Go aroga ga Salomo. Lenaba la gagwe. Lehu la gagwe
1Kgoši Salomo o be a rata basadi ba bantši ba mehuta e šele; a re a šetše a tšere morwedi wa Farao, a tšea le ba Moaba, le ba Amoni, le ba Edomo, le ba Sidone, le ba Bahethe. 2E be e le ba tšona ditšhaba tše Morena a laetšego a re: Le se ke la tsena go bona; le bona ba se ke ba tsena go lena; gobane ba ka se ke ba lesa go gokeletša dipelo tša lena mme la latela medimo ya bona; gomme Salomo o be a ba gomarela ka lerato. 3O be a na le basadi ba bahumagadi ba makgolo a šupago, le basadi ba direthe ba makgolo a mararo; basadi ba ba gagwe ba arošitše pelo ya gagwe. 4Ya re lebakeng la ge Salomo a tšofetše, basadi ba gagwe ba aroša pelo gagwe ya latela medimo e šele, pelo ya gagwe ya se ke ya hlwa e ema le Morena ka botlalo bjalo ka pelo ya Dafida tatagwe. 5Salomo o latetše Asitherothe modimo wa Basidone, le Milikomo makgapa a Baamoni. 6Salomo a dira se se befetšego Morena, a se ke a latela Morena ka mokgwa o tletšego bjalo ka Dafida tatagwe. 7Methleng yeo Salomo o agetše Kamosi makgapa a Bamoaba moto mo thabeng e bataganego le Jerusalema ka thoko ya bohlabela. Le Mologo makgapa a Baamoni a o agela mmoto o mobjalo. 8Ya ba gona go direla basadi ba gagwe ba mathoko, ba ba bego ba tlišetša medimo ya bona diorelo le didimo.
9Ke mo Morena a befeletšwego Salomo, ka ge pelo ya gagwe e hlanogela Morena Modimo wa Isiraele e a bego a iponaditše go yena gabedi, 10e a bego a mo laetše ka baka la taba tšeo, a re a se ke a latela medimo e šele; yena a lesa go hlokomela tše Morena a mo laetšego tšona. 11Ka gona Morena a bolela le Salomo a re: Ke tlo go amoga mmušo ka o nea mohlanka wa gago, ka molato wa tše di lego go wena, ge o sa ka wa hlokomela kgwerano ya ka, le melao ya ka ye ke go laetšego yona. 12Fela, nka se ke ka di dira mehleng yeno o sa phela, ka baka la Dafida tatago. Yo ke tlogo mo amoga mmušo ke morwa wa gago. 13Le gona nka se ke ka go amoga mmušo ka moka. Morwa wa gago ke tlo mo nea ba leloko letee, ka baka la Dafida mohlanka waka, le ka baka la Jerusalema motse wo ke o kgethilego.
14Gomme Morena a tsošetša Salomo lenaba; e be e le Hadada Moedomo, mokgomana wa Edomo. 15Gobane mehleng yela Dafida a fetša Baedomo, Joaba molaodi wa madira o rotogetše ntshe go yo boloka ba ba bolailwego; a bolaya banna ka moka ba Edomo. 16Joaba a na a dula ntshe a fetša dikgwedi tše di selelago a na le Baisiraele ka moka, gore a be a fediše banna ka moka ba kua Edomo. 17Ke mo go tšhabilego Hadada le banna ba bangwe ba Edomo ba bahlanka ba tatagwe, ba tšhabela Egipita ba na le yena. Ke mola Hadada e sa le lesoganyana. 18Ba tloga Midiane ba tla Parane, ba tšeeletša banna ba Parane, ba ba ba fihla Egipita go Farao kgoši ya Egipita; yena a ba nea ngwako le dijo, a ba nea le naga. 19Hadada a hwetša Farao a mo lebeletše ka botho bjo bogolo, a ba a mo nea monyanana wa mosadi wa gagwe, monyanana wa mohumagadi Thahapanese ya ba mosadi wa gagwe. 20Monyanana e wa Thahapanese a mmelegela Genubatha. Ngwana e wa gagwe, Thahapanese o mo godišitše ngwakong wa Farao. Genubatha a dula ngwakong wa Farao a na le bana ba Farao.
21Bjale Hadada, a le moo Egipita, a kwa gore Dafida o ithobaletše le botatagwe, le gore Joaba molaodi wa madira o hwile; a bolela le Farao a re: Mphe tsela ke boele nageng ya gešo.
22Farao a fetola a re: O hlokang fa go nna, ge o rato boela nageng ya geno?
Hadada a re: Ga ke hloke selo; fela, ntese ke sepele.
23Le le lengwe lenaba Modimo o le tsošeditše Salomo; e be e le Resone morwa wa Elyada, e a bego a tšhabile mong wa gagwe Hadada-Esere kgoši ya Tsoba. 24Yena e o be a rapile banna, a lwa le mong wa gagwe, a ba molaodi wa sera. Ke tša mehla yela ya ge Dafida a ba bolaile. Mme ba tla Damaseko ba dula ntshe, ba buša motse wa Damaseko. 25Yena e e be e le lenaba la Isiraele mehla yohle ya ge Salomo a sa phela. Gomme bošula bjo bja hlakana le bjo bo bego bo dirwa ke Hadada, a hloile Isiraele mme a buša la Edomo.
26Le Jerobeama morwa wa Nebata a emišetša kgoši letsogo. E be e le wa Efuratha wa Tsareda, mohlanka wa Salomo. Leina la mmagwe e be e le Tseruga; e be e le mohlologadi.
27Taba ye e dirilego Jerobeama lenaba la kgoši, še: Ke mola Salomo a aga sebo sa Milo, a thiba dikgetlo tša motse wa Dafida tatagwe. 28Monna e Jerobeama e be e le monna wa senatla. Kgoši Salomo a bona lesogana le e le seroto; a mmea a ba mohlapetši wa ba sepalo ba leloko la Josefa. 29Ya na ya re ka tšatši le lengwe, ge Jerobeama a tšwile motseng wa Jerusalema, a le tseleng a gahlana le moporofeta Ahia wa Silo. Ahia o be a apere kobo e mpsha; ba gahlana ba le noši nageng. 30Ahia a swara kobo e mpsha ya gagwe ye a bego a e apere, a e gagoganya ya ba diripa tše lesome le metšo e mebedi, 31a botša Jerobeama a re: Tšea diripa tše lesome; gobane Morena Modimo wa Isiraele o re: O tsebe gore Salomo ke tlo mo amoga mmušo, ka go nea meloko e lesome. 32O tlo šala le ba leloko letee ka baka la Dafida mohlanka wa ka, le ka baka la Jerusalema motse wo ke o kgethilego mo dileteng ka moka tša Isiraele. 33Ke ka gobane ba ntlhanogetše ba khunamela Asitherothe modimo wa Basidone, le Kamosi modimo wa Bamoaba, le Milikomo modimo wa Baamoni, ba lahla ditsela tša ka, ba se sa dira tše nna ke rego di lokile, ba se sa latela melao ya ka bjalo ka Dafida tatagwe. 34Fela, nka se ke ka mo amoga mmušo ka moka. Ke mmeile gore e be morena mehla yohle a sa phela, ka baka la Dafida mohlanka wa ka yo ke mo kgethilego, yo a bego a hlokomela ditaelo tša ka le melao ya ka. 35Yo ke tlogo mo amoga mmušo ke morwa wa gagwe; mme wena ke tlo go nea ba meloko e lesome. 36Morwa wa gagwe ke tlo mo nea ba leloko letee, gore lebone la Dafida mohlanka wa ka le dule le le gona pele gaka Jerusalema motseng wo ke ikgethetšego wona gore ke bee leina la ka ntshe. 37Gomme wena ke tlo go hlaola gore o buše tšohle tše o di kganyogago; mme o tlo ba kgoši ya Isiraele. 38E tlo re ge o ka theetša tšohle ke go laelago tšona, wa swara ka ditsela tša ka, wa dira tše nna ke rego di lokile, wa hlokomela melao ya ka le ditaelo tša ka, wa dira se Dafida mohlanka wa ka a bego a se dira, gona ke tlo ema le wena, ka go agela ngwako o tlogo dula o le gona wa etša wo ke o agetšego Dafida; gomme ke tlo go nea setšhaba sa Isiraele. 39Bana ba Dafida ke tlo ba kokobetša ka baka la dilo tšeo, fela, e sego ka mehla.
40Salomo o be a rata go bolaya Jerobeama; fela, Jerobeama a tsoga a tšhabela Egipita go Sisaka kgoši ya Egipita, a dula Egipita, Salomo a ba a hwa.
41Ditaba tše dingwe tša Salomo, tša tšohle tše a di dirilego, le tša bohlale bja gagwe, naa ga di a ngwalwa mo pukung ya ditaba tša Salomo? 42Lebaka le Salomo a bušitšego Isiraele ka lona a le Jerusalema, ke nywaga e masome a mane. 43Salomo o ilo ithobalela le botatagwe, a bolokwa Motseng wa Dafida tatagwe; legatong la gagwe gwa buša Rehabeama morwa wa gagwe.
