PSALM 34

₁ 'n PSALM van Dawid, toe hy hom kranksinnig gehou het voor Abiméleg en dié hom weggejaag het, sodat hy heengegaan het.

₂Alef. Ek wil die Here altyd loof; sy lof sal altyddeur in my mond wees.

₃Bet. My siel sal hom beroem in die Here; die ootmoediges sal dit hoor en bly wees.

₄Gimel. Maak die Here saam met my groot, en laat ons saam sy Naam verhef!

₅Dalet. Ek het die Here gesoek, en Hy het my geantwoord en my uit al my vrees gered.

₆He. Hulle het Hom aangesien en gestraal van vreugde, en hulle aangesig hoef nie rooi van skaamte te word nie.

₇Sajin. Hierdie ellendige het geroep, en die Here het gehoor, en Hy het hom uit al sy benoudhede verlos.

₈Get. Die Engel van die Here trek 'n laer rondom die wat Hom vrees, en red hulle uit.

₉Tet. Smaak en sien dat die Here goed is; welgeluksalig is die man wat by Hom skuil!

₁₀Jod. Vrees die Here, o sy heiliges, want die wat Hom vrees, het geen gebrek nie.

₁₁Kaf. Die jong leeus ly armoede en het honger; maar die wat die Here soek, het geen gebrek aan enigiets nie.

₁₂Lamed. Kom, kinders, luister na my; ek wil julle die vrees van die Here leer.

₁₃Mem. Wie is die man wat lus het in die lewe, wat dae liefhet om die goeie te sien?

₁₄Noen. Bewaar jou tong vir wat verkeerd is, en jou lippe dat hulle nie bedrog spreek nie.

₁₅Samek. Wyk af van wat verkeerd is, en doen wat goed is; soek die vrede en jaag dit na.

₁₆Ajin. Die oë van die Here is op die regverdiges, en sy ore tot hulle hulpgeroep.

₁₇Pe. Die aangesig van die Here is teen die kwaaddoeners, om hulle gedagtenis van die aarde af uit te roei.

₁₈Sade. Hulle roep, en die Here hoor, en Hy red hulle uit al hul benoudhede.

₁₉Kof. Die Here is naby die wat gebroke is van hart, en Hy verlos die wat verslae is van gees.

₂₀Resj. Menigvuldig is die teëspoede van die regverdige, maar uit dié almal red die Here hom.

₂₁Sjin. Hy bewaar al sy bene: nie een daarvan word gebreek nie.

₂₂Tau. Die onheil maak die goddelose dood; en die wat die regverdige haat, moet daarvoor boet.

₂₃Die Here verlos die siel van sy knegte; en almal wat by Hom skuil, hoef nie te boet nie.