JOB 34

₁VERDER het Elíhu aangehef en gesê:

₂Hoor my woorde, o wyse manne! En luister na my, u wat kennis het!

₃Want die oor toets woorde soos die verhemelte die spys proe.

₄Laat ons vir onsself uitmaak wat reg is, en onder mekaar uitvind wat goed is.

₅Want Job het gesê: Ek is regverdig, en God het my my reg ontneem.

₆Ondanks my reg staan ek as leuenaar; ongeneeslik is my pylwond, en dit sonder oortreding!

₇Waar is 'n man soos Job wat godslastering drink soos water?

₈Wat in die geselskap loop van die werkers van ongeregtigheid en wandel saam met goddelose mense?

₉Want hy het gesê: Dit baat 'n man niks dat hy 'n welgevalle aan God het nie.

₁₀DAAROM, manne van verstand, luister na my: Ver is God van goddeloosheid en die Almagtige van onreg!

₁₁Veelmeer vergeld Hy die mens na sy werk, en volgens 'n man se wandel laat Hy hom ondervind.

₁₂Ja waarlik, God handel nie onregverdig nie, en die Almagtige verdraai nie die reg nie.

₁₃Wie het aan Hom die aarde toevertrou, en wie het die hele wêreld gegrond?

₁₄As Hy op Homself ag sou gee, sy Gees en sy asem na Hom sou terugtrek,

₁₅dan sou alle vlees tesame die asem uitblaas en die mens sou tot stof terugkeer.

₁₆As daar dan verstand by u is, hoor dit; luister na die stem van my woorde.

₁₇Kan ook een wat die reg haat, heers? Of durf u die Regverdige, die Geweldige, veroordeel?

₁₈Durf iemand aan 'n koning sê: Jou deugniet! Aan die edeles: Jou goddelose!

₁₉Hoeveel minder aan Hom wat die vorste nie voortrek nie en op die vername nie meer ag gee as op die arme nie; want hulle almal is die werk van sy hande.

₂₀In 'n oomblik sterf hulle, en in die middel van die nag word 'n volk in beroering gebring en hulle gaan onder, en die magtige word weggedryf — nie deur 'n hand nie.

₂₁Want sy oë is op die weë van die mens, en Hy sien al sy voetstappe.

₂₂Daar is geen duisternis en daar is geen diepe donkerheid waarin die werkers van ongeregtigheid hulle kan wegsteek nie.

₂₃Want Hy hoef nie lank op 'n mens ag te gee, dat hy voor God in die gereg sou gaan nie.

₂₄Hy verpletter die geweldiges sonder ondersoek en sit ander in hulle plek.

₂₅So ken Hy dan hulle werke en werp hulle omver in die nag, sodat hulle verbrysel word.

₂₆Hy straf hulle soos goddelose op die plek waar almal dit sien,

₂₇omdat hulle van Hom afgewyk en op geeneen van sy weë ag gegee het nie —

₂₈om die geroep van die arme na Hom te laat kom, en dat Hy die geroep van die ellendiges sou hoor.

₂₉En gee Hý rus, wie durf Hom dan veroordeel? En verberg Hy die aangesig, wie kan Hom dan aanskou? — of dit al 'n nasie betref of 'n mens, almal saam;

₃₀sodat die goddelose mense nie sal regeer, sodat hulle geen strikke vir die volk sal wees nie.

₃₁WANT sê iemand wel tot Gód: Ek boet sonder dat ek sleg handel;

₃₂wat ek nie insien nie, leer Ú my dit; ás ek onreg gedoen het, ek sal dit nie meer doen nie —

₃₃moet Hy volgens u mening tog vergelding doen? U is mos ontevrede, sodat ú moet sê wat beter is, en nie ek nie! Wat u dan weet — spreek dit uit!

₃₄Manne van verstand sal vir my sê, en 'n wyse man wat my aanhoor:

₃₅Job spreek sonder kennis, en sy woorde is sonder verstand.

₃₆Ag, mag Job getoets word tot die einde toe weens die antwoorde in die trant van kwaaddoeners.

₃₇Want hy voeg 'n oortreding by sy sonde; onder ons spreek hy smadelik en vermenigvuldig sy woorde teen God.