Leeto la bobedi la Paulo Teroa. Filipi
1A fihla motseng wa Derebe, le motseng wa Lisitara. Moo a hwetša morutiwa e mongwe; leina la gagwe ke Timotheo, ngwana wa mosadi wa Mojuda wa modumedi, tatagwe e le Mogerika. 2Yena Timotheo a hlatselwa ke bana babo ba tumelo ba Lisitara le ba Ikonio. 3Paulo a rata ge a ka sepela le yena; a mo tšea a mmolotša ka baka la Bajuda ba dileteng tšeo; gobane ka moka ba be ba tseba ge tatagwe e le Mogerika. 4Ge ba sepela le metse yeo, ba fihliša ditaelo tšela tše di beilwego ke baapostola le ba bagolo ba Jerusalema. 5Diphuthego tša tiišwa tumelong, badumedi ba fela ba ata ka mehla.
6Ge ba putla naga ya Firigia le ya Galatia, Moya o mokgethwa wa ba iletša go bolela lentšu moo nageng ya Asiana. 7Ba fihla nageng ya Misia, ba leka go tsena nageng ya Bithinia; mme moya wa se ba dumelele. 8Misia ba feta ka thoko, ba fologela Teroa. 9Paulo a bona pono bošego; a bona monna wa Matsedonia a eme a mo rapela a re: Selela Matsedonia o re hlakodiše! 10A re go bona pono yeo, ra napa ra nyaka tša go selela Matsedonia, re kgodilwe gore re biditšwe ke Morena gore re yo ba botša Ebangedi.
11Ra tloga Teroa ka leselawatle ra leba sehlakehlake sa Samotratse; ka la ka moswana ra fihla motseng wa Neapoli. 12Ra fetela Filipi, e lego wona motse o mogolo wa bona beng ba naga. Motseng woo ra dula ra fetša matšatši. 13Ka la Sabatha ra tšwela nokeng ka ntle ga motse, felo mo ba bego ba lemetše go rapela gona; ra dula ra bolela le basadi ba ba bego ba phuthegela gona. 14Mosadi e mongwe yo leina la gagwe e lego Lidia, morekiši wa purapura, wa motse wa Tiatira, motho wa borapedi, le yena a theetša. Morena a bula pelo ya gagwe, mme a kwa tše Paulo a di bolelago. 15A ba a kolobetšwa le ba lapeng la gagwe. Ge a kolobeditšwe a re kgopela a re: Ge le kgodilwe gore ke dumetše Morena, gona tlang lapeng la ka le dule gona. A ba a re otelela.
16Ka tšatši le lengwe ge re ya thapelong, ra gahlana le mosetsana e mongwe e a nago le moya wa bonoge, e a bego a ruiša beng ba gagwe gagolo ka go noga. 17Yena eo a re šala nthago re na le Paulo, a goa a re: Batho ba ke bahlanka ba Modimo yo godimodimo; ke bona ba le tsebišago tsela ya phološo. 18A dira ka mokgwa woo matšatši a mantši. Paulo a kwa bohloko, a retologa, a bolela le moya woo, a re: Ke go laela ka leina la Jesu Kriste ke re: Tšwaa go motho e! Moya woo wa tloga ka lona lebaka leo.
19Bjale beng ba gagwe ge ba bona go tlogile se ba bego ba holofetše go huma ka sona, ba swara Paulo le Silase, ba ba gogela kgorong, ba ba iša go ba bagolo. 20Ba ba bega go matona, ba re: Batho ba ba ferekanya motse wa gešo; ke Bajuda. 21Ba ruta batho mekgwa e sa re swanelago ge re ka e amogela ra ya ka yona, gobane re Baroma. 22Le lešaba la ba tsošetša lešata; ditona tša ba garola diaparo, tša re ba itiwe ka dikgati. 23Ba ba itia, ba ba ntšha megogoma e mentši, ba ba kgoromeletša kgolegong. Ba laela mohlapetši wa kgolego ba re a ba hlapetše ruri. 24Yena, ge a lailwe ka mokgwa woo, a ba iša kgolegong ya ka gare, a pataganya maoto a bona ka kwata.
25E le mašegogare Paulo le Silase ba rapela, ba opelela Modimo difela; bagolegwa ba theetša. 26Ba tšhoga go kwala tšhišinyego e kgolo ya lefase, gwa ba gwa tekema le metheo ya ngwako wa kgolego; mejako ka moka ya napa ya bulega; ditlemo ka moka tša lokologa. 27Mohlapetši wa kgolego a phafoga borokong, a bona mejako ka moka e bulegile. A khwamola tšhoša a rata go ipolaya ka ge a re bagolegwa ba tšhabile. 28Paulo a mo goelela ka lentšu le legolo a re: O se ke wa itira bošula; re gona ka moka.
29Monna eo a re ba tliše dipone, a tla ka go kganyela, a wela fase naong tša Paulo le Silase a swerwe ke go roromela. 30A ba ntšhetša ntle, a re: Marena! E ka kgona ke dire bjang gore ke phološwe?
31Bona ba re: Dumela Morena Jesu Kriste; ke mo o tlo phološwa le ba ntlo ya gago. 32Ba mmotša lentšu la Modimo a ne ba ntlo ya gagwe. 33Yena a tloga nabo ka lona lebaka leo la bošego, a ba hlatswa megogoma mme a kolobetšwa le bohle ba lapeng la gabo e sa le lebaka leo. 34A ba iša ngwakong wa gagwe, a ba dudiša a ba tlišetša dijo a hlaletše ka gobane a dumetše Modimo le bohle ba lapeng la gabo.
35Ge go sele, matona a roma bahlanka, ba tla ba re: Lokolla batho bao.
36Mohlapetši wa kgolego a botša Paulo mantšu ao, a re: Matona a romile lentšu a re: Le lokollwe. Bjale le ka tšwa la ikela le iketlile.
37Paulo a fetola a re: Ba re otlile setšhaba se lebeletše, re sešo ra sekišwa, mola re le Baroma; ba re lahlela kgolegong. Bjale, a ba ka fo re ntšha go sa tsebe motho? Aowa ge! A ba tle ka noši ba re ntšhe.
38Bahlanka ba ya ba tsebiša matona taba yeo; ditona tša tšhoga ge ba ekwa gore ke Baroma. 39Ba tla ba rapela, ba ba ntšha; ba ba kgopela ba re ba tloge motseng woo. 40Ge ba tšwele kgolegong, ba ya ga Lidia, ba bona bana babo ba tumelo; ba ba homotša, ba tsebo tloga.
