1 KORONIKA 23

₁Dafida mola a šetše a tšofetše, a atetšwe ke matšatši, o beile Salomo morwa wa gagwe a ba kgoši ya Isiraele.

₂Dafida o kile a botha bakgoma ba Isiraele, le baperisita, le Balefi. ₃Balefi, ge go balwa ba ba feditšego nywaga e masome a mararo le e fetago yeo, gwa tšwa dikete tše masome a mararo a metšo e seswai tša banna. ₄Go bona gwa hlaolwa ba dikete tše masome a mabedi a metšo e mene, ya ba ba go hlapetša mediro ya Ngwako wa Morena; ba dikete tše di selelago ya ba balaki le baahlodi. ₅Ba dikete tše nne ya ba baleti ba dikgoro, le ba go reta Morena ka diletšo tše Dafida a di dirilego ya ba tša go opela; e be e le ba dikete tše nne.

₆Balefi o ba arotše ka go ya ka meloko ya barwa ba Lefi, e lego Gerisome le Kahathe le Merari.

₇Bagerisome e be le Laedani le Simei. ₈Barwa ba Laedani e be e le Jehiele wa pele, le Sethama, le Joele; e be e le ba bararo. ₉Barwa ba Simei e be e le Selomitha, le Hasiele, le Harane, ba bararo ba e be e le bona bagolo ba leloko la Laedani. ₁₀Barwa ba Simei e be e le Jahathe, le Sina, le Jeusi, le Beria; ke bona barwa ba Simei, e be e le ba bane. ₁₁Jahathe e be e le wa pele, Sina e be e le wa bobedi. Jeusi le Beria ba be ba se na bana ba bantši, ba fo balwa sekgao setee le leloko letee.

₁₂Barwa ba Kahathe e be e le Amorama, le Jitsehara, le Heburone, le Usiele; e be e le ba bane. ₁₃Barwa ba Amorama e be e le Arone le Moshe. Arone o hlaotšwe gore a kgethelwe sekgethwakgethwa, yena le barwa ba gagwe ka go sa felego; ya ba bona ba go thuntšhetša Morena diorelo, le ba go šegofatša setšhaba ka leina la Morena ka go sa felego. ₁₄Ge e le Moshe monna wa Modimo barwa ba gagwe ba be ba balwa le leloko la Lefi. ₁₅Barwa ba Moshe e be e le Gerisome le Eliesere. ₁₆Barwa ba Gerisome e be e le Sebuele wa pele. ₁₇Barwa ba Eliesere e be e le Rehabya wa pele. Gomme Eliesere o be a se na barwa ba bangwe; barwa ba Rehabya bona ba ata ka kudu.

₁₈Barwa ba Jitsehara e be e le Selomitha wa pele. ₁₉Barwa ba Heburone e be e le Jeria wa pele; wa bobedi e be e le Amaria; wa boraro e be e le Jehasiele; wa bone e be e le Jakamehama. ₂₀Barwa ba Usiele e be e le Mika wa pele; wa bobedi e be e le Jisia.

₂₁Barwa ba Merari e be e le Mahli le Musi. Barwa ba Mahli e be e le Eleasara le Kisi. ₂₂Eleasara a hwa a se na barwa, ge e se barwedi fela; bona ba tšewa ke bana babobona ba Kisi. ₂₃Barwa ba Musi e be e le Mahli, le Edere, le Jerimothe, ba bararo ba.

₂₄Ke bona barwa ba Lefi ka meloko ya bona, ba e lego botatago meloko ka palo ya bona; ke bona ba go dira mediro ya Ngwako wa Morena, ge ba na le nywaga e masome a mabedi le e fetago yeo.

₂₅Gobane Dafida o be a re: Morena Modimo wa Isiraele o neetše setšhaba sa gagwe khutšo; o dutše Jerusalema ka go sa felego. ₂₆Le gona Balefi ga ba sa rwala ngwako wola le dilo tša wona tša modiro wa wona. ₂₇Ka gobane ka taelo ya Dafida ya mafelelo barwa ba Lefi ba balwa ge ba na le nywaga e masome a mabedi le e fetago yeo. ₂₈Modiro wa bona ke gore ba tlatše barwa ba Arone modirong wa ngwako wa Morena, le malapeng a wona le diphapošing tša wona, le go thakga dilo tše kgethwa ka moka, le mediro ka moka ya ngwakong wa Morena; ₂₉le go hlokomela dinkgwabonwa, le maupi a tokilwego a dibego tša dijo, le dinkgwana tše di sa omelwago, le meruswi, le tše di bešwago, le ditekanyo le meelo. ₃₀E be e le ba go ema ka moswana ka mehla, ba leboga ba reta Morena; ba dira bjalo le ka mantšiboa. ₃₁E be e le ba go tliša dihlabelo tšohle tša Morena ka disabatha le ka dikgwedi tše mpsha le ka menyanya, ba ya ka palo ya bona le ka mokgwa wa bona wa ka mehla pele ga Morena. ₃₂Ya ba ba go hlokomela tše di swanetšego go hlokomelwa ngwakong wa kgwerano le sekgethweng, le tše di bego di hlokomelwa ke barwa ba Arone bana babo bona, tša go direla ngwako wa Morena.