1 BATHESALONIKA 4

₁Bana bešo, re sa le eletša re kgopela ka Morena, re re: Tiišang go swara ka tsela yeo re le laeditšego yona, mme la tšea ka yona yeo ya go kgahla Modimo. ₂Gobane ditaelo tše re le filego tšona ka Morena Jesu, le a di tseba. ₃Se Modimo a se ratago ke kgethego ya lena, gore le ile bootswa. ₄Mang le mang e lego wa lena a tsebe mosadi e lego wa gagwe ka mokgwa wa kgethego le wa go mo godiša. ₅A e se be ka phišego le kganyogo boka bantle ba ba sa tsebego Modimo. ₆Mo go tše le di dirago go se ke gwa ba go jana le go forana; gobane Morena ke Molefetši wa dilo tše bjalo ka moka. Ke tše re le boditšego kwale ra tiiša go le hlatsela tšona. ₇Gobane se Modimo a re bileditšego sona ga se dišhila, ke kgethego. ₈Ke gona, monyatšamotho o nyatša Modimo, e a le neilego Moya wa gagwe wa ba mo go lena.

₉Gomme e le tša go rata bana ba bolena, ga se tše le sa swanelago go ngwalelwa, gobane leratanong le barutwa ba Modimo. ₁₀Ke tšona le di direlago ba bolena ka moka ba Matsedonia; sa rena ke go fo le eletša re re: Bana bešo! Išang pele go ya botlalong! ₁₁Le phegelele go thwe: Le ba leago, le ba go dira tše di le lebanego, le ba go dira ka diatla tša lena, ka mo re le laetšego ka gona. ₁₂Bantle ba le bone le swere tsela ka bothakga, gore le se hloke selo.

₁₃Bana bešo! Ga ke rate ge le hloka tsebo tabeng ya ba ba ithobaletšego, gore le se ke la hlokofala boka ba bangwe bao ba hlokago kholofelo. ₁₄Ge re dumela gore Kriste o hwile mme a tsoga, le ba ba ithobaletšego ka Jesu, Modimo o tlo ba iša le yena.

₁₅Fao re le botša lentšu la Morena ge re re: Rena ba re phelago ra šadišetšwa maboo a Morena, re ka se ke ra raka bao pele ba ithobaletšego. ₁₆Gobane Morena yena mong o tlo fologa legodimong ka mokgoši, ka kgowa ya Morongwamogolo, ka phalafala ya Modimo; ke mo bao ba hwetšego go Kriste ba tlogo tsoga pele. ₁₇Gwa tlo latela rena ba re šetšego re phela, ra rotošetšwa marung gammogo le bona, ra yo gahlanetša Morena sebakeng sa godimo, ya tlo ba gona go yo ba le Morena go ya go ile. ₁₈Homotšanang ka tšona ditaba tše.