1 BAKORINTHE 16

₁Ge e le dineo tše di ntšhetšwago ba bakgethwa, le lena dirang ka mo ke laetšego diphuthego tša kua Galatia. ₂Ka la go hlathlama Sabatha e mongwe le e mongwe a ntšhe sa gagwe, a tšhele ka mo a ruilego ka gona gore e se re ge ke etla, ya ba gona go tšhelwago. ₃E tlo re ge ke fihlile, ke tlo hlaola ba le ba botilego, ka ba roma ba swere mangwalo, ba tlo ya ba iša dimpho tša lena kua Jerusalema. ₄Ge e tlo ba tše di lekanego gore go ye le nna, gona ba tlo wela tsela ba na le nna.

₅Ke tlo tla go lena ka tsela ya Matsedonia, gobane naga ya Matsedonia ke tlo e phatša. ₆Mohlomongwe ke tlo dula go lena ka fetša sebaka; mohlomongwe nka dula lebaka la marega, la tlo kgona le mphelegetša mo ke tlogo ya gona. ₇Gobane bjale ga ke rate go fo le hlola ka feta; ke holofetše go dula lebakanyana ke na le lena, ge Morena a ka dumela.

₈Motseng wa Efeso ke tlo dula go fihla Pentekoste. ₉Gobane mojako wo o mpulegetšego ke o mogolo wo o tsenegago; le gona baganyetši ke ba bantši.

₁₀Ge Timotheo a etla, le bone gore a dule le lena a se na poifo, gobane modiro wa Modimo o o dira bjalo ka nna. ₁₁Go se ke gwa ba le e a mo nyatšago, Le be le mo fe tsela ka tše botse; a tle go nna, gobane ke mo lebeletše gotee le bana bešo.

₁₂Ge e le Apollo ngwanešo, ke mo kgopetše gagolo ka re a ye go lena a na le banabešo, a se dumele le ganyane go ya e sa le bjale. O tlo tla mohla a bonago sebaka.

₁₃Phakgamang le eme tumelong, le dire senna, le tie maatla. ₁₄Tšohle tša lena di dirwe ka lerato.

₁₅Banabešo, a nke ke le eletšeng. Tsebang ntlo ya Stefana ka ge e le yena thakangwaga ya ba Akaya, le ka gobane ba itirile bahlankedi ba ba bakgethwa. ₁₆Le lena le laolweng ke ba babjalo, le bohle ba ba ba swarišago, ba ba itapišago.

₁₇Stefana le Fortunato, le Agaiko, ke ba thabetše ge ba tla go nna; gobane mo ke bego ke hloka tša lena ba go tladitše. ₁₈Ba khutšišitše moya wa ka le meoya ya lena. Batho ba ba bjalo a nke le ba tsebeng.

₁₉Diphuthego tša Asia di re le dumele. Le Akwila le Perisila le phuthego ya ngwakong wa bona ba le dumediša gagolo Moreneng. ₂₀Le dumedišwa ke bana bešo bohle.

Dumedišanang ka katlokgethwa.

₂₁Tumedišo ya seatla sa ka, nna Paulo, še.

₂₂Ge go na le e sa ratego Morena Jesu Kriste, a a tšwewe.

Morena o etla.

₂₃Kgaugelo ya Morena Jesu Kriste a e be le lena.

₂₄Lerato la ka le mo go lena bohle ka Kriste Jesu. Amene.