PSALM 121

₁'n BEDEVAARTSLIED.

Ek slaan my oë op na die berge: waar sal my hulp vandaan kom?

₂My hulp is van die Here wat hemel en aarde gemaak het.

₃Hy kan jou voet nie laat wankel nie; jou Bewaarder kan nie sluimer nie.

₄Kyk, die Bewaarder van Israel sluimer of slaap nie.

₅Die Here is jou Bewaarder; die Here is jou skaduwee aan jou regterhand.

₆Die son sal jou bedags nie steek nie, die maan ook nie by nag nie.

₇Die Here sal jou bewaar vir elke onheil; jou siel sal Hy bewaar.

₈Die Here sal jou uitgang en jou ingang bewaar, van nou af tot in ewigheid.