PSALM 46

₁VIR die musiekleier. Van die kinders van Korag. Met sopraanstemme. 'n Lied.

₂God is vir ons 'n toevlug en sterkte; as hulp in benoudhede is Hy in hoë mate beproef.

₃Daarom sal ons nie vrees nie, al waggel die aarde en al wankel die berge weg in die hart van die see.

₄Laat sy waters bruis, laat hulle skuim; laat die berge bewe deur sy onstuimigheid! Sela.

₅Die stroompies van 'n rivier maak die Godstad bly, die heiligste van die woninge van die Allerhoogste.

₆God is daar binne-in, dit sal nie wankel nie; God sal dit help as die dag aanbreek.

₇Nasies het gebruis, koninkryke het gewankel; Hy het sy stem verhef; die aarde bewe.

₈Die Here van die leërskare is met ons; die God van Jakob is 'n rotsvesting vir ons. Sela.

₉Kom, aanskou die dade van die Here, wat verskriklike dinge oor die aarde bring,

₁₀wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand.

₁₁Laat staan en weet dat Ek God is; Ek sal hoog wees onder die nasies, hoog op die aarde.

₁₂Die Here van die leërskare is met ons; die God van Jakob is 'n rotsvesting vir ons. Sela.