Moeno wa Dafida. Bagale ba Dafida
1Šea mantšu a mafelelo a Dafida:
Moeno wa Dafida morwa wa Isai,
moeno wa monnamorokami,
motlotšwa wa Modimo wa Jakobo,
seretiserategi sa Isiraele.
2Moya wa Morena o bolela ka nna,
leleme la ka le ne foko lagwe.
3Modimo wa Isiraele o ntheretše,
lentswe la Isiraele o mpoditše.
Mmuši wa batho moloki,
mmuši mmoifamodimo.
4O etša seedi ka meso,
o etša tšatši ge le hlaba ka moswana go se maru,
le gadima mola pula e khudile,
bjang bja mela mo faseng.
5Ruri, o bjalo ngwako wa ka ka Modimo;
o ntlemile ka kgwerano ya ka mehla,
a e diga ka botlalo ya bolokwa.
Go phologa ga ka gohle, le lethabo lohle,
ke yena a di tšweletšago.
6Ba dihlola bohle, ke baetšameetlwa ya go lahlwa,
ka gobane e sa swarwe ka seatla;
7monna wa go e swara o kgona ka tshipi, le ka theko ya lerumo,
ya fišwa ka mollo ya fela e le gona moo felo ga yona.
8Šea maina a bagale ba Dafida: Joseba Basebethe wa Thakemoni, yena e mogolo wa bagale, o kile a retha lerumo la gagwe a bolaile ba makgolo a mararo ka lebaka letee.
9A hlatlangwe ke Eleasara morwa wa Dodo morwa wa Ahohi, e mongwe wa bagale ba bararo ba ba bego ba na le Dafida mohla ba rumola Bafilisita ba kgobokanetše go hlabana, mme banna ba Isiraele ba rotoga. 10Yena o kile a tsoga a bolaya Bafilisita, seatla sa gagwe sa ba sa lapa se kgomaretše tšhoša. Mohlang woo Morena a ba fa phenyo e kgolo; batho ba boa ba mo šetše morago ba rebola fela.
11A hlatlangwa ke Sama morwa wa Age wa Harari. Mola Bafilisita ba bokane kua Lehi, gona moo go be go na le serapa sa dihlodi. Ya re ge setšhaba se tšhaba Bafilisita, 12Sama a ema mo gare ga serapa a se amoga Bafilisita a ba bolaya; Morena a mo nea phenyo e kgolo.
13Ba bararo ba, bona diketapele tša bao ba masome a mararo, ba tlile go Dafida mola a le mphomeng wa Adulama ka lebaka la puno. Ke ge sehlopha sa Bafilisita se bokane mo moeding wa Refaima. 14Dafida o be a le sebong mohla woo; gomme mošaša wa Bafilisita o be o le mo Betlehema. 15Dafida ge a ekwa lenyora, a re: Ke mang e a kago nkgela meetse a go nwa a sediba sa kgorong ya Betlehema? 16Gomme bagale ba bararo bao ba hlaga gare ga mošaša wa Bafilisita, ba ga meetse a sediba sa mo kgorong ya Betlehema, ba bao nao ba tla go Dafida; gomme yena a gana go a nwa, a a tšhollela Morena, 17a re: Morena, anke ke se ke ka ba ka nwa meetse a kego ke madi a banna ba ba bego ba gafile bophelo bja bona. Gomme a gana go nwa.
Ke sona se se dirilwego ke ba bararo bao.
18Abisai ngwanabo Joaba morwa wa Tseruya e be e le yena molaodi wa ba bararo ba; o kile a retha lerumo la gagwe a bolaile ba makgolo a mararo, a retwa ke ba bararo bao. 19Ba bararo bao ba be ba mo reta, a ba a ba molaodi wa bona. Fela, o be a sa lekane le bona ba bararo bao ba pele.
20E mongwe e be e le Benaya morwa wa Joyada morwa wa monna wa bogale e a dirilego tše kgolo, wa motse wa Kabatsiele. Yena o kile a bolaya ditau tše pedi kua Moaba, a ba a tsena a bolaya tau e le legageng mohla go nele leswela. 21O kile a bolaya monna wa Moegipita, monna wa kokoto, e a bego a swere tšhoša. Benaya a mo thoma a swere thoka fela; a ubula tšhoša e bego e swerwe ke Moegipita yo, a mmolaya ka yona. 22Ke tšona tše di dirilwego ke Benaya morwa wa Joyada. O be a retwa ke ba bararo bala. 23O be a tumišwa go fetiša ba masome a mararo; fela, o be a sa lekane le ba bararo bala. Dafida o mo dirile molaodi wa dikala.
24Asahele ngwanabo Joaba e be e le e mongwe wa ba masome a mararo, le Elihanani morwa wa Dodo wa Betlehema. 25Le Sama wa Harodi, le Elika wa Harodi, 26le Heletse wa Phaliti, le Ira morwa wa Ikese wa Thekoa, 27le Abiesere wa Anathothe, le Mebunai wa Husathi, 28le Tsalamoni wa Ahohi, le Maharai wa Netofa, 29le Helebe morwa wa Baana wa Netofa, le Ithai morwa wa Ribai wa Gibea wa ga Benyamini, 30le Benaya wa Pirathoni, le Hidai wa dinokaneng tša Goase, 31le Abi Aliboni wa Araba, le Asimawethe wa Barahumi, 32le Eliaba wa Salaboni, le barwa ba Jaseni Jonathane, 33le Sama wa Harari, le Ahiama morwa wa Sarara wa Harari, 34le Elipelete morwa wa Ahasibai morwa wa monna wa Maakati, le Eliama morwa wa Ahitofele wa Gilo, 35le Hetsero wa Karamele, le Paarai wa Arabi, 36le Jegaele morwa wa Nathane wa Tsoba, le Bani wa Gadi, 37le Tseleke Moamoni, le Naharai wa Beerothe morwadi wa marumo a Joaba morwa wa Tseruya, 38le Ira wa Jithira, le Garebe wa Kithira, le Uria Mohethe.
Bona ba ka moka ke ba masome a mararo a metšo e šupago.
