DITIRO TŠA BAAPOSTOLA 13

₁Phuthegong ya Antiokia go be go na le baporofeta le baruti, boBaranaba, le Simone e a bego a bitšwa ka la Nigere, le Lutsio wa Kirene, le Manahene e a godilego e le mogwera wa kgoši Herode, le Saulo. ₂Ya re ba bokanetše merapelo ba ikonne dijo, Moyamokgethwa wa re: Ntlhaoleleng Baranaba le Saulo, ba ye modirong wo ke ba bileditšego wona.

₃Ke moka ba ikona, ba rapela, ba ba bea diatla, ba ba fa tsela.

₄Bona bjalo ba romilwe ke Moyamokgethwa ba fologela motseng wa Seloikia, ba tloga moo ba selela sehlakehlakeng sa Tsipero. ₅Ge ba tsene motseng wa Salami, ba ruta lentšu la Modimo diphuthegong tša Bajuda. Ke ge Johane a na le bona, e le mohlanka wa bona.

₆Ba putla sehlakehlake seo, ba fihla motseng wa Phafo; moo ba hwetša motho wa sedupe wa moporofeta wa maaka wa Mojuda leina la gagwe ke Barajesu. ₇O be a dutše le mokgoma wa gona, Seregio Paulo monna wa tlhaologanyo. Yena e a bitša Baranaba le Saulo, ba tla; a re le yena a kwe lentšu la Modimo. ₈Ke mo ba tsogetšwego ke motho eo wa sedupe, yo leina la gagwe le lengwe e lego Elima; a leka go thibela mokgoma gore a se dumele. ₉Saulo, e lego yena Paulo, a mo hlaba ka mahlo a tletše Moya o mokgethwa, ₁₀A re: Wena Morwa wa Diabolo towe! O hoše bomenetšamoka le bohlola bjohle! O lenaba la bolo ka moka; o hlwa o raranya ditsela tše di lokilego tša Morena. ₁₁Bjale tseba! Letsogo la Morena le go wela godimo, wa tlo ba sefofu, wa tlo fetša lebaka o sa bone letšatši.

Paulo a sa realo, motho eo a welwa ke bofofu le lewiswi, a dikologa a nyaka ba ba kago mo hlahla ka seatla. ₁₂Mokgoma ge a bona dilo di eya ka tsela yeo, a dumela, a tlabilwe ke thuto ya Morena.

₁₃Ba ba bego ba na le Paulo ba tloga moo motseng wa Phafo, ba namela leselawatle, ba tla motseng wa Perege wa nageng ya Pamfilia. Gona moo Johane a kgaogana le bona a boela Jerusalema. ₁₄Bona ba tloga Perege, ba tla Antiokia wa nageng ya Pisidia. Ka tšatši la Sabatha ba ya phuthegong ya Bajuda, ba dula. ₁₅Ge go badilwe Molao le Baporofeta, ba bagolo ba phuthego ba roma motho, a tla a ba botšiša a re: Banna ba gešo! Ge le na le lentšu la go kgothatša batho, gona bolelang. ₁₆Paulo a ema, a emiša seatla, a re:

Banna ba Isiraele, le lena le boifago Modimo, kwang. ₁₇Modimo wa setšhaba se o kgethile botatawešo, a tla a godiša setšhaba mola se falaletše nageng ya Egipita; a ba a se ntšha moo a emišitše letsogo. ₁₈A fetša nywaga e masome a mane a ba rwele a ba fepa lešokeng. ₁₉A fediša ditšhaba tše di šupilego nageng ya Kanana, a ba abela naga yeo ya ba ya bona.

₂₀Mabakeng a a tlilego a ba nea Baahlodi; gwa feta nywaga e makgolo a mane a nago le masome a mahlano, gwa tsebo tsoga Samuele moporofeta. ₂₁Ya ba gona ba kgopetšego kgoši. Modimo a ba nea Saulo morwa wa Kisi, monna wa moloko wa Benyamini; gwa feta nywaga e masome a mane. ₂₂A re go mo tloša, a tsoša Dafida, a ba kgoši ya bona; a mmolela a re: Ke hweditše Dafida morwa wa Isai monna wa go kgahla pelo ya ka; ke yena a tlogo dira tše ke di ratago ka moka. ₂₃Mo molokong woo ke mo Modimo a dirilego se a se boletšego pele, a tšweletša Jesu Mophološi wa Isiraele. ₂₄Ke yena yo Johane a mo etilegopele, a goelela kolobetšo ya go sokologa setšhabeng ka moka sa Isiraele. ₂₅Johane ge a phetha tsela ya gagwe, a bolela a re: Yo le ntshemago la re ke nna yena, ga se nna. Fela, tsebang! O etla, yena eo ke sa swanelago go hunolla dieta naong tša gagwe.

₂₆Banna ba gešo! Lena bana ba moloko wa Aborahama, le ba le nago nabo e le ba ba boifago Modimo! Lentšu la phološo ye le rometšwe bolena. ₂₇Gobane ba ba agilego Jerusalema, le bagolo ba bona, ka go se mo tsebe ba phethile mantšu a baporofeta a a felago a balwa ka disabatha; ba a phethile ka go mo tšwa. ₂₈Ba kgopetše Pilato ba re a bolawe, le ge ba sa ka ba hwetša molato go yena wo o swanetšego polao. ₂₉Ba phetha tšohle tše di ngwadilwego di era yena; ya ba gona ba mo fegolotšego kwateng, ba mmea lebitleng. ₃₀Gomme Modimo a mo tsoša bahung. ₃₁Ba ba bego ba na nae ba etšwa Galilea ba tla nae Jerusalema, ba mmone ka matšatši a mantši. Ke bona ba e lego dihlatse tša gagwe pele ga batho. ₃₂Gomme rena re le begela Ebangedi ya kholofedišo ye botatawešo ba bego ba e filwe, ₃₃Modimo a tla a e phetha mo go rena bana ba bona ka go tsoša Jesu bahung, bjalo ka ge go ngwadilwe Pesalomeng ya bobedi gwa thwe: O Morwa wa ka, lehono ke go tswetše. ₃₄Go mo tsoša bahung, a se bone go bola, ke tše a bego a era tšona ge a re: Ke tlo le fa tše kgethwa tše di botegago tša Dafida. ₃₅Mo gongwe a tla a re: O ka se ke wa lesa Mokgethwa wa gago a bona go bola. ₃₆Ge e le Dafida, ge a diretše thato ya Modimo mehleng ya gagwe, o ithobaletše, a bolokwa le botatagwe, o bone go bola. ₃₇E a sa kago a bona go bola ke yo Modimo a mo tsošitšego. ₃₈Bjale tsebang gee, lena banna ba gešo: Le begelwa tebalelo ya dibe e lego gona ka yena, le go lebalelwa gohle mo le šitilwego go hunologa ka molao wa Moshe. ₃₉Ka yena e go hunologa mang le mang e a dumelago. ₄₀Phakgamang ge, gore le se ke la welwa ke se se boletšwego ke baporofeta; šedi: ₄₁Lebelešang lena banyatši; le tlo kgotsa wa go tšhoga; gobane mehleng yeno ke dira modiro wo le ka se kego la dumela ge le ka fo botšwa.

₄₂Ya re ge Bajuda ba etšwa phuthegong, bantle ba tla ba ba kgopela ba re ba botšwe ditaba tšeo ka letšatši le lengwe le le hlatlamago Sabatha. ₄₃Phuthego ge e phatlalala, ba bantši ba Bajuda le basokologi ba borapedi ba latela Paulo le Baranaba. Bona ba ba kgothatša ba re ba gomarele kgaugelo ya Modimo.

₄₄Ka Sabatha ya ka moso gwa nyako bokana motse ka moka, ba tlile go kwa lentšu la Modimo. ₄₅Bajuda ge ba bona mašaba a batho, ba ba tlalelwa mona, ba ganetša, tše di bolelwago ke Paulo, ba ganetša ba rogaka. ₄₆Paulo le Baranaba ba bolela ba sa šie, ba re: Go be go swanetše ge lentšu la Modimo le botšwa lena pele. Bjale gomme ge le phema, la itira ba go se lokele bophelo bjo bo sa felego, gona tsebang: Re ya go bantle. ₄₇Ke tšona tše Morena a re laetšego tšona ge a re: Ke go bea seetša sa ditšhaba, gore o be phološo pheletšong tša lefase.

₄₈Bantle ba di kwa ba thaba; ba tumiša lentšu la Morena; gwa dumela bohle ba ba hlaoletšwego bophelo bjo bo sa felego.

₄₉Gomme lentšu la Morena la enela naga yeo ka moka. ₅₀Bajuda bona ba hlohleletša basadi ba bagolo, ba e bego e le ba borapedi, le beng ba motse; ba tsošetša Paulo le Baranaba go hlomarwa, mme ba ba raka ba ba ntšha mellwaneng ya bona. ₅₁Paulo le Baranaba ba ba hlohlorela lerole le naong tša bona, ba ya motseng wa Ikonio. ₅₂Barutiwa bona ba tlala lethabo le Moyamokgethwa.