PSALM 93

₁DIE Here is Koning; Hy is met hoogheid bekleed. Die Here is bekleed, Hy het Hom met sterkte gegord. Ook staan die wêreld vas, sodat dit nie wankel nie.

₂Vas staan u troon van ouds af; van ewigheid af is U.

₃Die riviere, o Here, het verhef, die riviere het hulle gebruis verhef; die riviere verhef hulle geraas!

₄Meer as die gebruis van groot, geweldige waters, van die golwe van die see, is die Here geweldig in die hoogte!

₅U getuienisse is baie betroubaar. Heiligheid pas by u huis, Here, tot in lengte van dae!