LUKAS 14

₁EN toe Hy in die huis van een van die owerstes van die Fariseërs gegaan het om brood te eet op die sabbat, het hulle Hom in die oog gehou.

₂En daar was voor Hom 'n man wat die water gehad het.

₃En Jesus het gespreek en aan die wetgeleerdes en Fariseërs gesê: Is dit geoorloof om op die sabbat te genees?

₄Maar hulle het stilgebly. Toe neem Hy hom en maak hom gesond en laat hom gaan.

₅En Hy antwoord en sê vir hulle: Wie van julle se esel of os sal in 'n put val, wat dit nie dadelik op die sabbatdag sal uittrek nie?

₆En hulle kon Hom daarop nie antwoord nie.

₇EN toe Hy merk hoe hulle die voorste plekke uitkies, vertel Hy aan die genooides 'n gelykenis en sê vir hulle:

₈Wanneer jy deur iemand na 'n bruilof uitgenooi is, moenie die voorste plek inneem nie, ingeval daar nie miskien een wat waardiger is as jy deur hom uitgenooi is nie,

₉en hy wat jou en hom genooi het, kom en vir jou sê: Maak plek vir hierdie man. En dan sal jy met skaamte die agterste plek begin inneem.

₁₀Maar wanneer jy genooi is, gaan en neem die agterste plek in; sodat wanneer hy kom wat jou genooi het, hy vir jou kan sê: Vriend, gaan hoër op! Dan sal jy eer hê voor die wat saam met jou aan tafel is.

₁₁Want elkeen wat homself verhoog, sal verneder word, en wat homself verneder, sal verhoog word.

₁₂En Hy sê ook vir die man wat Hom genooi het: Wanneer jy 'n môre- of middagete gee, moenie jou vriende nooi, of jou broers of bloedverwante of ryk bure nie, sodat hulle jou nie miskien ook eendag weer uitnooi en jy vergelding ontvang nie.

₁₃Maar wanneer jy 'n feesmaal gee, nooi armes, verminktes, kreupeles, blindes,

₁₄en jy sal gelukkig wees, omdat hulle niks het om jou te vergeld nie; want dit sal jou vergeld word in die opstanding van die regverdiges.

₁₅EN toe een van die wat saam aan tafel was, dit hoor, sê hy vir Hom: Salig is hy wat brood eet in die koninkryk van God.

₁₆Maar Hy antwoord hom: 'n Sekere man het 'n groot maaltyd gegee en baie mense uitgenooi.

₁₇En op die uur van die maaltyd het hy sy dienskneg uitgestuur om vir die genooides te sê: Kom, want alles is nou gereed.

₁₈En hulle het hul almal eenparig begin verontskuldig. Die eerste het vir hom gesê: Ek het 'n stuk grond gekoop en ek moet noodsaaklik uitgaan om daarna te kyk. Ek vra u, verskoon my tog.

₁₉En 'n ander een het gesê: Ek het vyf paar osse gekoop en gaan hulle probeer. Ek vra u, verskoon my tog.

₂₀En 'n ander een het gesê: Ek het 'n vrou getrou en daarom kan ek nie kom nie.

₂₁En daardie dienskneg het gekom en dié dinge aan sy heer vertel. Toe het die eienaar van die huis kwaad geword en vir sy dienskneg gesê: Gaan gou uit in die strate en die gangetjies van die stad en bring die armes en verminktes en kreupeles en blindes hier in.

₂₂En die dienskneg het gesê: Meneer, wat u beveel het, is gedoen, en daar is nog plek.

₂₃Toe sê die heer vir die dienskneg: Gaan uit op die paaie en na die lanings en dwing hulle om in te kom, sodat my huis vol kan word.

₂₄Want ek sê vir julle dat nie een van daardie manne wat genooi is, my maaltyd sal smaak nie.

₂₅EN groot menigtes het saam met Hom gegaan, en Hy het Hom omgedraai en vir hulle gesê:

₂₆As iemand na My toe kom en hy haat nie sy vader en moeder en vrou en kinders en broers en susters, ja, selfs ook sy eie lewe nie, kan hy my dissipel nie wees nie.

₂₇En elkeen wat sy kruis nie dra en agter My aan kom nie, kan my dissipel nie wees nie.

₂₈Want wie van julle wat 'n toring wil bou, gaan nie eers sit en die koste bereken, of hy die middele het om dit uit te voer nie? —

₂₉sodat as hy die fondament gelê het en nie in staat is om dit te voltooi nie, almal wat dit sien, nie miskien met hom sal begin spot

₃₀en sê: Hierdie man het begin bou en kon nie klaarkry nie.

₃₁Of watter koning wat optrek om teen 'n ander koning slag te lewer, gaan nie eers sit en beraadslaag of hy in staat is om met tienduisend die een te ontmoet wat met twintigduisend teen hom kom nie?

₃₂Anders stuur hy 'n gesantskap as die ander een nog ver is, en vra vredesvoorwaardes.

₃₃So kan dan ook niemand van julle wat nie afsien van al sy besittings, my dissipel wees nie.

₃₄Die sout is goed, maar as die sout laf geword het, waarmee sal dit smaaklik gemaak word?

₃₅Dit is nie bruikbaar vir die grond of vir die ashoop nie. Hulle gooi dit buitekant weg. Wie ore het om te hoor, laat hom hoor.