1 SAMUELE 13

₁Saulo e be e le monna e a godilego. Ya re ge a feditše nywaga e mebedi a buša Isiraele ₂a ikgethela banna ba dikete tše tharo go Isiraele. Ba dikete tše pedi ba dula le yena Saulo motseng wa Mikimasa dithabeng tša Bethele. Ba sekete setee ba dula le Jonathane motseng wa Gibea wa Benyamini. Banna ba bangwe o be a ba gomišitše ba boela magaeng.

₃Jonathane o kile a fenya bahlometši ba Bafilisita motseng wa Gibea. Bafilisita ba di kwa. Saulo a letša phalafala mo nageng ka moka, a re le Bahebere ba di kwe. ₄Baisiraele ka moka ba kwa gore Saulo o fentše bahlometši ba Bafilisita, le gore Baisiraele ba rumotše Bafilisita; gomme setšhaba ka moka sa rapiwa sa latela Saulo sa tla Giligala.

₅Le Bafilisita ba epša gore ba yo hlabana le Baisiraele ba na le dikoloi tše dikete tše masome a mararo, le banamedi ba dipitsi ba dikete tše di selelago, le madira a mantšintši a kakago lešabašaba la lebotong la lewatle. Ba rotoga ba bokana Mikimasa ka thoko ya bohlabela go Bethe-Abena. ₆Banna ba Isiraele ge ba bona ba le tlalelong, le gobane batho ba gakanegile, ba utama mo mefomeng, le mo masoding, le mo matšibeng, le mo mabitleng, le mo meleteng. ₇Bahebere ba bangwe ba sela noka ya Jorodane, ba ya nageng ya Gada le ya Gileada.

Saulo yena o be a sa le kua Giligala; gomme setšhaba se be se mo latela se boifa. ₈Gomme o be a letela Samuele, gwa fela matšatši a a šupago a a bego a beilwe ke Samuele. Bjale ge Samuele a sa tle gona moo Giligala, batho ba phatlala ba ba tloga. ₉Saulo a ba a re: Ntlišetšeng sehlabelo sa sebego. A dira sehlabelo. ₁₀A re a sa tšo se dira, Samuele šo, o a fihla. Saulo a mo gahlanetša, a mo dumediša. ₁₁Samuele a re: O dirile bjang?

Saulo a re: Ke bone ge setšhaba se phatlalala se ntlogela; mme wena o sa tle ka lebaka le le beilwego, mola Bafilisita ba bokane Mikimasa, ₁₂ka re: Bjale Bafilisita ba tlo fologela mono Giligala ke sešo ka rapela Morena; mme ka napa ka beta pelo, ka dira sehlabelo.

₁₃Samuele a bolela le Saulo a re: O dirile tša bošilo, ge o sa ka wa dira ka taelo ye Morena Modimo wa gago a go laetšego yona; gobane Morena o be a tlo tiiša bogoši bja gago go Isiraele ka go sa felego. ₁₄Bjale bogoši bja gago bo ka se ke bja tia. Morena o inyaketše monna e a kwanago le pelo ya gagwe. Yena eo Morena o mo hlaotše gore a be ketapele ya setšhaba sa gagwe; ka gobane wena ga wa ka wa hlokomela se Morena a go laetšego sona.

₁₅Samuele a tsoga a tloga Giligala. Kua Gibea Benyamini Saulo a bala batho ba a bego a na nabo, a hwetša e le ba e ka bago ba makgolo a selelago. ₁₆Saulo a dula gona moo Gibea-Benyamini a na le Jonathane morwa wa gagwe le setšhaba se se bego se na nae. Bafilisita ba be ba sa bokane Mikimasa. ₁₇Bjale Bafilisita ba arogana dihlopha tše tharo, ba tlogela mešaša ya bona ba yo senya naga. Sehlopha se sengwe sa leba Ofura nageng ya Suali; ₁₈se sengwe sa leba Bethe-Horoni; sa boraro sa leba thoko ya Tseboima go bataganego le lešoka.

₁₉Gomme mo nageng ka moka ya Isiraele go be go sa hwetšwe morudi; gobane Bafilisita ba be ba re: Bahebere ba se ke ba itirela ditšhoša le marumo. ₂₀Mo go Baisiraele ka moka, ge motho a rata go batolelwa petlo, le ge e le mogoma, goba selepe, le ge e le letsolo, o be a swanetše go fologela go Bafilisita. ₂₁Gomme ge go kukubane mogoma, goba kepo, goba petlo, goba selepe, goba ge go otlollwa letsolo, ba be ba eya gona. ₂₂Bjale ge go tsoga ntwa ye, gwa hlokwa e a swerego tšhoša goba lerumo mo madireng a bego a na le Saulo le Jonathane; di be di swerwe ke Saulo le Jonathane morwa wa gagwe fela.

₂₃Bahlometši ba bangwe ba Bafilisita ba be ba tšwetše mo sefateng sa Mikimasa.