1 KORONIKA 15

₁Dafida o ikagetše nywako motseng wa gagwe. Polokelo ya Morena o e lokišeditše madulo a yona, a e hlomela ngwakwana. ₂Mehleng yeo Dafida o itše: Polokelo ya Modimo e se ke ya rwalwa ke motho, ge e se Balefi, gobane ke bona ba Modimo a ba kgethetšego go rwala polokelo ya gagwe, le go mo hlankela ka mehla. ₃Dafida a botha Baisiraele ka moka ba tla Jerusalema gore ba rwale polokelo ya Morena, ba e iše bodulong bja yona bjo a bego a bo lokišitše. ₄A phutha ba leloko la Arone le la Lefi. ₅Go ba leloko la Kahathe a hlaola Uriele mokgoma wa ba lekgolo le masome a mabedi ba leloko la gagwe. ₆Go ba leloko la Merari a hlaola Asaya mokgoma, le ba makgolo a mabedi a masome a mabedi ba leloko la gagwe. ₇Go ba leloko la Gerisone a hlaola Joele mokgoma, le ba lekgolo le masome a mararo ba leloko la gagwe. ₈Go ba leloko la Elitsafane a hlaola Semaya mokgoma, le ba makgolo a mabedi ba leloko la gagwe. ₉Go ba leloko la Heburone a hlaola Eliele mokgoma, le ba masome a seswai ba leloko la gagwe. ₁₀Go ba leloko la Usiele a hlaola Aminadaba, le ba lekgolo le lesome le metšo e mebedi ba leloko la gagwe.

₁₁A tsebo bitša Tsadoko le Abyathara baperisita, le Balefi boUriele, le Joele, le Semaya, le Eliele, le Aminadaba; ₁₂a bolela le bona a re: Lena le bakgoma ba meloko ya geno ya Balefi; bjale ikgetheng, le kgethe le bana babolena gore le rwale polokelo ya Morena Modimo wa Isiraele, le e tliše mo ke e lokišeditšego gona; ₁₃gobane mohla wola le be le se gona, gwa se dire bolena; mme Morena Modimo wa rena a re gogola ka ge re sa ka ra mmatamela ka mokgwa wa gona.

₁₄Ke moka baperisita le Balefi ba ikgetha gore ba kgone go goroša polokelo ya Morena Modimo wa Isiraele. ₁₅Ba leloko la Balefi ba rwala polokelo ya Modimo ka magetla a bona, ka mešikaro e lego mo go yona, ka mo Moshe a bego a laetše ka gona a boditšwe ke Morena.

₁₆Dafida a botša bakgoma ba Balefi a re ba beakanye bana babo ka dihlopha tša baopedi, le tša baletši ba diletšo, le ba makope, le ba dinaka, le ba meropa, gore ba gobele ba hlaboše mantšu ka go thaba. ₁₇Balefi ba bea Hemana morwa wa Joele, le Asafa morwa wa Berekia wa leloko la gabo; go leloko la Merari la gabobona ba bea Ethane morwa wa Kusaya. ₁₈Gotee le bona ba bea bana babo ba sehlopha sa bobedi, e lego Sekaria morwa wa Jaasiele, le Semiramothe, le Jehiele, le Uni, le Eliaba, le Benaya, le Maaseya, le Mathitya, le Elifele, le Mikinea, le Obede-Edomo, le Jeiela baleti ba dikgoro. ₁₉Ba dikoša e be e le Hemana, le Asafa, le Ethane, baletši ba diletšo tša mphiri. ₂₀Sekaria, le Asiele, le Semiramothe, le Jehiele, le Uni, le Eliaba, le Maaseya, le Benaya, e be e le ba diletšo ka lentšu la pele. ₂₁Mathitya, le Elifele, le Mikinea, le Obede-Edomo, le Asaya, e be e le ba makope, ba mantšu a banna.

₂₂Kenanya mokgoma e mongwe wa Balefi, e be e le mohlabeledi wa go ruta bahlabeledi, gobane e be e le seopedi. ₂₃Berekia le Elikana e be e le baleti ba mojako polokelong. ₂₄Gomme baperisita, boSebanya, le Josafate, le Nethaniele, le Amasai, le Sakaria, le Benaya, le Eliesere, e be e le ba go letša diphalafala ba etile polokelo ya Morena pele. Obede-Edomo le Jehia e be e le baleti ba mojako polokelong.

₂₅Bjale Dafida le bagolo ba Isiraele, le balaodi ba dikgao tša madira, ba ya go tšea polokelo ya kgwerano ya Morena, ba e ntšha ngwakong wa Obede-Edomo ba thabile. ₂₆Ya re ge Modimo a tsebafa Balefi ba ba bego ba rwala polokelo ya kgwerano ya Morena, ba hlaba dipoana tše di šupago, le dikgapa tše di šupago. ₂₇Dafida yena o be a apere kobo ya leokodi le lešweu, ye e bego e aperwe ke bohle Balefi ba ba bego ba rwala polokelo, le baopedi, le Kenanya mohlableledi wa baopedi. Dafida o be a apere le nkatana ya leokodi. ₂₈Ka mokgwa o bjalo Baisiraele ka moka ba tla le polokelo ya Kgwerano ya Morena ka go hlalala, go letšwa diphalafala le dinaka le meropa le makope le diletšo.

₂₉Ya re ge polokelo ya kgwerano ya Morena e fihla motseng, Mikala morwedi wa Saulo a ukamela ka lešoba, a bona kgoši Dafida a bina a fela a gobela, mme a mo nyatša pelong ya gagwe.