1 KORONIKA 10

₁Bafilisita ba kile ba lwa le Baisiraele. Bana ba Isiraele ba rakwa ke Bafilisita, ba fedišwa ba bolailwe dithabeng tša Giliboa. ₂Bafilisita ba hlomara Saulo le barwa ba gagwe; ba bolaya Jonathane, le Abinadaba, le Malakisua, barwa ba Saulo. ₃Tlhabano ya thatafalela Saulo a hweditšwe ke babetši ba mesebe, a gobatšwa ke babetši bao; ₄a botša morwadi wa marumo a gagwe a re: Swara tšhoša ya gago o ntlhabe, mašoboro ao a se tlo tla a nkgoboša. Morwadi wa dibetša a gana ka gobane a tšhogile ka kudu. Saulo a tšea tšhoša ya gagwe a ipolaya ka go ikwetša mo go yona. ₅Morwadi wa dibetša ge a bona Saulo a hwile, le yena a ipolaya ka go ikwetša mo go tšhoša ya gagwe. ₆Ya ba gona go hwa ga Saulo le barwa ba gagwe; ba hwile mmogo ka leloko. ₇Batho ba Isiraele ka moka ba molaleng woo, ge ba bona ba fentšwe, le gore Saulo le barwa ba gagwe ba hwile, ba falala metseng ya bona ba tšhaba; mme Bafilisita ba tla ba dula go yona.

₈Ka la ka moswana Bafilisita ba tla ba hlakola ba ba bolailwego, ba hwetša Saulo le barwa ba gagwe ba rapaletše gona moo dithabeng tša Giliboa. ₉Ba mo hlakola, ba tšea hlogo ya gagwe le dibetša tša gagwe, ba di iša nageng ya Bafilisita thoko tšohle, gore taba ye e begwe go medimo ya bona ya diswantšho le go setšhaba. ₁₀Dibetša tša Saulo ba di boloka mo ngwakong wa modimo wa bona; legata la hlogo ya gagwe ba le kokotela mo ngwakong wa Dagoni. ₁₁Batho ba Jabese wa Gileada, ge ka moka ga bona ba ekwa tšohle tše Bafilisita ba di dirilego Saulo, ₁₂ba tšwa, banna ka moka ba bahlabani, ba kuka setoto sa Saulo le ditoto tša barwa ba gagwe, ba di tliša Jabese, ba boloka mašapo a bona ka tlase ga mohlopi wa gona moo Jabese, ba fetša matšatši a šupago ba ikona dijo.

₁₃Saulo o hwile a hlanogetše Morena, a ganne go hlokomela se Morena a se boletšego, a ba a nyaka senoge a botšiša sona, ₁₄a se ke a botšiša Morena. Morena a mo lesa a hwa; bogoši a bo lesa bja fetela go Dafida morwa wa Isai.