Nathane o sola Dafida. Go thopša motse wa Raba
1Morena a roma Nathane a ya go Dafida, a tla a re: Go be go na le banna ba babedi motseng o tee; e mongwe e be e le mohumi; e mongwe e be e le modiidi. 2Mohumi o be a na le dinku tše ntšintši le dikgomo. 3Modiidi yena o be a se na selo ga e se kwanyana e tee ya tshatšana, ye a bego a e rekile, a e fepa, a e godiša e le mo go yena le bana ba gagwe, ya eja bogobjana bja gagwe, ya nwa ka senwelo sa gagwe, ya robala difarong tša gagwe. A e dira bjalo ka e ke ke ngwananyana wa gagwe.
4Ka mohla o mongwe mohumi a etelwa ke moeng; a itšimeletša go ka tšea nku goba kgomo ya go hlabela moeng e le ya mohlape wa gagwe; a tšea kwanyana yeo ya modiidi a e hlabela monna eo a mo etetšego.
5Dafida a tukela monna eo bogale ka kudu; a bolela le Nathane a re: Ka bophelo bja Morena, monna eo a dirilego ka mokgwa woo o swanetše go bolawa. 6Kwanyana yeo o tlo e lefa ka kwanyana tše nne, gobane a dirile modiro woo, le ka gobane a se ne kgaugelo.
7Ke mo Nathane a boditšego Dafida a re: Monna eo ke wena! Morena Modimo wa Isiraele o re: Ke go bopile kgoši ya Isiraele. Ke go namoletše diatleng tša Saulo. 8Ke go neetše ngwako wa mong wa gago. Ke go gafetše basadi ba gagwe. Ke go file setšhaba sa Isiraele le setšhaba sa Juda. Gomme ge o ka hwetša di sešo tša go lekana, nka go okeletša ka tše dingwe gape. 9Bjale o nyaleditšeng se Morena a se boletšego, wa dira se se mmefelago? O bolaile Uria Mohethe ka lerumo; wa tšea mosadi wa gagwe a ba mosadi wa gago. Gomme Uria o mmolaile ka lerumo la Baamoni. 10Bjalo ngwako wa gago o ka se ke wa tlogwa ke lerumo neng le neng, ka ge o nnyaditše, wa tšea mosadi wa Uria Mohethe a ba mosadi wa gago. 11Morena o re: Tseba gore ke tlo go tsošetša bošula bjo bo tlogo šimologa ngwakong wa gago; ke tlo go amoga basadi ba gago o lebeletše, ka ba nea motho weno, a tlo robala nabo mosegare go sele. 12Wena wa gago modiro o o dirile kutamong; nna wa ka ke tlo o dira o bonwa ke Baisiraele ka moka mosegare wa sekgalela.
13Dafida a fetola a re: Ke senyetše Morena!
Nathane a re: Gona Morena o go lebalela sebe sa gago; o ka se ke wa hwa. 14Fela, go tlo hwa ngwana e a go belegetšwego, ka gobane o nyaditše manaba a Morena ge o dira tše bjalo.
15Ke moka Nathane a boela ngwakong wa gagwe.
Gomme Morena a otla ngwana eo wa mosadi wa Uria, yo a mmelegetšego Dafida, a babja wa go hwa. 16Dafida a rapela Modimo ka baka la lesoganyana leo, a ikona dijo; a boa, a lala a patlame fase. 17Bagolo ba mošate ba tsoga ba tla go mo tsoša fase, a gana a se ke a ja le bona. 18Gwa fela matšatši a šupago; ya ba gona ngwana a hwago. Bahlanka ba Dafida ba boifa go mmotša gobane ngwana o hwile; ba re ge ešita mola ngwana a sa phela re boletše nae, a gana go kwa se re se bolelago; bjale re ka mmotša bjang ra re ngwana o hwile? E tla ba kotsi.
19Dafida ge a bona bahlanka ba gagwe ba bolela ka sehebehebe, a lemoga gobane ngwana o hwile. A botšiša bahlanka ba gagwe a re: A ngwana o hwile?
Bona ba re: Ee, o hwile.
20Ya ba gona Dafida a tsogago fase, a hlapa, a tlola, a apara, a ya ngwakong wa Morena, a rapela. Ge a boetše ngwakong wa gagwe, a re ba mo fe dijo; gomme a ja. 21Bahlanka ba gagwe ba mmotšiša ba re: O dira bjang? Mola ngwana a sa phela, o be o ikona dijo o lla; bjale ge a hwile, wa tsoga wa ja dijo.
22Yena a re: Mola ngwana a sa phela, ke be ke ikona dijo ke lla ke re: Go tseba mang? Mohlomongwe Morena a ka nkgaugela, ngwana a phela. 23Gomme bjale ge a hwile, ke sa ikonelang dijo? A ke sa tlo kgona go mo gomiša mo a ilego? Ke nna ke tlo go ya go yena; ga se yena a kago boela go nna.
24Dafida ge a homoditše Batseba mosadi wa gagwe, a tsena go yena, a robala nae, a belega ngwana wa lesogana, a mo reela leina la Salomo. Yena eo Morena a mo rata, 25a roma Nathane moporofeta a mo reela leina la Jedidya (Moratwa wa Morena) ka baka la Morena.
26Joaba o be a sa lwa le motse wa Raba wa Baamoni, a ba amoga motse wo o nago le meetse. 27A roma batseta a tsebiša Dafida a re: Ke lwile le motse wa Raba, gomme motse o nago le meetse ke o tšere. 28Bjale rapa setšhaba se se šetšego, o rakelle motse wo, o tle o o tšee; gore o se thopše ke nna, mme gwa retwa leina la ka ka wona.
29Dafida a rapa setšhaba ka moka, a ya Raba, a lwa le wona a o tšea. 30A tšea mofapahlogo o bego o le hlogong ya modimo wa bona Milikomo; boima bja wona e be e le talente e tee ya gauta, o na le talama ya bohlokwa; yona ya apešwa Dafida hlogong. A tšea dithebola tše ntši motseng woo. 31Batho ba gona a ba khuduša a ba iša disageng, le mo dithemong tša ditshipi, le mo dikepong tša tshipi, le mo dibešong tša ditena. A dira ka mokgwa woo metseng ka moka ya Baamoni. Gomme Dafida le batho ka moka ba boela Jerusalema.
