JOB 38

₁DAARNA het die Here Job uit 'n storm geantwoord en gesê:

₂Wie maak die raadsbesluit daar tot duisternis met woorde sonder kennis?

₃Gord dan soos 'n man jou heupe — dan sal Ek jou ondervra, en onderrig jy My.

₄Waar was jy toe Ek die aarde gegrond het? Gee te kenne as jy insig het.

₅Wie het sy afmetinge bepaal? — jy weet dit mos! Of wie het daaroor die meetsnoer gespan?

₆Waar is sy fondamentklippe op ingesink? Of wie het sy hoeksteen gelê?

₇Toe die môresterre saam gejubel en al die seuns van God gejuig het?

₈En wie het die see met deure afgesluit toe dit uitgebreek, uit die moederskoot voortgekom het?

₉Toe Ek die wolk tot sy kleding gemaak het en die donkerheid tot sy windsel.

₁₀Toe Ek my grens daarvoor uitgebreek en grendel en deure gemaak het;

₁₁en gesê het: Tot hiertoe mag jy kom en nie verder nie; en hier word 'n grens gestel vir jou trotse golwe.

₁₂Het jy, solank as jy lewe, die môre ontbied, die dageraad sy plek aangewys,

₁₃om die some van die aarde aan te gryp, sodat die goddelose daarvan afgeskud word?

₁₄Dit neem nuwe vorme aan soos die klei onder 'n seël; en die dinge kry gestalte soos 'n kleed.

₁₅En aan die goddelose word hulle lig ontneem, en die hoë arm word verbreek.

₁₆Het jy gekom tot by die bronne van die see? En het jy rondgewandel in die binneste diepte van die wêreldvloed?

₁₇Is die poorte van die dood vir jou ontbloot? En het jy die poorte van die doodskaduwee gesien?

₁₈Omvat jou begrip die breedtes van die aarde? Gee te kenne as jy dit alles weet.

₁₉Waar is tog die weg na die woning van die lig? En die duisternis — waar is tog sy plek,

₂₀sodat jy dit kan bring, elkeen na sy gebied en kan verstaan die paaie na hulle huis?

₂₁Jy weet dit seker wel, want jy is toe gebore! En die getal van jou dae is groot!

₂₂Het jy gekom by die skatkamers van die sneeu? En het jy die skatkamers van die hael gesien,

₂₃wat Ek opgespaar het vir die tyd van benoudheid, vir die dag van stryd en oorlog?

₂₄Waar is tog die weg na die plek waar die lig gedeel word, die oostewind hom uitsprei oor die aarde?

₂₅Wie het 'n kanaal gesplyt vir die stortvloed en 'n pad vir die onweerstraal;

₂₆om te laat reën op 'n land waar geen mens is nie, op 'n woestyn waar niemand woon nie;

₂₇om woestheid en verwoesting te versadig en op die groeiplek jong gras te laat uitspruit?

₂₈Het die reën 'n vader? Of wie verwek die doudruppels?

₂₉Uit wie se moederskoot kom die ys te voorskyn? En die ryp van die hemel — wie baar dit?

₃₀Die waters word hard soos 'n klip, en die oppervlakte van die watervloed sluit aanmekaar.

₃₁Kan jy die bande van die Sewe-ster knoop? Of die toue van die Oríon losmaak?

₃₂Kan jy die Diereriem uitbring op sy tyd? En die Beer met sy kleintjies lei?

₃₃Ken jy die wette van die hemel? Of kan jy sy heerskappy oor die aarde bestel?

₃₄Kan jy jou stem na die wolke verhef, sodat 'n oorvloed van water jou oordek?

₃₅Kan jy die bliksems uitstuur, sodat hulle heengaan en vir jou sê: Hier is ons!

₃₆Wie het wysheid neergelê in die wolke? Of wie het verstand gegee aan die wolkgevaarte?

₃₇Wie kan die wolke met wysheid tel? En die watersakke van die hemel — wie giet hulle leeg

₃₈wanneer die stof saamvloei tot 'n stuk gietwerk en die kluite aanmekaar klewe?