SPREUKE 10

₁DIE spreuke van Salomo. 'n Wyse seun verbly die vader, maar 'n dwase seun is 'n bekommernis vir sy moeder.

₂Skatte deur goddeloosheid verwerf, bring geen voordeel nie, maar geregtigheid red van die dood.

₃Die Here laat die regverdige nie honger ly nie, maar die begeerlikheid van die goddelose stoot Hy weg.

₄Hy word arm wat met 'n trae hand werk, maar die hand van die vlytiges maak ryk.

₅Hy wat in die somer wegbêre, is 'n verstandige seun; hy wat vas slaap in die oestyd, is 'n seun wat skande maak.

₆Seëninge is daar op die hoof van die regverdige, maar die mond van die goddelose verberg geweld.

₇Die nagedagtenis van die regverdige is tot seën, maar die naam van die goddelose vergaan.

₈Hy wat wys van hart is, neem die gebooie aan, maar hy wat dwaas van lippe is, kom tot 'n val.

₉Hy wat in opregtheid wandel, wandel veilig, maar hy wat sy weë krom maak, word bekend.

₁₀Hy wat met sy oog knip, veroorsaak smart, en hy wat dwaas spreek, kom tot 'n val.

₁₁Die mond van die regverdige is 'n fontein van lewe, maar die mond van die goddelose verberg geweld.

₁₂Haat verwek twiste, maar liefde bedek al die oortredinge.

₁₃Op die lippe van die verstandige word wysheid gevind, maar die roede is vir die rug van die verstandelose.

₁₄Die wyse lê kennis weg, maar die mond van die dwaas is 'n ondergang wat naby is.

₁₅Die goed van die ryke is vir hom 'n sterk stad; die ondergang van die behoeftiges is hulle armoede.

₁₆Wat die regverdige verwerf, is vir die lewe; die inkomste van die goddelose is tot sonde.

₁₇'n Pad ten lewe is hy wat die tug in ag neem; maar hy wat die teregwysing veronagsaam, raak verdwaald.

₁₈Hy wat haat verberg, het valse lippe; en hy wat skindertaal uitstrooi, is 'n dwaas.

₁₉By veelheid van woorde ontbreek die oortreding nie; maar hy wat sy lippe inhou, handel verstandig.

₂₀Die tong van die regverdige is uitgesoekte silwer; die hart van die goddelose is min werd.

₂₁Die lippe van die regverdige help baie mense reg; maar die dwase sterf deur gebrek aan verstand.

₂₂Die seën van die Here — dit maak ryk, en moeitevolle arbeid voeg daar niks by nie.

₂₃Dit is 'n vermaak vir 'n dwaas om 'n skandelike daad te doen, net so is wysheid vir 'n man van verstand.

₂₄Waar die goddelose bang voor is — dit kom oor hom; maar die begeerte van die regverdiges vervul Hy.

₂₅Wanneer 'n stormwind verbygaan, is die goddelose nie meer nie; maar die regverdige is vir ewig gegrondves.

₂₆Soos asyn vir die tande en soos rook vir die oë, so is die luiaard vir die wat hom stuur.

₂₇Die vrees van die Here vermeerder die dae, maar die jare van die goddelose word verkort.

₂₈Die verwagting van die regverdiges is vreugde, maar die hoop van die goddelose vergaan.

₂₉Die weg van die Here is vir die opregte 'n vesting, maar 'n ondergang vir die werkers van ongeregtigheid.

₃₀Die regverdige sal vir ewig nie wankel nie, maar die goddelose sal in die land nie bly woon nie.

₃₁Die mond van die regverdige laat wysheid uitspruit, maar die valse tong word uitgeroei.

₃₂Die lippe van die regverdige weet wat welgevallig is, maar die mond van die goddelose is pure valsheid.