abram en Nahor het vir hulle vroue geneem. Die naam van Abram se vrou was Sarai, en die naam van Nahor se vrou was Milka, die dogter van Haran, die vader van Milka en die vader van Jiska.

₃₀En Sarai was onvrugbaar, sy het geen kind gehad nie.

₃₁En Tera het sy seun Abram geneem en Lot, die seun van Haran, sy kleinseun, en Sarai, sy skoondogter, die vrou van sy seun Abram, en dié het saam met hulle uit Ur van die Chaldeërs getrek om na die land Kanaän te gaan. En hulle het tot by Haran gekom en daar gaan woon.

₃₂En die dae van Tera was tweehonderd-en-vyf jaar, en Tera het in Haran gesterwe.