2 KORONIKA 15

₁Moya wa Morena wa na wa tlela Asaria morwa wa Odede. ₂A tšwa a gahlanetša Asa a mo rera a re: Ntheetše wene Asa, le lena bohle ba Juda le ba Benyamini. Morena o ema le lena, le lena le ema le yena. Ge le mo tsoma, le tlo mmona. Ge le ka mo tlogela, le yena o tlo le tlogela. ₃Baisiraele ba feditše matšatši a mantši ba se na Modimo e wa ruri, ba se na moperisita e a ba rutago, ba se na molao. ₄Mohla ba tlalešwe, ge ba boela go Morena Modimo wa Isiraele, mme ba mo nyaka, yena ga a ka a gana go hwetšwa ke bona. ₅Mehleng yeo, e a tšwago le e a boago o hweditše go se šebešebe, go na le meferefere e mentši ya beng ba lefase le; ₆ditšhaba di be di šušulana, motse o šušula o mongwe, gobane Modimo o be a ba raranya ka ditlaletšo tše ntši. ₇Tiang maatla gee, le se rephiše matsogo; gobane le tlo bona moputso ka mediro ya lena.

₈Asa a re go kwa kgoelelo ya moporofeta Odede, a tiiša maatla a fediša makgapha mo nageng ya Juda ka moka le ya Benyamini, le metseng ka moka ye a e thopilego dithabeng tša Efuraimi; a mpšhafatša Aletare ya Morena e bego e le pele ga mathudi.

₉A botha ba Juda le ba Benyamini ka moka, le ba mathoko ba ba bego ba etšwa Efuraimi le Manase le Simeone; gobane Baisiraele ba bantši ba be ba kopana le Juda, ge ba bona Morena Modimo a na le Juda. ₁₀Ba phuthegela Jerusalema ka kgwedi ya boraro ya ngwaga wa lesome le metšo e mehlano wa pušo ya Asa. ₁₁Mohla woo ba tlišetša Morena dibego tša dithebola tše ba bego ba boile natšo; dipholo e be e le tše makgolo a šupago, dinku e be e le tše dikete tše di šupago. ₁₂Ba dira kgwerano ya go re ba tlo nyaka Morena Modimo wa botatabo ka pelo ka moka le ka moya ka moka. ₁₃Ba re, mang le mang e a sa tsomego Morena Modimo wa Isiraele, a bolawe, e ka ba e monyenyane goba e mogolo, e ka ba monna goba mosadi. ₁₄Ba enele Morena ka lentšu le legolo, ka megobo le ka dinaka le ka diphalafala. ₁₅Bajuda ka moka ba thabela keno yeo, gobane ba be ba enne ka pelo ka moka, ba mo nyaka ka go rata ga bona ka moka, ba ba ba mo hwetša; mme Morena a ba khutšiša ka thoko tše go fela.

₁₆Asa a ba a amoga Maaka mmagwe bohumagadi, ka ge a dirile seswantšho sa Ashera sa makgapha. Asa a remakanya seswantšho seo, a se pšhatlaganya, a se fiša nokeng ya Kidirone. ₁₇Meboto yona ga ya ka ya fedišwa mo go Isiraele; fela, pelo ya Asa yona e be e se na bosodi mehla yohle a sa phela. ₁₈Ka moka tše tatagwe a bego a di kgethile, le tše di kgethilwego ke yena, o di tlišitše Ngwakong wa Modimo, disilifera le digauta le dibjana. ₁₉Gwa ba gwa tla ngwaga wa masome a mararo a metšo e mehlano wa pušo ya gagwe go se na ntwa ye e lwewago.