1 TIMOTHEO 2

₁Keletšo ya ka še: Se segolo thata ke dithapelo le dithapelelo, go rapelela le go lebogela batho bohle. ₂Re rapelele marena le bohle ba e lego ba bagolo, gore re phele re wele dipelo re iketlile, re le ba borapedi ruri, re le batsebalegi. ₃Ke bjona bolo bjoo; ke gona go kgahla Modimo Mophološi wa rena. ₄Ke yena a ratago gore batho bohle ba phološwe ba fihlele tsebo ya therešo. ₅Gobane Modimo ke yena o tee yo; le Mmoelanyi wa go boelanya Modimo le batho ke yena o tee yo, yena motho Jesu Kriste, ₆Yena a ikgafilego a ba selefa sa go lefela bohle; ke bjona bohlatse bja go tla ka lebaka le la bjona. ₇Mme nna ke beilwe ka ba motsenedi wa bjona bohlatse bjo, ka ba Moapostola wa bjona. Mme ke bolela therešo, ga ke aketše ke le moruti wa bantle wa tumelo le therešo.

₈Bjale ke rata gore banna e be ba go rapela gohle, ba emiše diatla tše kgethwa go se bonaba le dikgang. ₉Le basadi ke rata gore ba apare gabotse, ba itlhophe la go šia tsholo le boikgantšho, ba se na maforo le dipheta le mašela a theko e thata. ₁₀A ba apare ka mo go loketšego basadi ba ba rego re ba borapedi, ba bonale ka mediro e mebotse. ₁₁Mosadi a a rutwe a ikhomoletše e le wa go ikokobetša gohle. ₁₂Mosadi ga ke mo dumelele go ruta le go laola monna; a a dule a ikhomoletše. ₁₃Gobane Adama o bopilwe pele, gwa tsebo bopša Efa. ₁₄Le gona e a forilwego ga se Adama, ke mosadi e a setšego molao a dumetše go forwa. ₁₅O tlo phološwa e le wa go belega bana, ge a dula tumelong e le wa pelokeledi.