Juda go buša Abiama le Asa. Isiraele go buša Baesa
1Abiama ge a thoma go buša Juda, e be e le ka ngwaga wa lesome le metšo e seswai wa kgoši Jerobeama morwa wa Nebata. 2Abiama o feditše nywaga e meraro a buša Jerusalema; leina la mmagwe e be e le Maaka morwedi wa Abisalomo. 3O swere ka tsela ya dibe tšohle tše tatagwe a bego a di dira; pelo ya gagwe e be e sa etše ya Dafida tatagwe ka go ema le Morena ka botlalo. 4E be e le ka baka la Dafida; Morena o mmeetše lebone, Jerusalema, a thekga motlogolwana wa gagwe gore motse wa Jerusalema o tie. 5Ka gobane Dafida o be a dira tše Morena a bego a re di lokile; ka mehla ka moka ya bophelo bja gagwe a se ke a lahla le setee sa tše Morena a mo laetšego tšona, ge e se tabeng yela ya Uria Mohethe. 6Ge e le ntwa yela ya ge Rehabeama a elwa le Jerobeama, yona e be e le gona ka mehla yohle a sa phela. 7Ditaba tše dingwe tša Abiama, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda? Gomme ntwa e be e le ge Abiama a elwa le Jerobeama.
8Abiama a ithobalela le botatagwe, ba mmoloka Motseng wa Dafida; legatong la gagwe gwa buša Asa morwa wa gagwe.
9Ge Asa a thoma go buša Juda, e be e le ka ngwaga wa masome a mabedi wa Jerobeama e le kgoši ya Isiraele. 10Asa o feditše nywaga e masome a mane a motšo o tee a buša Jerusalema; leina la mmagwe e be e le Maaka morwedi wa Abisalomo. 11Asa o be a dira tše Morena a bego a re di lokile, a etša Dafida tatagwe. 12O lelekile ba dihlotlolo nageng ya gagwe, a tloša diswantšho tša medimo tše di bego di beilwe ke tatagwe. 13Ge e le mmagwe o mo amogile bohumagadi ka ge a dirile seswantšho sa Ašera. Asa o sentše seswantšho seo sa mmagwe, a se fiša molapong wa Kidirone. 14Se a sa kago a se fediša ke meboto; le ge go le bjalo pelo ya Asa e be e eme le Morena ka botlalo mehla yohle a sa phela. 15Dilo tše kgethwa, tša tatagwe le tša gagwe, o di išitše Ngwakong wa Morena; e be e le disilifera le digauta le dibjana.
16Mehleng yeo go be go na le ntwa ya ge Asa a elwa le Baese kgoši ya Isiraele, ya se ke ya kgaotša ba sa phela. 17Baesa kgoši ya Isiraele o kile a tšwa a lwa le Juda; a aga motse wa Rama gore a thibele batho ba se ke ba tšwa ba ya go Asa kgoši ya Juda. 18Ke mo Asa a tšerego disilifera ka moka le digauta tše di bego di šaletše, le tša mahumo a Ngwako wa Morena, le tša mahumo a ngwako wa kgoši, a di neela batseta ba gagwe diatleng, ba di iša go Benehadada morwa wa Tabarimoni morwa wa Hesioni kgoši ya Siria e a bego a agile Damaseko, a re: 19A re tiišeng kgwerano yela e dirilwego ke tate le tatago. Sedio, ke go romela digauta le disilifera, gore o lese go lakana le Baesa kgoši ya Isiraele, gore a nkgomele.
20Benehadada a kwa se kgoši Asa a se bolelago, a roma balaodi ba madira a gagwe ba yo lwa le metse ya Isiraele, ba hula motse wa Iyoni, le wa Dani, le wa Abele-Bethe-Maaka, ba šwahlela naga ya Kinerothe ka moka, le ya Nafutali ka moka. 21Baesa a re go di kwa, a lesa go aga Rama, a boela Thiritsa a dula ntshe.
22Kgoši Asa a napa a bitša banna ba Juda ka moka, gwa se ke gwa tlogelwa motho, ba rwala maswika a Rama, le dikota tše Baesa a bego a aga ka tšona. Kgoši Asa a aga motse wa Geba nageng ya Benyamini le motse wa Mitsipa ka tšona dikota tšeo le maswika ao.
23Ge e le ditaba tše dingwe ka moka tša Asa, tšohle tša bogale bja gagwe, le tšohle tše a di dirilego, le tša metse ye a e agilego, naa ga di a ngwalwa pukung ya ditaba tša kgale tša dikgoši tša Juda? Fela lebakeng la ge a tšofetše a na a babja ke maoto. 24Gomme Asa a ithobalela le botatagwe, a bolokwa le botatagwe motseng wa Dafida. Legatong la gagwe gwa buša Josafate morwa wa gagwe.
25Nadaba morwa wa Jerobeama o thomile go buša Isiraele ka ngwaga wa bobedi wa Asa a le kgoši ya Juda; a fetša nywaga e mebedi e le kgoši ya Isiraele; 26a dira tše di befetšego Morena, a swara ka tsela ya tatagwe ya dibe tša gagwe tše a nago a di diriša Isiraele.
27Baesa morwa wa Ahia wa leloko la Isašara a mo rera ka bohwirihwiri, a mmolaya kua Gibethoni motseng wa Bafilisita. Ke mola Nadaba le Baisiraele ka moka ba rakeletše motse wa Gibethoni. 28Baesa ge a mmolaya e be e le ka ngwaga wa boraro wa ge Asa e le kgoši ya Juda; mme Baesa a buša legatong la Nadaba. 29A re a sa tšo bewa kgoši, a bolaya ba leloko la Jerobeama ka moka, a se ke a tlogela le o tee wa gaJerobeama, a ba fediša bohle, ka mo lentšu la Morena le boletšego ka mohlanka wa gagwe Ahia wa Silo, 30ka baka la dibe tša Jerobeama tše a di dirilego, a diriša Isiraele sebe, a rumola Morena Modimo wa Isiraele.
31Ge e le ditaba tše dingwe tša Nadaba, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Isiraele? 32Ntwa yela ya ge Asa a elwa le Baesa kgoši ya Isiraele e be e le gona mehla yohle ba sa phela.
33Baesa morwa wa Ahia o thomile go buša ka ngwaga wa boraro wa Asa kgoši ya Juda. O thomile go buša Isiraele ka moka a le motseng wa Thiritsa, a fetša nywaga e masome a mabedi a metšo e mene e le kgoši. 34O dirile se se befetšego Morena, a swara ka tsela ya sebe se Jerobeama a se dirilego a ruta Baisiraele go dira sebe.
