Rehabeama o tšea bogoši. Kamologano ya setšhaba
1Rehabeama a na a ya motseng wa Sikeme, gobane Baisiraele ka moka ba be ba tlile Sikeme go mmea kgoši. 2Jerobeama morwa wa Nebata a di kwa a le kua Egipita, mo a bego a tšhabetše ntshe mola a tšhaba kgoši Salomo; a boa a etšwa Egipita. 3Ba roma motho a mmitša Bjale Jerobeama le Baisiraele ka moka ba tla ba bolela le Rehabeama ba re: 4Tatago o be a thatafatša joko ya rena; wena bjale fokotša bohlanka bjo bothata bjo le joko ya tatago e bego e re imela; gona re tlo ba bahlanka ba gago.
5Yena a fetola a re: Yang le fetše matšatši a mararo, le kgone le boela go nna. Gomme setšhaba sa ya.
6Kgoši Rehabeama a eletšana le bagolo ba e bego e le bahlanka ba tatagwe ge a sa phela, a re: Lena le reng? Re ka fetola setšhaba se ka lentšu lefe?
7Ba bolela le yena ba re: Ge o ka dira setšhaba se ka botho, wa ba kgahliša, wa bolela le bona ka boleta, gona e tlo ba bahlanka ba gago ka mehla.
8Yena a tlogela keletšo ya bagolo, a ya a eletšana le ba bafsa ba thaka ya gagwe, ba e bego e le bahlanka ba gagwe, 9a ba botšiša a re: Lena le reng? Re ka fetola setšhaba se ka lentšu lefe, ge se boletše le nna sa re: Fokotša joko ye re bego re e rwešwa ke tatago?
10Ba bafsa ba thaka ya gagwe ba fetola ba re: Setšhaba se se boletšego le wena sa re: Tatago o be a thatafatša joko ya rena, se botše o re: Monwana wa ka o monyenyane o fetiša letheka la tate ka bokoto; 11tate o be a le rweša joko e thata, nna ke tlo napa ke e imetša; tate o be a le itia ka dikgati, nna ke tlo le itia ka ditshelane.
12Ka tšatši la boraro Jerobeama le setšhaba ka moka ba tla go Rehabeama, ka mo ba bego ba boditšwe ke kgoši ge a re: Boang ka letšatši la boraro! 13Gomme kgoši ya ba fetola ka thata; gobane kgoši Rehabeama o be a lahlile keletšo ya bagolo, 14a ya ka keletšo yela ya ba bafsa, a re: Tate o be a thatafiša joko ya lena; nna ke tlo napa ke e imetša; tate o be a le itia ka dikgati, nna ke tlo le itia ka ditshelane. 15Kgoši ya gana go kwa setšhaba; gobane phetogo ya ditaba tše e be e etšwa go Morena, gore go phethege tše Morena a bego a boletše Jerobeama morwa wa Nebata ka tšona ka Ahia wa Silo.
16Bjale ge Baisiraele ka moka ba bona kgoši e gana go ba kwa, setšhaba sa iša lentšu go kgoši sa re: Re na le taba mang le Dafida? Go morwa wa Isai ga go na kagišano. Isiraele ikele magaeng a gago. Bjale Dafida a ka no itlhapeletša ngwako wa gagwe!
Ke moka Baisiraele ba ikela magaeng a bona. 17Ge e le Baisiraele ba ba bego ba dutše metseng ya Juda, bona ba bušwa ke Rehabeama.
18Ya re ge kgoši Rehabeama a roma Hadorama molaodi wa sepalo, Baisiraele ka moka ba mo thuma ka maswika a hwa. Ke mo kgoši Rehabeama a hlaganetšego a namela koloi, a tšhabela Jerusalema. 19Ke gona moo Baisiraele ba hlanogetšego leloko la Dafida; le lehono go sa eme ka mokgwa woo.
