2 KORONIKA 1

₁Salomo morwa wa Dafida a tia mmušong wa gagwe; mme Morena Modimo wa gagwe o be a na le yena, a mo dira e mogolo sa ruri.

₂Ke mo Salomo a boletšego le Baisiraele ka moka, le balaoladikete, le balaolamakgolo, le baahlodi, le babuši ka moka ba Isiraele, le bagolo ba meloko; ₃gomme yena Salomo le phuthego ka moka ba ya motseng wa Gibeoni, gobane ke mo go bego go le Ngwako wola wa kgwerano, wo Moshe a o dirilego ba sa le kua lešokeng. ₄Ge e le polokelo ya Modimo, yona Dafida o be a šetše a e tšere kua Kireathe-Jearima, a e rotošetša felo mo a bego a e lokišeditše gona, gobane o be a e diretše mokutwana motseng wa Jerusalema. ₅Aletare yela ya mphiri, ye e dirilwego ke Betsaliele morwa wa Uri morwa wa Huri, yona e be e le moo pele ga Ngwako wa Morena; bjale Salomo le phuthego ba tla gona moo. ₆Salomo a tliša dihlabelo mo alteareng ya mphiri e bego e le pele ga Ngwako wa kgwerano, a hlaba dihlabelo tše sekete mo go yona.

₇Bošego bjoo Morena a tla a bonwa ke Salomo, a mo rera a re: Kgopela se nkago go nea sona.

₈Salomo a fetola a re: Dafida tate o mo dirile ka kgaugelo e kgolo; mme nna o mpeile ka ba kgoši legatong la gagwe. ₉Bjale Morena Modimo, a go phethege se o se boditšego Dafida tate; gobane o ntirile kgoši ya setšhaba se segolo se se kakago lerole la lefase. ₁₀Bjale mphe bohlale le temogo, ke kgone go tšwa le go tsena pele ga setšhaba se; gobane ke mang a kago kgona go buša setšhaba se segolo se sa gago?

₁₁Morena a fetola a re: Ke lebanya tšona tšeo di lego pelong ya gago; gobane ga wa ka wa ikgopelela mahumo le dithoto le bogolo; ga wa ka wa ikgopelela lehu la manaba a gago, le ge e le go phela galelele, mme o ikgopelela bohlale le temogo gore o kgone go buša setšhaba sa ka, se ke go beilego go ba kgoši ya sona; ₁₂gona o šetše o neilwe bohlale le temogo; gomme le ona mahumo le dithoto le bogolo ke tlo go nea wa tlo fetiša magoši a kgale le a tlogo tla.

₁₃Gomme Salomo a tloga moo mmotong wa Gibeoni Ngwakong wa Kgwerano, a tla Jerusalema, mme a buša Isiraele. ₁₄Gomme Salomo a atiša dikoloi le banamedi, a ba le dikoloi tše sekete le makgolo a mane, le banamedi ba dikete tše lesome la metšo e mebedi; a ba bea mo metseng ya dikoloi, le Jerusalema mošate. ₁₅Kgoši ya atiša le disilifera le digauta motseng wa Jerusalema, tša etša maswika go ata; gomme dikwata tša morokwana tša etša mego e melago melaleng. ₁₆Dipitsi tša Salomo di be di etšwa Egipita; babapatši ba kgoši ba be ba di reka e le mohlape ka theko e di lebanego. ₁₇Ba tla le makoloi ba etšwa Egipita nao. Theko ya koloi e tee e be e le Sekele tše makgolo a selelago tša silifera; pitsi e be e rekwa ka Sekele tše lekgolo le masome a mahlano. Ba dira ka mokgwa o bjalo ba etšwa natšo Egipita, ba di iša go dikgoši ka moka tša Bahethe le go dikgoši tša Siria.