PSALM 97

₁DIE Here is Koning; laat die aarde juig; laat baie eilande bly wees!

₂Wolke en donkerheid is rondom Hom; geregtigheid en reg is die grondslag van sy troon.

₃'n Vuur gaan voor sy aangesig uit en steek sy teëstanders rondom aan die brand.

₄Sy bliksems verlig die wêreld; die aarde sien dit en bewe.

₅Berge smelt weg soos was voor die aangesig van die Here, voor die aangesig van die Here van die hele aarde.

₆Die hemele verkondig sy geregtigheid, en al die volke sien sy heerlikheid.

₇Beskaamd staan almal wat die beelde dien, wat hulle op afgode beroem; al die gode buig hulle voor Hom neer.

₈Sion hoor dit en is bly, en die dogters van Juda juig oor u oordele, o Here!

₉Want U, Here, is die Allerhoogste oor die hele aarde; U is hoog verhewe bo al die gode.

₁₀o Liefhebbers van die Here, haat die kwaad! Hy bewaar die siele van sy gunsgenote, Hy red hulle uit die hand van die goddelose.

₁₁Die lig is vir die regverdige gesaai en vrolikheid vir die opregtes van hart.

₁₂o Regverdiges, wees bly in die Here, en loof sy heilige gedenknaam!