2 TIMOTHEO 3

₁Tseba gore mehleng ya bofelo go tlo tla mabaka a mathata. ₂Batho e tlo ba ba go ithata, ba megabaru, ba lenyatšo le baikgogomoši, le ba maroga, le ba go se kwe batswadi, ba go se leboge, ba go se ile selo. ₃E tlo ba bahlalalerato, babatasekgoro, e tlo ba dihwirihwiri, le ba ba sa tsebego go itshwara, manaba a tše bolo; ₄E tlo ba baeki, baipuši, baikgantšhi, ba go ipshina ba lahlile Modimo. ₅Ge o ba bona, o tlo re ba ne borapedi; anthe maatla a bjona ga ba a dumele. Ba ba bjalo o ba gerule. ₆Go bona bao go na le ba go tsenela ba bangwe dintlong, mme ba thopa basatšana ba ba imetšwego ke dibe, ba ba gogwago ke dikganyogo tša mehutahuta. ₇Ke ba kago rutwa ka mehla mme ba se kgone go fihlela tsebo ya therešo le ka mohla o mongwe. ₈Ke tšona tše Janne le Jambore ba bego ba na natšo ge ba ngangana le Moše, ya ba go ngangana le therešo. Ke batho ba ba senyegilego kgopolo, ba go se amane le tumelo. ₉Fela, ba ka se ke ba iša felo; bošilo bja bona bo tšwela pepeneneng, bjalo ka bja bona bala.

₁₀Ge e le wena o lotile thuto ya ka wa e latela, wa etša mokgwa wa ka le phegelelo ya ka, le tumelo ya ka, le go se fele pelo ga ka, le lerato, le kgotlelelo. ₁₁Wa etša nna ka go hlomarelwa le go tlaišwa ka tše di etšago tšela tša go ntiregela Antiokia, le Ikonio le Lisitara. Ke kgotleletše ditlhomarelo tše bjalo, mme Morena o nnamoletše gohle. ₁₂Ke tše di tlogo diregela bohle ba ba ratago go phela ka borapedi ka Kriste Jesu; le bona ba tlo hlomarelwa. ₁₃Batho ba babe le baaroši, bobe bja bona bo tlo fela bo gola bo eya, ba fora ba bangwe, le bona ba forwa. ₁₄Ge e le wena o tiele mo go tše o di rutilwego wa di dumela, o tseba ba o ithutilego go bona. ₁₅Gobane Mangwalo a Makgethwa o a tseba go tloga bjaneng. Ke ona a kgonago go go hlalefišetša phologo ka tumelo, o dumetše Jesu Kriste. ₁₆Gobane Mangwalo ka moka ke mahebetšwake Modimo, le gona a hola batho ka go ruta, le ka go kgodiša le go sokolla, le ka go iša tokong, ₁₇gore motho wa Modimo e be yo bolokatlalo, a kgonišwe go dira mediro e botse ka moka.