Baamoni ba goboša batseta ba Dafida
1Ka morago ga tšeo gwa hwa Nahasi kgoši ya Baamoni; legatong la gagwe gwa buša morwa wa gagwe. 2Dafida a re: Hanuni morwa wa Nahasi ke tlo mo dira ka botho ka gobane tatagwe o be a ntira ka botho. Dafida a roma batseta a re ba yo mo emela ka baka la tatagwe. Ya re ge batseta ba Dafida ba fihla go Hanuni nageng ya Baamoni, ba tlile go mo emela, 3bakgoma ba Baamoni ba bolela le Hanuni ba re: A o re ge Dafida a romile bahomotši ke ka ge a re o bone ge a godiša tatago? A ga o bone ge bahlanka ba gagwe ba tlile go wena gore ba bone naga, ba kgone go tla ba e šwalalanye? Ke dihlodi.
4Ke mo Hanuni a swerego bahlanka ba Dafida, a ba boola, a ripa diaparo tša bona ka bogare go fihla ka mathekeng, a ba lesa ba ya. 5Ba sepela. Ya re ge Dafida a tsebišwa tša banna bao, a roma motho a ba gahlanetša, gobane ba be ba gobošitšwe gagolo. Kgoši ya re: Dulang Jeriko, maledu a lena a mele, le tsebo tla.
6Baamoni bjale ge ba bona ba rumotše Dafida, Hanuni le Baamoni ba ntšha ditalente tše sekete tša silifera, ba thwala dikoloi le banamedi go Basiria ba Mesopotamia, le go Bamaaka, le go Batsoba. 7Ba thwala dikoloi tše dikete tše masome a mararo a metšo e mebedi, le kgoši ya Maaka le setšhaba sa yona; ba tla ba hloma mešaša ba batagane le Medeba; le Baamoni ba tla ba bokana ba etšwa metseng ya bona, ba tla go hlabana.
8Dafida a re go di kwa, a roma Joaba le madira ka moka, le bagale ba gagwe. 9Gomme Baamoni ba tšwa, ya laiwa pele ga kgoro ya motse. Ge e le dikgoši tšela di bego di tlile, tša ema thoko ya lešokeng.
10Bjale Joaba ge a bona manaba a mo wela ka morago le ka pele, a hlaola ona masogana masoganeng a Isiraele, a tšwa nao a leba Basiria. 11Ba bangwe ba setšhaba a ba gafela Abisai monnagwe, a re: Ba hlahlamologe ba lebile Baamoni. 12A bolela a re: Ge Basiria ba ka mpatla, o tle o ntlatše. Ge Baamoni ba ka go patla, nna ke tla go tlatša. 13Tiiša maatla; gomme re tiišane maatla ka baka la setšhaba sa gešo, le ka baka la metse ya Modimo wa rena; gomme Morena a dire se se mo kgahlago.
14Bjale Joaba le batho ba gagwe ba hlahlamolago, ba hlabana le Basiria. Basiria ba rakwa. 15Baamoni ge ba bona Basiria ba tšhaba, le bona ba tšhaba Abisai monnagwe, ba fihla motseng. Gomme Joaba a boela Jerusalema.
16Basiria ge ba bona ba fentšwe ke Baisiraele, ba roma batseta ba rapa Basiria ba mošola wa noka. Ba tla ba etilwe pele ke Sobake molaodi wa dira tša Hadada-Esere. 17Ya re ge Dafida a tsebišwa fao, a rapa Baisiraele ka moka, ba sela noka ya Jorodane, ba ba hwetša ba hlahlamologa, ba lwa nabo, le Basiria ba ema, ya gahlana. 18Basiria ba rakwa ke Baisiraele; Dafida a bolaya banamedi ka dikete tše di šupago, le bahlabani ba dikete tše masome a mane; a bolaya le Sobake molaodi wa dira. 19Bahlanka ba Hadada-Esere ge ba bona ba fentšwe ke Baisiraele, ba loba Dafida, ya ba bahlanka ba gagwe, ba se sa rata go thuša Baamoni.
