1 SAMUELE 5

₁Bafilisita ba napa ba tšea polokelo ya Modimo gona moo Ebenesere ba e iša Asidodo. ₂Ba e rwala ba e iša ngwakong wa modimo wa bona Dagoni, ba e bea hleng ga seswantšho sa Dagoni. ₃Ya re ge ka la ka moswana ba Asidodo ba tsogela, ba hwetša Dagoni o wetše fase o patlame pele ga polokelo ya Morena. Ba o tšea ba o butšetša felo ga wona. ₄Ge ka la moso ba tsogela, ba hwetša Dagoni o wetše fase o patlame pele ga polokelo ya Morena; gomme hlogo ya Dagoni le diatla tša wona ka dipedi di ripilwe, di le serepoding, go šetše sebolobolo sa wona fela. ₅Ka baka leo baperisita ba Dagoni, le bohle ba ba tsenago ngwakong wa Dagoni, ba sa gatego serepodi sa Dagoni gona moo Asidodo le nankhono.

₆Gomme seatla sa Morena sa na sa imela ba Asidodo, sa ba senya sa ba otla ka dišo, ba Asidodo le ba dileteng tša gona. ₇Ya re ba Asidodo ba bona go le bjalo, ba re: Polokelo ya Modimo wa Isiraele a e se ke ya dula mo go rena, ka gobane seatla sa gagwe se thatafaletše rena le Dagoni modimo wa rena. ₈Ba roma batseta ba bitša dikgošana ka moka tša Bafilisita, ba re: Polokelo ya Modimo wa Isiraele re tla e dira bjang?

Ba re: Polokelo ya Modimo wa Isiraele a e išwe Gathe. Ke moka, polokelo ya Modimo wa Isiraele ba e iša ntshe. ₉Ya re ge ba e išitše ntshe, seatla sa Morena sa tšweletša kgakanego e kgolo ka kudu mo motseng woo, sa otla batho ba gona ka dintšhu, ba banyenyane le ba bagolo. ₁₀Ba napa ba romela polokelo ya Modimo kua motseng wa Ekironi. Ya re ge a fihla Ekironi, ba Ekironi ba hlaba mokgoši ba re: Ba tlišitše polokelo ya Modimo wa Isiraele go rena, gore ba re bolaye le setšhaba sa ga bona. ₁₁Ba roma batseta ba bitša dikgošana ka moka tša Bafilisita, ba re: Polokelo ya Modimo wa Isiraele e bušetšeng ga gayo, re se tlo bolawa le setšhaba sa gaborena. Gobane motse ka moka o be o tšhogile la go hwa; gomme seatla sa Morena se be se ba imela ka maatla; ₁₂ka gobane ba ba bego ba sa hwe, ba be ba hlokofatšwa ka dintšhu, gomme sello sa motse se be se hlatlogela legodimong.