PSALM 86

₁'n GEBED van Dawid.

Here, neig u oor, verhoor my, want ek is ellendig en behoeftig.

₂Bewaar my siel, want 'n gunsgenoot is ek; U, my God, verlos u kneg wat op U vertrou.

₃Wees my genadig, o Here, want ek roep U aan die hele dag deur.

₄Verbly die siel van u kneg, want tot U, o Here, hef ek my siel op.

₅Want U, o Here, is goed en vergewensgesind en groot van goedertierenheid vir almal wat U aanroep.

₆Here, luister na my gebed en let op die stem van my smekinge.

₇In die dag van my benoudheid roep ek U aan, want U verhoor my.

₈Daar is niemand soos U onder die gode, Here, en daar is niks soos u werke nie.

₉Al die nasies wat U gemaak het, sal kom en hulle voor u aangesig neerbuig, Here, en hulle sal u Naam eer;

₁₀want U is groot en doen wonders, U alleen is God.

₁₁Leer my, Here, u weg: ek sal in u waarheid wandel; verenig my hart tot die vrees van u Naam.

₁₂Here, my God, ek wil U loof met my hele hart en u Naam vir ewig eer;

₁₃want u goedertierenheid is groot oor my, en U het my siel uit die doderyk diep daaronder gered.

₁₄o God, vermeteles het teen my opgestaan, en 'n bende tiranne soek my lewe; en hulle stel U nie voor hul oë nie.

₁₅Maar U, Here, is 'n barmhartige en genadige God, lankmoedig en groot van goedertierenheid en trou.

₁₆Wend U tot my en wees my genadig; gee u sterkte aan u kneg en verlos die seun van u diensmaagd.

₁₇Doen aan my 'n teken ten goede, sodat my haters dit sien en beskaamd kan staan, omdat U, o Here, my gehelp en getroos het.