PSALM 119

₁WELGELUKSALIG is die opregtes van weg, wat in die wet van die Here wandel.

₂Welgeluksalig is die wat sy getuienisse bewaar, Hom van ganser harte soek;

₃ook geen ongeregtigheid doen nie, maar in sy weë wandel.

₄Ú het u bevele gegee om dit trou te onderhou.

₅Ag, was my weë maar vas om u insettinge te onderhou!

₆Dan sal ek nie beskaamd staan as ek op al u gebooie let nie.

₇Ek sal U loof in opregtheid van hart as ek u regverdige verordeninge leer.

₈Ek sal u insettinge onderhou; verlaat my nie geheel en al nie.

₉Waarmee sal die jongeling sy pad suiwer hou? Deur dit te hou na u woord.

₁₀Ek soek U met my hele hart; laat my nie afdwaal van u gebooie nie.

₁₁Ek het u woord in my hart gebêre, dat ek teen U nie sal sondig nie.

₁₂Lofwaardig is U, o Here! Leer my u insettinge!

₁₃Ek het met my lippe vertel al die verordeninge van u mond.

₁₄Ek is vrolik in die weg van u getuienisse soos oor allerhande rykdom.

₁₅Ek wil u bevele oordink en op u paaie let.

₁₆Ek sal my verlustig in u insettinge, u woord sal ek nie vergeet nie.

₁₇Doen goed aan u kneg, sodat ek kan lewe; dan wil ek u woord bewaar.

₁₈Open my oë, dat ek kan sien die wonders uit u wet.

₁₉Ek is 'n vreemdeling op die aarde; verberg u gebooie nie vir my nie.

₂₀My siel vergaan van verlange na u verordeninge altyddeur.

₂₁U dreig die vermeteles as gevloektes wat van u gebooie afdwaal.

₂₂Wentel smaad en veragting van my af, want u getuienisse het ek bewaar.

₂₃Al sit vorste en beraadslaag teen my — u kneg oordink u insettinge.

₂₄Ja, u getuienisse is my verlustiging, my raadsmanne.

₂₅My siel kleef aan die stof; maak my lewend na u woord.

₂₆My weë het ek vertel, en U het my verhoor; leer my u insettinge!

₂₇Laat my die weg van u bevele verstaan, dat ek u wonders kan oordink.

₂₈My siel drup weg van kommer; rig my op na u woord.

₂₉Verwyder van my die weg van leuens, en verleen my genadiglik u wet.

₃₀Ek het die weg van waarheid verkies; u verordeninge het ek voor my gestel.

₃₁Ek kleef u getuienisse aan; o Here, maak my nie beskaamd nie!

₃₂Ek sal op die weg van u gebooie wandel, want U verruim my hart.

₃₃Here, leer my die weg van u insettinge, sodat ek dit tot die einde toe kan bewaar.

₃₄Gee my verstand, dat ek u wet kan bewaar, ja, dit kan onderhou van ganser harte.

₃₅Laat my wandel op die pad van u gebooie, want daarin het ek 'n behae.

₃₆Neig my hart tot u getuienisse en nie tot winsbejag nie.

₃₇Wend my oë af, dat hulle geen nietigheid sien nie; maak my lewend in u weë.

₃₈Vervul aan u kneg u belofte wat pas by u vrees.

₃₉Wend my smaadheid af wat ek vrees, want u verordeninge is goed.

₄₀Gewis, ek het 'n begeerte tot u bevele; maak my lewend deur u geregtigheid.

₄₁En laat u goedertierenhede oor my kom, o Here, u heil volgens u belofte,

₄₂sodat ek my smader iets kan antwoord, want ek vertrou op u woord.

₄₃En onttrek die woord van waarheid nie geheel en al aan my mond nie, want op u verordeninge wag ek.

₄₄Dan wil ek u wet altyddeur onderhou, vir ewig en altyd,

₄₅en in die ruimte wandel, want ek soek u bevele.

₄₆Ook wil ek voor konings van u getuienisse spreek en my nie skaam nie.

₄₇En ek wil my verlustig in u gebooie wat ek liefhet,

₄₈en my hande ophef na u gebooie wat ek liefhet, en u insettinge oordink.

₄₉Gedenk die woord aan u kneg, omdat U my laat hoop het.

₅₀Dit is my troos in my ellende, dat u belofte my lewend maak.

₅₁Vermeteles het baie met my gespot; van u wet het ek nie afgewyk nie.

₅₂Ek het gedink, o Here, aan u oordele van ouds, en ek het my getroos.

₅₃Toorngloed het my aangegryp vanweë die goddelose wat u wet verlaat.

₅₄U insettinge was gesange vir my in die huis van my vreemdelingskap.

₅₅Here, in die nag het ek gedink aan u Naam, en ek het u wet onderhou.

₅₆Dit het my deel geword, omdat ek u bevele bewaar het.

₅₇Die Here is my deel; ek het gesê dat ek u woorde sal bewaar.

₅₈Ek het U van ganser harte om genade gesmeek; wees my genadig volgens u belofte.

₅₉Ek het my weë oordink en my voete laat teruggaan na u getuienisse.

₆₀Ek het my gehaas, en nie getalm nie, om u gebooie te onderhou.

₆₁Die strikke van die goddelose het my omring; u wet het ek nie vergeet nie.

₆₂Middernag staan ek op om U te loof vir u regverdige verordeninge.

₆₃Ek is 'n metgesel van almal wat U vrees, en van die wat u bevele onderhou.

₆₄Here, die aarde is vol van u goedertierenheid; leer my u insettinge.

₆₅U het goed gedoen aan u kneg, Here, na u woord.

₆₆Leer my 'n goeie insig en kennis, want ek glo aan u gebooie.

₆₇Voordat ek verdruk was, het ek gedwaal; maar nou onderhou ek u woord.

₆₈U is goed en doen goed; leer my u insettinge.

₆₉Vermeteles het my leuens toegedig; maar ék bewaar van ganser harte u bevele.

₇₀Hulle hart is ongevoelig soos vet; maar ék verlustig my in u wet.

₇₁Dit is goed vir my dat ek verdruk was, sodat ek u insettinge sou leer.

₇₂Die wet van u mond is vir my beter as duisende stukke goud en silwer.

₇₃U hande het my gemaak en my toeberei; maak my verstandig, dat ek u gebooie kan leer.

₇₄Die wat U vrees, sien my, en hulle is bly; want op u woord wag ek.

₇₅Ek weet, Here, dat u oordele regverdig is en dat U my uit getrouheid verdruk het.

₇₆Laat tog u goedertierenheid wees om my te troos volgens u belofte aan u kneg.

₇₇Laat u barmhartighede oor my kom, dat ek kan lewe; want u wet is my verlustiging.

₇₈Laat die vermeteles beskaamd staan, omdat hulle sonder oorsaak my onregverdig behandel het; maar ék oordink u bevele.

₇₉Laat die wat U vrees, na my terugkeer, en die wat u getuienisse ken.

₈₀Laat my hart opreg wees in u insettinge, sodat ek nie beskaamd hoef te staan nie.

₈₁My siel smag na u heil; op u woord wag ek.

₈₂My oë smag na u belofte en sê: Wanneer sal U my vertroos?

₈₃Want ek het geword soos 'n leersak in die rook; u insettinge het ek nie vergeet nie.

₈₄Hoeveel sal die dae van u kneg wees? Wanneer sal U gerig oefen onder my vervolgers?

₈₅Vermeteles het vir my kuile gegrawe, hulle wat nie lewe na u wet nie.

₈₆Al u gebooie is waarheid; hulle vervolg my sonder oorsaak; help my!

₈₇Hulle het my amper vernietig op die aarde; maar ék het u bevele nie verlaat nie.

₈₈Maak my lewend na u goedertierenheid, dat ek die getuienis van u mond kan onderhou.

₈₉Vir ewig, o Here, staan u woord vas in die hemele.

₉₀U trou is van geslag tot geslag; U het die aarde bevestig, en dit bly staan.

₉₁Volgens u verordeninge bly hulle vandag nog staan, want alle dinge is u knegte.

₉₂As u wet nie my verlustiging was nie, dan het ek omgekom in my ellende.

₉₃Ek sal u bevele tot in ewigheid nie vergeet nie, want deur hulle het U my lewend gemaak.

₉₄Aan U behoort ek: verlos my, want ek soek u bevele.

₉₅Die goddelose lê en wag op my, om my om te bring; ek gee ag op u getuienisse.

₉₆Aan alle volmaaktheid het ek 'n einde gesien, maar u gebod is baie wyd.

₉₇Hoe lief het ek u wet; dit is my bepeinsing die hele dag.

₉₈U gebooie maak my wyser as my vyande, want hulle is myne vir ewig.

₉₉Ek is verstandiger as al my leermeesters, want u getuienisse is my bepeinsing.

₁₀₀Ek het meer verstand as die ou mense, want ek bewaar u bevele.

₁₀₁Ek het my voete teruggehou van elke verkeerde pad, dat ek u woord kan bewaar.

₁₀₂Ek het van u verordeninge nie afgewyk nie, want Ú het my geleer.

₁₀₃Hoe soet is u beloftes vir my verhemelte, meer as heuning vir my mond.

₁₀₄Uit u bevele kry ek verstand; daarom haat ek elke leuenpad.

₁₀₅U woord is 'n lamp vir my voet en 'n lig vir my pad.

₁₀₆Ek het gesweer, en dit gehou, om u regverdige verordeninge te onderhou.

₁₀₇Ek is baie diep neergedruk; Here, maak my lewend na u woord!

₁₀₈Laat tog die vrywillige offerandes van my mond U behaag, o Here, en leer my u verordeninge.

₁₀₉My lewe is altyddeur in my hand; nogtans vergeet ek u wet nie.

₁₁₀Die goddelose het vir my 'n vangnet gespan; nogtans het ek van u bevele nie afgedwaal nie.

₁₁₁Ek het u getuienisse vir ewig as erfdeel ontvang, want hulle is die vreugde van my hart.

₁₁₂Ek het my hart geneig, om u insettinge te betrag, vir ewig, tot die einde toe.

₁₁₃Twyfelaars haat ek, maar u wet het ek lief.

₁₁₄U is my skuilplek en my skild; op u woord wag ek.

₁₁₅Gaan weg van my, kwaaddoeners, dat ek die gebooie van my God kan bewaar!

₁₁₆Ondersteun my volgens u belofte, dat ek kan lewe; en maak my nie beskaamd vanweë my hoop nie.

₁₁₇Steun my, dat ek verlos word; dan sal ek altyddeur op u insettinge let.

₁₁₈U verag almal wat van u insettinge afdwaal, want hulle bedrieëry is leuens.

₁₁₉U ruim al die goddelose van die aarde weg soos skuim; daarom het ek u getuienisse lief.

₁₂₀My vlees sidder van skrik vir U, en ek vrees vir u oordele.

₁₂₁Ek het reg en geregtigheid gedoen: gee my nie oor aan my verdrukkers nie.

₁₂₂Wees borg vir u kneg ten goede; laat vermeteles my nie verdruk nie.

₁₂₃My oë smag na u heil en na die belofte van u geregtigheid.

₁₂₄Handel met u kneg na u goedertierenheid, en leer my u insettinge.

₁₂₅Ek is u kneg; maak my verstandig, dat ek u getuienisse kan ken.

₁₂₆Dit is tyd vir die Here om te handel: hulle het u wet verbreek.

₁₂₇Daarom het ek u gebooie lief, meer as goud, ja, as baie fyn goud.

₁₂₈Daarom hou ek al die bevele aangaande alles vir reg; elke leuenpad haat ek.

₁₂₉U getuienisse is wonderbaar; daarom bewaar my siel hulle.

₁₃₀Die opening van u woorde gee lig; dit maak die eenvoudiges verstandig.

₁₃₁Ek maak my mond wyd oop en hyg, want na u gebooie verlang ek.

₁₃₂Wend U tot my en wees my genadig volgens die reg van die wat u Naam liefhet.

₁₃₃Maak my voetstappe vas in u woord, en laat geen ongeregtigheid oor my heers nie.

₁₃₄Verlos my van die mens se verdrukking, sodat ek u bevele kan onderhou.

₁₃₅Laat u aangesig skyn oor u kneg, en leer my u insettinge.

₁₃₆My oë loop af in strome van water, omdat hulle u wet nie onderhou nie.

₁₃₇Here, U is regverdig, en reg is u verordeninge.

₁₃₈In geregtigheid het U u getuienisse beveel en in louter trou.

₁₃₉My ywer verteer my, omdat my teëstanders u woorde vergeet het.

₁₄₀U woord is deur en deur gelouter, en u kneg het dit lief.

₁₄₁Ek is klein en verag, maar u bevele vergeet ek nie.

₁₄₂U geregtigheid is geregtigheid tot in ewigheid, en u wet is waarheid.

₁₄₃Benoudheid en angs het my getref, maar u gebooie is my verlustiging.

₁₄₄U getuienisse is geregtigheid tot in ewigheid; maak my verstandig, dat ek kan lewe.

₁₄₅Ek het geroep van ganser harte; verhoor my, o Here! Ek wil u insettinge bewaar.

₁₄₆Ek het U aangeroep; verlos my, dat ek u getuienisse kan onderhou.

₁₄₇Voor die môreskemering roep ek om hulp; op u woord wag ek.

₁₄₈My oë is die nagwake voor om u woord te oordink.

₁₄₉Hoor my stem na u goedertierenheid; o Here, maak my lewend volgens u verordeninge.

₁₅₀Hulle kom nader wat skandelike dade najaag, hulle wat ver van u wet af is.

₁₅₁U, o Here, is naby, en al u gebooie is waarheid.

₁₅₂Lankal het ek geweet uit u getuienisse dat U hulle vir ewig gegrond het.

₁₅₃Sien my ellende aan en red my, want u wet vergeet ek nie.

₁₅₄Verdedig my regsaak en verlos my; maak my lewend volgens u belofte.

₁₅₅Die heil is ver van die goddelose, want hulle soek u insettinge nie.

₁₅₆Here, u barmhartighede is menigvuldig; maak my lewend volgens u verordeninge.

₁₅₇My vervolgers en my teëstanders is talryk; van u getuienisse wyk ek nie af nie.

₁₅₈Ek het diegene gesien wat troueloos handel, en dit het my gewalg dat hulle u woord nie onderhou nie.

₁₅₉Aanskou dat ek u bevele liefhet; o Here, maak my lewend na u goedertierenheid.

₁₆₀Die hele inhoud van u woord is waarheid, en al u regverdige verordeninge is tot in ewigheid.

₁₆₁Vorste het my sonder oorsaak vervolg, maar my hart vrees vir u woord.

₁₆₂Ek is vrolik oor u belofte soos een wat 'n groot buit vind.

₁₆₃Leuens haat ek en het daar 'n afsku van; u wet het ek lief.

₁₆₄Ek loof u sewe maal elke dag oor u regverdige verordeninge.

₁₆₅Die wat u wet liefhet, het groot vrede, en vir hulle is daar geen struikelblok nie.

₁₆₆o Here, ek hoop op u heil, en ek hou u gebooie.

₁₆₇My siel onderhou u getuienisse, en ek het hulle baie lief.

₁₆₈Ek onderhou u bevele en u getuienisse, want al my weë is voor U.

₁₆₉o Here, laat my smeking nader kom voor u aangesig; maak my verstandig volgens u woord.

₁₇₀Laat my smeking voor u aangesig kom; red my volgens u belofte.

₁₇₁My lippe sal lofsange laat uitstroom, want U leer my u insettinge.

₁₇₂My tong sal u woord besing, want al u gebooie is geregtigheid.

₁₇₃Laat u hand my tot hulp wees, want ek het u bevele verkies.

₁₇₄o Here, ek verlang na u heil, en u wet is my verlustiging.

₁₇₅Laat my siel lewe, dat dit U kan loof; en laat u gerigte my help.

₁₇₆Ek het gedwaal soos 'n verlore skaap; soek u kneg, want u gebooie vergeet ek nie.