Jerusalema o hulwa ke Sisaka
1E itše ge mmušo wa Rehabeama o napa o thupela, ge yena a tiile maatla, a tlogela Molao wa Morena gotee le Baisiraele ka moka. 2Ke mo go tlilego Sisaka kgoši ya Egipita ka ngwaga wa bohlano wa pušo ya Rehabeama; a tla go lwa le motse wa Jerusalema; e be e le gobane ba hlanogetše Morena. 3A tla a na le dikoloi tše sekete le makgolo a mabedi, le banamedi ba dipitsi ba dikete tše masome a selelago; mašaba a bego a na le yena a etšwa Egipita e be e le a sa balwego, a Balibia, le a Basuki, le a Bakuše. 4A hula metse ya dibo nageng ya Juda, a tla motseng wa Jerusalema.
5Ke mo go tlilego Semaya moporofeta, a tla go Rehabeama le go bakgoma ba Juda ba ba bego ba phuthegetše Jerusalema ka baka la Sisaka, a ba rera a re: Morena o re: Lena le ntlogetše; mme nna ka le gafela diatleng tša Sisaka.
6Bakgoma ba Isiraele gotee le kgoši ba ikokobetša ba re: Morena o dira se se re swanetšego.
7Morena ge a bona gobane ba ikokobetša, lentšu la gagwe la tlela Semaya la re: Ba ikokobeditše; bjale nka se ke ka ba senya; ke tlo ba namolela ka pela. Gomme kgalefo ya ka e ka se ke ya wela motse wa Jerusalema ka seatla sa Sisaka. 8Fela, ba tla loba yena, gore ba hlaologanye se se lego kaone, go hlankela nna, goba go hlankela magoši a mafase.
9Gomme Sisaka kgoši ya Egipita a tla Jerusalema, a rebola mahumo a Ngwako wa Morena, le Mahumo a mošate; a tšea tšohle; a tšea le dikotse tšela tša gauta tše Salomo a di dirilego. 10Bakeng sa tšona Rehabeama o dirile dikotse tša mphiri, a di laelela bagolo ba dikala ba go leta mojako wa Ngwako wa kgoši. 11Gomme ka mehla ge kgoši e eya Ngwakong wa Morena, go be go etla dikala di di rwale, di be di di bušetše ngwakong wa dikala. 12Bjale Rehabeama ge a ikokobetša, bogale bja Morena bja mo gomela a se ke a senyegela ruri, gobane mo go Juda bothakga bo be bo sa le gona.
13Kgoši Rehabeama a boela a tielela a le Jerusalema, a buša; gobane mola a thoma go buša o be a na le nywaga e masome a mane a motšo o tee, a fetša nywaga e lesome la metšo e šupago a le kgoši Jerusalema motseng wo Morena a o kgethilego mo melokong ka moka ya Isiraele, a bea leina la gagwe ntshe. Leina la mmagwe e be e le Naama wa Moamoni. 14O dirile tše di bego di befela Morena, gobane ga a ka a nyaka Morena ka pelo e tiilego.
15Ditaba tše dingwe tša Rehabeama, tša mola a thoma a ba a goma, naa ga di a ngwalwa ditabeng tša moporofeta Semaya le go tša Ido mmoni e a ngwadilego tša meloko? Ge e le dintwa tša ge Rehabeama a elwa le Jerobeama e be e le tša ka mehla. 16Rehabeama o ithobaletše le botatagwe, a bolokwa motseng wa Dafida; legatong la gagwe gwa buša Abia morwa wa gagwe.
