2 DIKGOŠI 7

₁Elisa a re: Kwang se Morena a se bolelago. Morena o re: Ka moswana pakeno seroto sa bupi bjo bo tokilwego se tlo rekwa ka mašeleng a mabedi le seripa; diroto tše pedi tša mabele di tlo rekwa ka mašeleng a mabedi le seripa, gona mo kgorong ya Samaria.

₂Gwa fetola kala e lego yena molaki wa mošate, a bolela le monna wa Modimo a re: Nna ke re, le ge Morena a ka bula maroba legodimong, taba yeo e ka se ke ya ba ya direga!

Elisa a re: Ka mahlo a gago o tlo di bona; fela, o ka se ke wa di ja.

₃Gomme kwa ntle ga motse go be go na le banna ba bane ba lephera; bona bao ba boledišana ba re: Re reng re fela re dutše mo go fihla ge re ehwa? ₄Ge re ka re re tsena motseng, motseng go tlala; re yo hwela ntshe. Ge re ka dula mo, le gona re tlo hwa. A re yeng re yo itahlela mešašeng ya Basiria. Ge ba ka re phediša, re tlo phela; ge ba ka re bolaya, re tlo fo ikhwela. ₅Ba tsoga e sa le ka lerothwana, ba tla mešašeng ya Basiria. Ge ba fihla matsenong a mešaša ya Basiria, ba hwetša go se motho. ₆E be e le ka gobane Morena o be a kwišitše madira a Basiria modumo wa dikoloi, le kitimešito ya dipitsi, le lešata la madira a mantši; ba botšana ba re: Ka kgonthe kgoši ya Isiraele e tšwa go rapa dikgoši tša Bahethe, le dikgoši tša Baegipita, gore di re wele godimo. ₇Ya napa ya ba go nanoga; ba tšhaba e sa le ka lerothwana, ba tlogela mešaša ya bona, le dipitsi tša bona, le dipokolo tša bona, le mešaša ka moka, ba fo tšhabiša bophelo fela.

₈Banna bala ba lephera ge ba tla matsenong a mešaša, ba tsena mokutwaneng o mongwe, ba ja, ba nwa, ba tšea disilifera, le digauta, le diaparo ba ya ba di uta. Ba boela ba tsena mokutwaneng o mongwe, ba tšea tša ntshe, ba ya ba di uta. ₉Ba ba ba botšana ba re: A re se keng ra dira ka mokgwa wo. Letšatši le ke letšatši la go thaba ge re ka homola, ra letla la moswana, re tlo oba molato. A re yeng re yo botša ba mošate. ₁₀Ba tla, ba bitša bahlapetši ba kgoro ya motse, ba ba botša ba re: Re tšwa kwa mešašeng ya Basiria, ra hwetša go se motho le ge e le lentšu la motho; ra hwetša dipitsi le dipokolo di kgokilwe, mekutwana e le madulong a yona.

₁₁Bahlapetši ba kgoro ba hlaboša mantšu ba tsebiša batho taba yeo, ya ba ya fihla mošate. ₁₂Kgoši ya tsoga e le bošego, ya bolela le bahlanka ba yona ya re: A nke ke le botše se Basiria ba ratago go se dira. Ba tseba ge re wetšwe ke tlala, bjale ba tlogetše mešaša, mme ba utame nageng, ba re: E tlo re ge ba tšwile motseng ra ba swara ba sa phela, ra tsebo tsena motseng.

₁₃E mongwe wa bahlanka ba gagwe a re: A go tšewe dipitsi tše tlhano mo go tše di re šaletšego mono motseng. Hleng tše di kago di diregela ke tše di diregetšego mehlape ka moka ya Isiraele. A re romeng tšona, re kgono bona. ₁₄Ke moka ba ntšha dikoloi tše pedi le dipitsi tša tšona; kgoši ya di roma go yo latela madira a Basiria, ya re: Sepelang le yo hlola. ₁₅Bjale ge ba latela Basiria, ba ba ba fihla nokeng ya Jorodane; ba hwetša tsela ka moka e tletše diaparo le dibetša tše Basiria ba di lahlilego ba tšhaba. Bahlodi ba boa ba di anegela kgoši. ₁₆Ya ba gona batho ka moka ba tšwilego motseng, ba hula mešaša ya Basiria. Ya ba gona seroto sa bupi bjo bo tokilwego se rekilwego ka mašeleng a mabedi le seripa, diroto tše pedi tša mabele tša rekwa ka mašeleng a mabedi le seripa, ka mo Morena a boletšego.

₁₇Kgoši ya roma kala yela molaki wa mošate, a re a yo hlapetša kgorong. Gona moo kgorong batho ba mo katakela a hwa, ka mo monna wa Modimo a boletšego mohla wola ge kgoši e tlile go yena. ₁₈Gwa direga se monna wa Modimo a se boletšego a re: Ka moswana pakeno diroto tše pedi tša mabele di tlo rekwa ka mašeleng a mabedi le seripa, le seroto sa bupi bjo bo tokilwego se tlo rekwa ka mašeleng a mabedi le seripa fa kgorong ya Samaria. ₁₉Mola kala e fetola le le boletšwego ke monna wa Modimo ya re: Le ge Morena a ka bula maroba legodimong, taba yeo e ka se ke ya ba ya direga. ₂₀Elisa a re: Ka mahlo a gago o tlo di bona; fela, o ka se ke wa di ja. ₂₁Go diregile ka mokgwa woo, ka gobane batho ba mo kataketše kgorong, a hwa.