1 SAMUELE 31

₁Gomme Bafilisita ba hlabana le Baisiraele. Banna ba Isiraele ba rakwa ke Bafilisita; ba ba bolailwego ba tlala dithabeng tša Giliboa. ₂Bafilisita ba dika Saulo le barwa ba gagwe, ba bolaya Jonathane le Abinadaba le Malakisua barwa ba Saulo. ₃Tlhabano ya ba e thata mo go bego go le Saulo, a kgonwa ke banna ba go betša ka mesebe, a gobatšwa gagologolo ke babetši bao. ₄Saulo a laela morwadi wa dibetša tša gagwe a re: Swara tšhoša ya gago o ntlhabe ka yona, gore mašoboro ao a se tle a ntlhaba a ntira sekwero! Morwadi wa dibetša a gana ka go boifa. Saulo a tšea tšhoša ya gagwe a ipolaya ka go ikwetša mo go yona. ₅Morwadi wa dibetša a bona Saulo a hwile, le yena a ipolaya ka go ikwetša mo go tšhoša, a hwa nae. ₆Saulo o hwile ka mokgwa woo, le barwa ba gagwe, le morwadi wa dibetša tša gagwe, le banna ba gagwe ka moka. Ba hwile mohla woo felo gotee. ₇Banna ba Isiraele ba ba bego ba le ka thoko yeno ya molala, le ba ba bego ba le ka mošono wa noka ya Jorodane, ge ba bona gore banna ba Isiraele ba tšhabile, le gore Saulo o hwile le barwa ba gagwe, ba tlogela metse ba tšhaba; gomme gwa tla Bafilisita ba dula go yona.

₈Ka la ka moswana Bafilisita ba be ba tlile go hlakola ba ba bolailwego, ba hwetša Saulo le barwa ba gagwe ba bararo ba rapaletše dithabeng tša Giliboa; ₉ba mo kgaola hlogo, ba mo apola ditlhamo, ba di iša nageng ya Bafilisita thoko tšohle, ba iša dikati mo nywakong ya medimo ya bona le mo setšhabeng. ₁₀Ditlhamo tša gagwe ba di išitše ngwakong wa Asiterothe, setoto sa gagwe ba se fega morakong wa Bethesane.

₁₁Ba motse wa Jabese wa Gileada ba kwa tše Bafilisita ba di dirilego Saulo. ₁₂Banna ka moka ba bahlabani ba tšwa, ba lala ba sepela bošego ka moka, ba tla ba fegolla setoto sa Saulo, le ditoto tša barwa ba gagwe gona moo morakong wa Bethesane, ba di tliša motseng wa Jabese, ba di fiša ntshe. ₁₃Ba tšea mašapo a bona ba a fihla lebitleng ka tlase ga mohlopi, ba ikona ba fetša matšatši a šupago.