1 DIKGOŠI 3

₁Gomme Salomo a itswalanya le Farao kgoši ya Egipita ka go tšea morwedi wa Farao, a mo tliša motseng wa Dafida; a dula moo go fihla ge Salomo a feditše go aga ngwako wa gagwe, le Ngwako wa Morena, le morako wa go agelela Jerusalema. ₂Setšhaba mehleng yeo se be se sa iša didimo mo mebotong, gobane leina la Morena le be le sešo la agelwa ngwako. ₃Salomo o be a rata Morena, a phela ka mokgwa wa Dafida tatagwe; fela, o be a sa iša didimo le diorelo kwa mebotong.

₄Kgoši e kile ya ya Gibeoni go iša didimo ntshe, ka gobane mmoto wa gona e be e le o mogolo; Salomo a hlaba dihlabelo tše sekete mo aletareng ya ntshe. ₅Bošego bjoo a le Gibeoni a bona Morena ka diloro, mme Modimo a re: Kgopela se nkago go nea.

₆Salomo a re: Dafida tate mohlanka wa gago o be o mo dira ka botho bjo bogolo, ka mo a bego a phela pele ga gago, a go botegetše, a lokile, a le pelobolo a na nago; gomme botho bjo bogolo bjoo wa nama nabjo, wa ba wa mo nea morwa wa go dula sedulong sa gagwe ka mokgwa wo wa mehla yeno. ₇Bjalo Morena Modimo wa ka, nna mohlanka wa gago o ntirile kgoši legatong la Dafida tate. Fela, ke sa le lesogana, mme ga ke ešo ka tseba go tšwa le go tsena. ₈Nna mohlanka wa gago ke mo gare ga setšhaba se segolo sa gago se o se kgethilego, se se sa balwego sa tsebja bontši bja sona. ₉Nea mohlanka wa gago pelo e kwago, gore a kgone go buša setšhaba sa gago, a hlaologanye botse le bobe; ka gobane setšhaba sa gago se sekaakaa se ka bušwa ke mang?

₁₀Gomme Morena a kgahlwa ke polelo ye, ge Salomo a kgopela sona seo. ₁₁Modimo a fetola a re: Ke fetola kgopelo ya gago, ge o sa ikgopelele go phela galelele, o sa ikgopelele mahumo, o sa ikgopelele gore manaba a gago a bolawe; wa ikgopelela bohlale gore o kgone go kwa ditaba, ₁₂bjalo šedi, ke dira se o se boletšego. Tseba gore ke go nea pelo e bohlale ya temogo, ye o tlogo phala ba kgale ka yona; mme ga go sa tlo tsoga e a swanago nago. ₁₃Gomme le tše o sa kago wa di kgopela ke tlo go nea, lehumo le bogolo. Mo go magoši ohle a mehleng ya gago go ka se ke gwa ba le e a lekanago nago. ₁₄Le gona, ge o ka swara ka ditsela tša ka, wa hlokomela melao ya ka, le ditaelo tša ka boka Dafida tatago, ka mo e bego e le mokgwa wa gagwe, gona ke tlo lelefatša bophelo bja gago.

₁₅Ke mo Salomo a phafogilego a bona e le diloro. A boela Jerusalema, a ema pele ga polokelo ya kgwerano ya Morena, a tliša dihlabelo le dileboga, gomme bahlanka ba gagwe ka moka a ba direla monyanya.

₁₆Mehleng yeo go kile gwa tla basadi ba ba babedi ba diotswa, ba bega taba. ₁₇E mongwe wa bona a re: Joo mongaka! Nna le mosadi e re dula ngwakong o tee; nna ka belega ke le nae ngwakong woo. ₁₈Ke itše go belega, ya re ka la boraro le yena a belega. Re be re dutše moo, go se motho e mongwe ka ngwakong ge e se rena ba babedi fela. ₁₉Bjalo ngwana wa mosadi e a hwa bošego ka gobane a mo gatile malaong. ₂₀A tsoga e sa le bošego, a tšea ngwana wa ka lehlakoreng la ka, nna molata wa gago ke sa ile le boroko, a mo gokarela, nna a nkgokarišitše e a hwilego. ₂₁Ka moswana ge ke phafoga, ke ge re ke amuša ngwanake, ka bona a hwile. Ge go sele ka mo lebeleša ka bona e se ngwanake yo ke mmelegego.

₂₂Mosadi ela e mongwe a re: Aowa, e a phelago ke ngwanake; wa gago ke eo a hwilego.

Yena a re: Aowa, wa gago ke yo a hwilego, wa ka ke eo a phelago.

Ba bolela ka mokgwa wo pele ga kgoši.

₂₃Kgoši ya re: Yono o re: Ngwanake ke e a phelago, gomme e a hwilego ke wa gago! Yola o re: Aowa, wa gago ke e a hwilego; nna ngwanake ke e a phelago e! ₂₄Kgoši ya re: Tlišang tšhoša! Ba tliša tšhoša gona moo pele ga kgoši. ₂₅Kgoši ya re: Ripaganyang ngwana eo a phelago, le dire diripa tše pedi; yo le mo nee mphapa; le yola le mo nee mphapa.

₂₆Ke mo mosadi eo e bego e le yena mmago ngwana e a phelago a šoketšwego ngwana wa gagwe, a re: Hle mong wa ka! Mo neele ngwana a sa phela; o se ke wa mmolaya!

Yola e mongwe a re: A se ke a ba wa ka le ge e le wa gago; a ripaganywe!

₂₇Ke mo kgoši e fetotšego ya re: Neelang yo ngwana e a phelago; le se ke la mmolaya; ke yena mmagwe.

₂₈Baisiraele ka moka ge ba ekwa tša kahlolo ye, ka mo kgoši e ripilego kgang ka gona, ba boifa kgoši ge mo go yona go le bohlale bja Modimo bja go ahlola.