1 KORONIKA 4

₁Bana ba Juda ke Pheretse, le Hetsirone, le Karami, le Huri, le Sobala. ₂Reaya morwa wa Sobala o tswetše Johate; Johate a tswala Ahumai le Lahadi. Ke yona meloko ya ba Tsorea.

₃Ba ga Abi-Ethama ke Jeseriele, le Jisima, le Jidibasa; kgaetšedi ya bona ke Seleleponi. ₄Penuele ke tatago Gedoro; Esere ke tatago Husa. Bona ke bana ba Huri wa ntlha wa Efuratha tatago ba Betlehema.

₅Asahuru tatago Thekoa o be a na le basadi ba babedi, Helea le Naara. ₆Naara a mmelegela Ahusama, le Hefere, le Themeni, le Ahasethari. Ke bona bana ba Naara. ₇Bana ba Helea ke Tserete, le Jesohara, le Etinana.

₈Kotsi o tswetše Anuba, le Sobeba, le moloko wa Aharahele morwa wa Haruna.

₉Jabese e be e le yena a godišwago mo go bana babo; mmagwe o mo reetše la Jabese ka ge a itše: Ke mmelege ka bohloko. ₁₀Jabese o be a rapela Modimo wa Isiraele a re: Hle nkatle wa go atla; o katološe naga ya ka; seatla sa gago ge se ka ba le nna, se mphemela kotsi, e se nthokofatše! Gomme Modimo a mo tlišetša tše a bego a di kgopela.

₁₁Kelubu monnago Sua o tswetše Mehiri tatago Esithone. ₁₂Esithone ke tatago Bethe Rafa le Pasea le Thehina, tatago motse wa Nahasi. Ke bona bana ba Reka.

₁₃Bana ba Kenase ke Othiniele le Seraya; bana ba Othiniele ke Hahathe.

₁₄Meonothai o tswetše Ofura; Seraya o tswetše Joaba tatago ba moedi wa babetli; ka kgonthe e be e le babetli.

₁₅Bana ba Kalebe morwa wa Jefune ke Iru, le Ela, le Naama, le ba Kenase barwa ba Ela.

₁₆Bana ba Jahalele ke Sifi, le Sifa, le Thira, le Asariele.

₁₇Bana ba Esera ke Jethere, le Meredi, le Efere, le Jaloni. Bana ba Bithia morwedi wa Farao e a bego a tšerwe ke Meredi, ke Miryama, le Samai, le Jisiba tatago Esithemoa. ₁₈Mosadi wa gagwe wa Mojuda a belega Jeredi tatago Gedoro, le Hebere tatago Soko, le Jekuthiele tatago Sanoa.

₁₉Bana ba mosadi wa Hodiya kgaetšedi ya Nahama ke tatago Kegila wa Garami, le Esithemoa wa Akhathi.

₂₀Bana ba Simone ke Amoni, le Rina, le Benihanana, le Thilone.

Bana ba Kisei ke Sohebe, le Beni-Sohethe.

₂₁Bana ba Sela morwa wa Juda ke Ere tatago Leka, le Laeda tatago Maresa, le moloko wa balogi ba leokodi ba ga Asibea, ₂₂le Jokima, le banna ba Koseba, le Joase, le Sarafa, ba ba bego ba guša Moaba le Jasubi-Lehema. Taba tšeo ke tša bogologolo. ₂₃E be e le bona babopi ba dibjana ba ba bego ba agile Netaima le Gedera; ba be ba dutše moo le kgoši ya gona, ba e hlankela.

₂₄Bana ba Simeone ke Nemuele, le Jamini, le Jariba, le Sera, le Saulo. ₂₅Morwa wa gagwe e be e le Salume; morwa wa gagwe ke Mibisane; morwa wa gagwe ke Masima. ₂₆Bana ba Masima ke Hamuele; morwa wa gagwe ke Sakuri; morwa wa gagwe ke Simei. ₂₇Simei o be a na le barwa ba lesome le metšo e selelago le barwedi ba ba selelago. Ge e le ba gabo ba be ba se na bana ba bantši, moloko wa gabo wa se ke wa ata bjalo ka wa Juda.

₂₈Ba be ba agile Bereseba, le Molada, le Hasara-Suale, ₂₉le kua Biliha, le Etsema, le Tholadi, ₃₀le kua Bethuele, le Horoma, le Tsikilaga, ₃₁le kua Bethe-Marakabothe, le Hasara-Susima, le Bethe-Birei, le Searima. E be e le yona metse ya bona go fihla ge Dafida a eba kgoši. ₃₂Le metsana ya bona še: Ke Ethama, le Aini, le Rimone, le Thokena, le Asane, metsana e mehlano, ₃₃le metsana ya bona ka moka e bego e dikologile metse yeo ya goma ka Baali. Ba be ba dutše moo; ba be ba na le moeno wa moloko wa bona.

₃₄Le Mesobaba, le Jamaleka, le Josa morwa wa Amatsia, ₃₅le Joele, le Jehu morwa wa Jesibya morwa wa Seraya morwa wa Asiele, ₃₆le Elioenai, le Jaakoba, le Jesohaya, le Asaya, le Adiele, le Jesimiele, le Benaya, ₃₇le Sisa morwa wa Sifei morwa wa Alone morwa wa Jeyada morwa wa Simiri morwa wa Semaya. ₃₈Ba ba bolelwago fa ka maina e be e le bakgoma dileteng tša bona; gomme ba moloko wa bona ba be ba atile e le ba bantši.

₃₉Ba be ba goma ka difata tša Gedoro, thoko ya Bohlabela ya moedi, ba nyakela dinku tša bona mafulo. ₄₀Ba hwetša mafulo a a nonnego a mabotse, le naga ye e ahlamilego thoko tšohle, e letše e robetše boroko, ka gobane kgale e be e dutšwe ke Bahama.

₄₁Ba maina a bona a ngwadilwego fa, ba tlile mehleng ya Hiskia kgoši ya Juda, ba hula metse ya gona, le ya Bameuni ba ba ba hweditšego ntshe, ba ba dira segafiwamoka, le mehleng yeno go sa le bjalo; ba dula madulong a bona, ka gobane go be go na le mafulo a dinku. ₄₂Ba bangwe ba bana ba Simeone ba kile ba tšwa e le banna ba makgolo a mahlano, ba tla dithabeng tša Seire ba etilwe pele ke Pelatya, le Nearia, le Refaya, le Usiele, barwa ba Jisei, ₄₃ba bolaya mašalela a Bamaaleke ba ba bego ba šaletše, ba dula ntshe; le lehono ba sa le gona moo.