Re setšhaba sa Modimo, re kwe magoši le beng ba rena, re etše Kriste Mong wa rena
1Apolang bobe bjohle le maano a mabe ka moka, le bomenetša le mona, le ditshele ka moka. 2Le etše masea a sa tšogo belegwa, le llele lebese la lentšu le le sa forego, gore le gole ka lona le fihlele phološo, 3ge ka kgonthe le kwele bose bja botho bja Morena.
4Batamelang yena e lego lebje le le phelago, le batho ba le nyaditšego, mola le hlaotšwe ke Modimo, e le le bohlokwa, 5le tle le agiwe boka mabje a phelago, le be ngwako wa Moya wa boperisita bjo bokgethwa, wa go tliša didimo tša moya tše di kgahlišago Modimo ka Jesu Kriste. 6Ke tšona tše di ngwadilwego tša re: Ke nna ke beago swika la motheo mo Sione, swika le tsebjago gore le tiile, la bohlokwa; e a le botilego a ka se lewe ke dihlong. 7Bjale, lena ba le dumelago le ba mahlatse. Ge e le baganyetši, bona ba le bona e le lebje la go nyatšwa ke baagi, mme e tlile ya ba la motheo wa sekhutlo. 8Bona ba tlo le bona e le sefu, e le le ba kgopšago ke lona ge ba gana go kwa lentšu; mme ke sona se ba beetšwego sona.
9Ge e le lena le moloko wo o hlaotšwego, le boperisita bja bogoši, le setšhaba se sekgethwa, le selete se yena a lego mong wa sona, gore le tsebatše mabothakga a eo a le biditšego le le leswiswing, a le biletša seetšeng sa gagwe se se tlabago, 10lena bao kgale le bego le se setšhaba; mme bjale le setšhaba sa Modimo; ba le bego le sa gaugelwa, mme bjale le gaugetšwe.
11Barategi! Ke a le rapela, lena bafaladi le baeng; ke re le ile ditumo tša nama tše di lošago moya. 12Tsela ye le tšeago ka yona le le gare ga bantle, a e be e botse, gore ge ba le phara ba re le disenyi, e tle e re ge ba lebeleša, ba bone mediro e botse ya lena mme ba rete Modimo, e le letšatši le a ba etetšego ka lona.
13Le be ba ba bušwago ke melao yohle e bušago batho; le dire bjalo ka baka la Morena. Ge e le kgoši, le tsebe gore ke yena e mogolo; 14Ge e le ditona, le tsebe gore ke ba ba rongwago ke kgoši gore ba sole badirabobe, ba rete ba ba dirago gabotse. 15Gobane se Modimo a se ratago, ke gore ka go dira gabotse le thibe melomo ya batho ba mašilo, ba go se tsebe. 16Le ge le le bahunologi, bahunologi le se ke la bo dira seapešo sa bobe; le bonale gore le bahlanka ba Modimo. 17Godišang bohle, le rate bana beno, le boife kgoši.
18Lena bahlanka! Bušwang ke beng ba lena ka go ba boifa ruri, e sego ba bolo fela le ba boleta; le ba ba sa tsebalegego le ba dire bjalo. 19Gobane ke mahlatse, ge motho a rwešwa mahloko, ge a hlakišwa a se na molato, molato e le ge a itsebela Modimo. 20A e sa le tumo e botse ge le ka kgotlelela bothata le otlwa ge le sentše? Fela, ge le kgotlelela ditlhokofatšo le le ba go dira botse, gona e ba mahlatse pele ga Modimo. 21Ke sona se le bileditšwego sona; gobane le Kriste o tlaišitšwe ka baka la lena, a ba ketapele ya lena, gore le tšee ka mohlala wa gagwe, 22yena a sa kago a dira sebe, yo molomong wa gagwe go sa kago gwa hwetšwa bofora, 23E a sa kago a roga ge a rogwa, a se šupeletše ge a hlokofatšwa, a di gafela eo a ahlolago ka go loka, 24A ipeleša dibe tša rena, a di nametša kwateng ka mmele wa gagwe, gore re tlogelane le tšona, re phelele go loka. Ke yena yo re fodilego ka dintho tša gagwe. 25Gobane le be le le bjalo ka dinku tše di timetšego; ge e le bjale le boetše go Modiši le Mohlapetši wa meoya ya lena.
