Bogoši bjo bo sa felego bja moloko wa Dafida
1Dafida ge a bona a dutše ngwakong wa gagwe, a bolela le Nathane moporofeta a re: O ko bone, nna ke dutše ngwakong wa merokwana, gomme polokelo ya kgwerano ya Morena e ruletšwe ka mašela.
2Nathane a fetola a re: Dira tšohle tše di lego pelong ya gago, gobane Modimo o na nago.
3Fela, bošego bjoo lentšu la Modimo la tlela Nathane la re: 4Yaa o botše Dafida mohlanka wa ka o re: Ga se wena o tlogo nkagela Ngwako wo nkago dula go wona. 5Gobane ga kešo ka ba ka dula ngwakong go tloga mola ke tliša Isiraele go fihla le lehono; ke be ke le wa go tšama ke hloma mešaša le mokutwana. 6Mo go fela mo ke bego ke sepela le Isiraele ka moka, a fa nkile ka botša le o tee wa baahlodi ba Isiraele, ba ke bego ke ba laetše go diša setšhaba sa ka, ka re: Ke ka baka lang le sa nkagele Ngwako wa mamati a morokwana?
7Bjale botša Dafida mohlanka wa ka o re: Morena wa Mašaba o re: Ke nna ke go tšerego o le merakeng, o šala mehlape morago, wa tla wa ba moetapele wa setšhaba sa ka sa Isiraele. 8Ka ba nago mo go fela mo o bego o sepela gona, ka fediša manaba a gago, ka go direla leina boka maina a bagolo ba mo faseng. 9Gomme setšhaba sa ka sa Isiraele ke se lokišeditše bodulo, ka ba hloma fa, mo ba tlogo dula seng sa bona, ba se ke ba tlo hlwa ba šišinywa; mme batho ba borumolang ba ka se ke ba hlwa ba ba šulafatša ka mokgwa wa peleng, 10bjalo ka mola ke sa bea Baahlodi ba go buša setšhaba sa ka sa Isiraele. Bjale manaba a gago ka moka ke a kokobeditše; gomme ke sa go botša ke re: Ke wena o tlogo agelwa ngwako ke Morena. 11E tlo re ge mabaka a gago a phethegile, ge o ile le botatago, ke mo ke tlo go tsoša wa peu ya gago a tla morago ga gago, e a tlogo ba e mongwe wa barwa ba gago, ka tiiša bogoši bja gagwe. 12Ke yena a tlogo nkagela Ngwako; gomme sedulo sa bogoši bja gagwe ke tlo se thekga ka go sa felego. 13Nna ke tlo ba tatagwe, mme yena e tlo ba morwa wa ka. Gomme botho bjaka bo ka se ke bja mo tloga, boka mola bo tloga yola e a bego a le gona pele ga gago. 14Ke tlo mmea mo Ngwakong wa ka le mo mmušong wa ka ka go sa felego; gomme sedulo sa bogoši bja gagwe e tlo ba se se tiilego ka mehla le mehla.
15Ditaba tše ka moka Nathane o di fihlišitše go Dafida, le dipono tšohle.
16Dafida a ya a dula pele ga Morena, a bolela a re: Morena Modimo, ke nna mang? Gomme le moloko wa ka ke eng ge o bile o mphihlišitše fa? 17Gomme tše o di dirilego o hwetša e sa le tše nyenyane, Modimo, gobane leloko la ka nna mohlanka wa gago o le bolela ka tše di sa lego kgole, gomme o ntebeletše ke le wa go tlo godišwa bathong, Morena Modimo. 18Bjale nna Dafida ke sa tlo reng, ge nna mohlanka wa gago o šetše o nkgodišitše gakaakaa, etšwe o ntseba, nna mohlanka wa gago. 19Morena, dilo tše kgolo tše ka moka, o di direla nna mohlanka wa gago ka gobane o di ratile, gomme o rata ge taba kgolo ye e tsebja. 20Morena, Mokawena gao! Ga go Modimo ge e se wena fela mo go bohle ba re kwilego ba bolelwa. 21Ke sefe setšhaba mo lefaseng se se kago etša sa gago sa Isiraele, se Modimo a nago a ya a iphološetša sona ya ba sa gagwe, wa itirela leina ka tiro tše kgolo tše di šiišago, tša mola o raka ditšhaba ge go fihla sa gago setšhaba se o se namoletšego kua Egipita. 22Ke gona moo setšhaba sa gago sa Isiraele o se dirilego setšhaba sa gago ka go sa felego, mme wena Morena wa ba Modimo wa sona.
23Gomme bjalo, Morena, lentšu le o boletšego nna mohlanka wa gago ka lona, le leloko la ka, a le rerešege ka go sa felego, o tšweletše tše o di boletšego. 24Ke mo leina la gago le tlogo rerešega ya ba le legolo ka go sa felego, ge go tlo thwe; Morena wa Mašaba Modimo wa Isiraele, ke yena Modimo wa Isiraele! Ke mo leloko la Dafida mohlanka wa gago le tlogo tia pele ga gago. 25Gobane wena Modimo waka, o ntshebetše nna mohlanka wa gago wa re: O tlo nkagela ngwako; ke gonaa nna mohlanka wa gago ke beilego pelo ka rapela pele ga gago. 26Bjale gee, Morena Modimo ke wena; ke wena o boletšego nna mohlanka wa gago ka tše botse. 27Bjale napa o šegofatše lapa la mohlanka wa gago neng le neng; ka gobane se wena Modimo o se atlago, se atlegile neng le neng.
