1 DIKGOŠI 8

₁Bjale Salomo a botha ba bagolo ba Isiraele, le balaodi ka moka ba meloko, le bakgoma ba dilete tša Baisiraele, ba tla Jerusalema go kgoši Salomo gore ba rwale polokelo mo motseng wa Dafida wa Tsione. ₂Gomme Baisiraele ka moka ba kgobokana ba tla go kgoši Salomo ka kgwedi ya Ethanima, e lego ya go šupa. ₃Bagolo ba Isiraele ka moka ge ba fihlile, baperisita ba kuka polokelo. ₄Ba rotoga le polokelo ya Morena, le Ngwako wa Kgwerano, le dibjana ka moka tša sekgethwa tše di bego di le Ngwakong woo, tša rwalwa ke baperisita le Balefi. ₅Gomme kgoši Salomo le phuthego ka moka ya Isiraele, ye e bego e bokanetše polokelo e na nae, ba tliša didimo tša dinku le tša dikgomo tše di bego di sa balwe ka baka la bontši bja tšona. ₆Baperisita ba iša polokelo ya kgwerano ya Morena bodulong bja yona Ngwakong wa ka gare wa Ntlokgethwa, kwa sekgethwakgethweng, ba e bea ka tlase ga diphego tša Bakerubi. ₇Gobane Bakerubi ba be ba phurolotše diphego tša bona ka godimo ga bodulo bja polokelo, ba šireletša polokelo le mešikaro ya yona ba e ukametše. ₈Mešikaro e be e le e metelele, dintlha tša yona tša tšwelela tša bonala ka mo sekgethweng mo pele ga sekgethwakgethwa. E be e se go bonala wa go tšwela mono ntle. Le lehono di sa le moo. ₉Mo polokelong go be go se selo ge e se diphaphati tše pedi tšela tša maswika tše Moshe a di noketšego go yona ba le kua thabeng ya Horebe, mola Morena a dira kgwerano le Baisiraele ba sa tšo falala Egipita.

₁₀Ya re ge baperisita ba etšwa mo sekgethweng, Ngwako wa Morena wa tlala leru; ₁₁baperisita ba ba ba šitwa go ema le go dira mediro ya bona ka baka la leru, gobane Ngwako ka moka o be o tletše letago la Morena. ₁₂Salomo a bolela a re: Morena o boletše a re: o rata go dula mo swiswing. ₁₃Bjale ke go agetše Ngwako gore e be bodulo bjo o tlogo dula go bjona ka mehla le mehla.

₁₄Kgoši ya retologa ya lebana le phuthego, ya šegofatša phuthego ya Isiraele ka moka; gomme phuthego ka moka ya Isiraele e be e eme. ₁₅Kgoši ya re: A go retwe Morena Modimo wa Isiraele, ka gobane o phethile ka seatla sa gagwe tše a di boditšego Dafida tate, a re: ₁₆E sa le mola ke ntšha setšhaba sa Isiraele kwa Egipita, ga ke ešo ka kgetha motse o mongwe mo dileteng tša Isiraele ka moka gore go agelwe leina la ka Ngwako. Yo ke mo kgethilego ke Dafida gore a be kgoši ya sethšaba sa ka.

₁₇Gomme Dafida tate mo pelong ya gagwe o be a rata go aga Ngwako wa leina la Morena Modimo wa Isiraele. ₁₈Morena a bolela le yena Dafida tate a re: Ge mo pelong ya gago o rera go agela leina la ka Ngwako, o dirile gabotse. ₁₉Fela, Ngwako woo o ka se ke wa agiwa ke wena. E a tlogo o aga ke morwa wa gago yo o tlogo mo tswala. Ke yena a tlogo agela leina la ka ngwako.

₂₀Gomme lentšu leo Morena a le boletšego o bile o le phethile, gobane nna ke eme legatong la Dafida tate, ke dutše sedulong sa Isiraele ka mo Morena a boletšego, gomme ke agetše leina la Morena Modimo wa Isiraele Ngwako. ₂₁Gona mo ke dirile bodulo bja polokelo ya Morena, yeo kgwerano ye a e dirilego le botatawešo mola a ba ntšhitše Egipita a lego mo go yona.

₂₂Bjale Salomo e ema pele ga aletare, phuthego ka moka ya Isiraele e mo lebeletše, a emišetša matsogo godimo, ₂₃a re: Morena Modimo wa Isiraele! Kwa magodimong le mono faseng ga go Modimo mokawena, e o botegelago bahlanka ba gago mme wa ba dira ka botho ge ba phela ba lebane nago ka pelo ka moka. ₂₄Dafida tate mohlanka wa gago o mo diretše tše o mmoditšego tšona. O be o di boletše ka molomo; mme lehono šedi, o di phethile ka seatla sa gago. ₂₅Gomme bjale Morena Modimo wa Isiraele! Nama o dire tše o di boditšego mohlanka wa gago Dafida tate, wa re: Mo sedulong sa bogoši bja Isiraele o ka se ke wa hlokišwa monna yo ke tlogo mmona a dutše go sona, ge bana ba gago ba ka swara tsela ya bona ba phela ba lebana le nna bjalo ka wene. ₂₆Morena Modimo wa Isiraele! Lona lentšu leo o le boletšego le Dafida tate mohlanka wa gago, a e be la therešo.

₂₇Gomme go bjang bjale? Afa Modimo a ka kgona go tla a dula ruri mono lefaseng? Hleng magodimo, le magodimo a godimodimo a sa kgone go go lekana! Bjale Ngwako wo ke o agilego o tlo go lekana bjang? ₂₈Morena Modimo wa ka! Thapelo ya mohlanka wa gago e sekegele tsebe, o kwe topo ya gagwe, o kwe kgoelelo ye le thapelo ye mohlanka wa gago a e beago pele ga gago lehono. ₂₉A mahlo a gago a lebelele Ngwako wo bošego le mosegare, felo mo o go boletšego wa re: Leina la ka le tlo ba fa! Gore o kwe thapelo ye mohlanka wa gago a e beago mono mo. ₃₀O kwe ge nna mohlanka wa gago, le setšhaba se sa gago, re go llela re le felo fa; o kwe o le bodulong bja gago godimong; o kwe o ba lebalele.

₃₁E re ge motho a senyetše wa gabo, mme ba mo eniša keno a itlema, keno ya tla pele ga aletare ya gago fa Ngwakong wono, ₃₂o kwe o le godimong, o dire, o ahlolele bahlanka ba gago; yo kgopo a tšuwe, o lefetše mokgwa o mobe wa gagwe; e a lokilego a tšwe molatong, o mo nee tše di mo swanetšego ka ge a lokile.

₃₃Mohla setšhaba sa gago sa Isiraele se fenywa ke manaba ka ge se go senyeditše, e re ge ba boela go wene, ba itshola leineng la gago, mme ba lla ba rapela ba le mo Ngwakong wono, ₃₄o kwe o le godimong; setšhaba sa gago sa Isiraele o se lebalele; o se bušetše mo nageng yeno, ye o e neilego botatabo.

₃₅Mohla wo legodimo le tswaletšwe, ge pula e sa ne, ka ge ba go senyeditše, e re ge ba etla, ba rapela felo fa, ba itshola leineng la gago, ba lahla sebe sa bona, ka gobane o ba otla, ₃₆o kwe o le godimong; bahlanka ba gago, le ba setšhaba se sa gago sa Isiraele, o ba lebalele sebe se ba se dirilego, gobane o tlo ba ruta tsela e botse ye ba tlogo swara ka yona, mme o nešetše naga ye ya gago pula, naga yeno o e neetšego tšhaba se sa gago ya ba legae la bona.

₃₇Mohla go wile tlala mo nageng, goba ya welwa ke dinkhu, goba phori, goba megwelema, le ge e ka ba tšie goba mogokong, le ge manaba a ba hlohla mo nageng le dikgorong, le ge e ka ba kotlo mang le bolwetši mang, ₃₈dithapelo tšohle, le ditopo tšohle, ge di ka direlwa motho mang le mang, le ge e le setšhaba ka moka sa gago sa Isiraele, bohle ba lemoga kotlo ya dipelo tša bona, mme ba emišetša atla tša bona Ngwakong wono, ₃₉o kwe o le godimong, o le bodulong bja gago bjo bo tiilego, o ba lebalele, o dire, bohle o ba nee tše di lebanego tsela ye ba bego ba e swere; gobane o tseba dipelo tša bona; Motsebadipelotšabanababathokamoka ke wena o nnoši, ₄₀gore ba go boife ka mehla yohle ba sa phele mo nageng ye o e neilego borrawešo.

₄₁Le moeng, e sego wa setšhaba se sa gago sa Isiraele, motšwakgole a tlago ka baka la ina la gago, -- ₄₂gobane ina le legolo la gago ba tlo le kwa, le atla sa gago se maatla, le tsogo la gago le o le emišago, -- ge a ka tla a rapela a le Ngwakong wo, ₄₃o kwe o le godimong, o le bodulong bja gago bjo bo tiilego, o dire se se kgopelwago ke moeng, gore tšhaba tšohle di tsebe leina la gago, di go boife bjalo ka setšhaba se sa gago sa Isiraele, ba tsebe gore mo Ngwakong wo ke o agilego go bolwa leina la gago.

₄₄Le mohla setšhaba sa gago se tšwetše go hlabana le manaba, o ba romile mme ba wela tsela, ge ba rapela Morena ba lebile mo motseng wo o o kgethilego, ba iša difahlogo mo. Ngwakong wo ke o agetšego ina lago, ₄₅O kwe o le godimong, o kwe thapelo ya bona le topo ya bona, o dire, mme o eme nabo.

₄₆Mohla ba tlogo ba ba go senyeditše, -- ka ge go se motho e a sa kego a senya, -- mme wa be befelelwa, wa ba lahletša tlhabanong, manaba a ba thopa, ba išwa nageng ya manaba, e ka ba kgole le ge e le kgauswi, ₄₇ge ba ka itshola dipelong, ba le nageng ya bao ba ba thopilego, mme ba sokologa, ba go rapela ba re: Re dirile sebe! Re molato! Re disenyi! ₄₈Ge ba ka boela go wena ka pelo ka moka le moya ka moka, ba le gona kua nageng ya manaba a bona, ya bao ba ba thopilego, ge ba go kgopela tsela ya go ka boela mo nageng ye o e neetšego botatabo, mo motseng wono o o kgethilego, le mo Ngwakong wo ke o agetšego ina lago, ₄₉o kwe o le godimong, o le bodulong bja gago bjo bo tiilego; o kwe thapelo ya bona le topo ya bona, o ba namolele. ₅₀O lebalele tšhaba se sa gago tše ba go senyetšego ka tšona, le tša mola ba go hlanogela; o dire gore bathopi ba bona ba ba gaugele; ₅₁gobane ke tšhaba sa gago, o Mong wa bona, wa go ba nthša Egipita mollong wa tshipi.

₅₂A mahlo a gago a lebelele topo ya mohlanka wa gago, le topo ya setšhaba se sa gago sa Isiraele; o kwe tšohle tše ba go kgopelago tšona. ₅₃Gobane ke wena o ba hlaotšego, ya ba ba gago mo gara ditšhaba tšohle tša lefase, wa ba mong wa bona ka mo o boletšego ka Moshe mohlanka wa gago, mola o ntšha botatabo Egipita, Morena mong a rena.

₅₄Ya re ge Salomo a feditše go bea pele ga Morena thapelo ye le topo ye, a tsoga mo a bego a khuname ka matolo pele ga aletare ya Morena, a hunyetša matsogo a a bego a a emišitše; ₅₅a ema a hlaboša lentšu a šegofatša phuthego ka moka ya Isiraele, a re: ₅₆A go retwe Morena gobane o khutšišitše setšhaba sa gagwe sa Isiraele bjalo ka ge a boletše. Mo go mantšu a mabotse ka moka a a a boletšego ka Moshe mohlanka wa gagwe, ga go na le letee le le wetšego fase. ₅₇Morena Modimo wa rena a a eme le rena, bjalo ka ge a eme le botatawešo, a se ke a re tlogela, a se ke a re lahla! ₅₈Gore dipelo tša rena di dule di lebile yena, re sware ka tsela tša gagwe fela, re hlokomele ditaelo tša gagwe, le melao ya gagwe, le mekgwa ya gagwe, ka mo a laetšego botatawešo. ₅₉Le mantšu ao a ka, a ke kgopetšego Morena ka ona, a a dule a le kgauswi le Morena Modimo wa rena mosegare le bošego, gore nna mohlanka wa gagwe, le setšhaba se sa gagwe sa Isiraele, a re buše ka mehla le mehla; ₆₀gore ditšhaba tšohle tša lefase di tsebe gore Morena ke yena Modimo, ga go ne yo mongwe. ₆₁Gomme dipelo tša lena di eme le Morena Modimo wa rena ka botlalo, gore le sware ka tsela ya melao ya gagwe, le hlokomele ditaelo tša gagwe go etša lehono.

₆₂Bjale kgoši le Isiraele ka moka, ya ba gona ba tlišetšago Morena didimo. ₆₃Salomo a tlišetša Morena didimo tša go leboga, e lego dikgomo tše dikete tše masome a mabedi, le dinku tše dikete tše lekgolo le le nago le masome a mabedi a dikete. Ke tšona tše kgoši le Baisiraele ka moka ba di dirilego ge ba kgakola Ngwako wa Morena. ₆₄Ka lona tšatši leo kgoši ya kgetha lapa la gare la mo pele ga Ngwako wa Morena, ya ba la go dira dihlabelo, le la dibego, le la makhura a dileboga, ka gobane aletare yela ya mphiri, e bego e le pele ga Morena, e be e le e nyenyane e sa lekane dihlabelo le dibego le makhura a dileboga.

₆₅Ka lona lebaka leo Salomo a dira monyanya a na le Baisiraele ka moka, e le phuthego e kgolo; ba be ba tlile ba etšwa Hamathi, le kua nokeng ya Egipita, ba tla pele ga Morena Modimo wa rena, ba fetša matšatši a šupago, le a mangwe gape a šupago, ya ba matšatši a lesome le metšo e mene. ₆₆Ka la seswai Salomo a gomiša setšhaba; ba laelana le kgoši ka ditšhegofatšo, ba boela magaeng a bona ba thabile, ba kwile bose ka tše botse ka moka tše Morena a di diretšego Dafida mohlanka wa gagwe, le Isiraele setšhaba sa gagwe.