Eliya o a tloga. Elisa o a šala
1Ya re mola Morena a šetše a re a rotošetše Eliya legodimong ka ledimo, Eliya a sepela le Elisa, ba tloga Giligala. 2Eliya a bolela le Elisa a re: A ko šale fa; nna Morena o nthomile Bethele.
Elisa a re: Ka bophelo bja Morena, le ka bophelo bja gago, nka se ke ka ba ka go tlogela. Mme ba fologela Bethele.
3Barwa ba baporofeta ba mo motseng wa Bethele ba tla go Elisa ba re: Afa o a tseba gobane lehono Morena o tlo go amoga mong wa gago a mo iša kwa godimo?
Yena a re: Le nna ke a tseba; homolang.
4Eliya a mmotša a re: Elisa, hle šala fa; nna Morena o nthomile Jeriko.
Elisa a re: Ka bophelo bja Morena, le ka bophelo bja gago, nka se ke ka ba ka go tlogela. Mme ba ya Jeriko.
5Barwa ba baporofeta ba mo motseng wa Jeriko ba tla go Elisa ba mo rera ba re: Afa o a tseba gobane le hono Morena o tlo go amoga mong wa gago a mo iša kwa godimo?
Yena a re: Le nna ke a tseba; homolang.
6Eliya a mmotša a re: Hle šala fa; nna Morena o nthomile nokeng ya Jorodane.
Elisa a fetola a re: Ka bophelo bja Morena, le ka bophelo bja gago, nka se ke ka ba ka go tlogela. Mme ba sepela mmogo. 7Gomme banna ba masome a mahlano ba barwa ba baporofeta ba ya ba ema thoko kgojana, ge babedi bao ba eme nokeng ya Jorodane. 8Bjale Eliya a tshopha kobo ya ga gwe, a itia meetse ka yona; meetse a arogana a ya thoko ye le thoko ye; mme ba sela ka babedi ka mo go omilego. 9Ya re ge ba setše, Eliya a bolela le Elisa a re: Kgopela se nkago go direla sona, ke sešo ka tlošwa go wena.
Elisa a re: A nke ke fiwe kabelo ya moya wa gago gabedi.
10Eliya a re: O kgopetše selo se sethata; fela, di tlo go tlela ge o mpona ke tlošwa go wena; di ka se ke tša go tlela ke sešo ka tloga.
11Ba re ba sa tšama ba boledišana, ba tšhoga go etla koloi ya mollo le dipitsi tša mollo; tša ba aroganya; Eliya a rotogele legodimong ka ledimo. 12Elisa ge a di bona, a hlaboša lentšu a re: Tata! Tata! Koloi ya Isiraele le banamedi ba yona! Gomme a se ke a hlwa a mmona; a swara diaparo tša gagwe a di gagoganya diripa tše pedi.
13A thwala kobo ya Eliya ye e bego e mo wetše, a goma a ema nokeng ya Jorodane. 14A swara kobo ya Eliya ye e bego e mo wetše, a itia meetse; meetse a arogana a ya thoko ye le thoko ye; mme Elisa a sela. 15Bjale barwa bala ba baporofeta ba motse wa Jeriko, ba ba bego ba le mošono, ge ba mmona ba re: Moya wa Eliya o mo go Elisa! Ba tla ba mo hlakanetša, ba lotšha ba inametše fase. 16Ba bolela le yena ba re: Taba še. Mo go rena bahlanka ba gago go na le banna ba masome a mahlano ba matla. Bona bao a ba tšwe ba yo nyaka mong wa gago. Mohlomong Moya wa Morena o mo kukile, wa mo iša thabeng e nngwe, goba moeding o mongwe.
Yena a re: Le se ke la ba roma.
17Bona ba mo phegelela, ba ba ba mo tena, mme a re: Ba romeng! Ba roma banna ba masome a mahlano; ba fetša matšatši a mararo ba mo nyaka; mme ba mo hloka. 18Ba ba ba boela go yena a sa le moo Jeriko; yena a ba rera a re: A ga nka ka le botša ka re le se ke la ya?
19Banna ba motse woo ba tla ba bolela le Elisa ba re: Felo fa go agilwego motse wo wa rena ke mo go botse. Le wena Mong wa rena o a go bona. Fela, meetse ga a loka, mme naga e senya teng.
20Yena a re: Tlišang morufsi o mofsa, le tšhele letswai go wona. Mme ba di tliša. 21Yena a ya sedibeng sa meetse, a tšhela letswai go sona, a re: Morena o re: Ke alafile meetse a; a ka se ke a hlwa a etšwa lehu le lehwafa la naga. 22Gomme gwa ba bjalo; meetse a alafega go fihla la lehono. Go diregile se Elisa a se boletšego.
23A tloga ntshe a rotogela Bethele. Ya re ge a rotoga ka tsela, a kwerwa ke bašemana ba motse, ba re: Lefatlatena, rotoga! Lefatlatena, rotoga!
24A retologela go bona; gomme ge a ba bona, a ba roga ka leina le Moreina. Gwa napa gwa tla ditawana tše pedi di etšwa lesoding, tša bolaya masome a mane a bašemana bao, le basemana ba babedi.
25Fao Elisa o tlogile a ya thabeng ya Karamele; a boa ntshe a tla motseng wa Samaria.
