1 SAMUELE 24

₁Dafida a tloga moo a rotoga a yo dula maweng a Engedi. ₂Ya re ge Saulo a tšo boa a rakile Bafilisita, ba mmotša ba re: Dafida o lešokeng la Engedi. ₃Saulo a tšwa le banna ba masogana ba dikete tše tharo, ba a ba hlaotšego go Baisiraele ka moka; a ya go tsoma Dafida le banna ba gagwe gona kua mantsweng a dikome. ₄Mo tseleng a tla mo merakeng ya dinku, mo go bego go na le mphoma. Saulo a tsena mo mphomeng, a re ke ikapeše maoto; gomme Dafida le banna ba gagwe ba be ba le moseo ka mphomeng woo. ₅Banna ba bolela le Dafida ba re: O ko bone; ke lona tšatši le Morena a le boletšego mola a re: Tseba gore lenaba la gago ke tlo le neela seatleng sa gago, gore o le dire ka mo o ratago. Dafida a tsoga, a nanya, a ripa ntlha ya kobo ya Saulo. ₆Ya re ge a dirile tšeo, pelo ya gagwe ya mo opaopa, ka ge a ripile ntlha ya kobo ya Saulo. ₇Banna ba gagwe a bolela le bona a re: A Morena a nthibele, gore mong wa ka ke se mo dire tšeo, ka iša letsogo go motlotšwa wa Morena; ka gobane ke motlotšwa wa Morena a le fao. ₈Dafida a realo, a šegela banna ba gagwe, a se ke a ba dumelela go tsogela Saulo maatla. Saulo a ba a tšwa mphomeng, a swara tsela ya gagwe.

₉Dafida le yena a tšwa mo mphomeng a latela; a goeletša Saulo a re: Kgoši! Mongaka! Saulo a retologa; Dafida a inama a lotšha. ₁₀Dafida a bolela le Saulo a re: O theeletšang dipolelo tša batho ge ba re: Dafida o rato go dira bošula? ₁₁O ko lebelele, lehono o ka bona ka mahlo a gago, ge ka fa mphomeng Morena o be a go gafetše diatleng tša ka. Ba bolela ba re ke go bolaye; mme nna ka go kwela bohloko, ka re: Nka se ke ka iša atla sa ka go mong wa ka, gobane ke motlotšwa wa Morena. ₁₂O ko bone, tata! Ke swere ntlha ya kobo ya gago, še. Mola ke e ripa ga nka ka go bolaya. Tseba ge o lemoge, ge atla sa ka se se ne bobe le bonaba; ga ke ešo ka go senyetša selo, gomme wena o ntsoma go nkamoga bophelo. ₁₃Nna le wena re tlo ahlolelwa ke Morena; gomme Morena o tlo ntefeletša go wena; ge e le sa ka seatla se ka se go dire selo. ₁₄Seema sa ba bogologolo se hlaba fao ge se re: Bobe bo tšwa babeng! Ge e le nna seatla sa ka se ka se ke sa ba sa go dira selo. ₁₅Wena kgoši ya Isiraele! O hlomarela mang? O lelekiša mang? O rakediša mpša e hwilego; o tsoma letsetse letee.

₁₆Moahlodi ke Morena; o tlo re ahlolela taba ye; o a bona mme o tlo ntwela ntweng ye, a nnamolela seatleng sa gago. ₁₇Dafida ge a feditše go bolela mantšu ao, Saulo a re: A ga se wena Dafida morwa ka o bolelago? A ba a hlaboša lentšu a lla, ₁₈a fetola a re: Wena Dafida o mphala ka go loka; ka gobane o ntiretše tše dibotse, mme nna ke go direla bobe. ₁₉Tše botse tše o nthutilego ka tšona lehono, ke ge Morena a nkgafetše seatleng sa gago, mme wa se ke wa mpolaya. ₂₀Afa motho a ka re ge a hweditše lenaba la gagwe, a le lesa la tloga ka tsela e botse? A Morena a go bušetše tše botse ka baka la tše botse tše o ntiretšego tšona lehono! ₂₁Bjale ka gona ke tsebago ge kgoši ya Isiraele e tlo ba wena; gomme bogoši bja Isiraele bo tlo tia mo seatleng sa gago. ₂₂Bjale nkenele hle ka Morena, gore o ka se ke wa bolaya bana ba ka ge nna ke sepetše, le gore o ka se ke wa fediša leina la ka mo lelokong lešo. ₂₃Gomme Dafida a enela Saulo tšona tšeo.

Saulo a tsebo boela gae; Dafida a rotogela sebong a na le banna ba gagwe.