Paulo o tla Korinthe le Efeso. Tša Apollo
1Ka moso Paulo a tloga Athene a ya Korinthe. 2Motseng woo a hwetša Mojuda yo leina la gagwe e lego Akwila, e a tswaletšwego nageng ya Ponto, a sa tšo boa Italia, a na le Perisila mosadi wa gagwe. Ka gobane Kesara Kelaudio o be a ntšhitše molao wa go re Bajuda ka moka ba tloge Roma. 3Ke bona Paulo a tlilego go bona, a dula ga gabo a ba diriša; ka gobane e be le balogi ba magogwa; mme Paulo modiro woo o be a o kgona. 4Ka disabatha o be a ruta diphuthegong, a kgodiša Bajuda le Bagerika.
5Ge Silase le Timotheo ba fihla ba etšwa Matsedonia, ke ge Paulo a fišegetšwe go hlatsela Bajuda a re Jesu ke yena Kriste. 6Bajuda ba ganyetša, ba rogaka. Paulo a ba a hlohlora diaparo tša gagwe, a bolela a re: Madi a lena a a boele dihlogong tša lena; nna ke tloga ke se na molato. Ke ya go bantle. 7A tloga fao a yo dula ngwakong wa monna e mongwe leina la gagwe e lego Justo, e a boifago Modimo, eo ngwako wa gagwe o bataganego le wa phuthego ya Bajuda. 8Krispo mogolo wa phuthego yeo a dumela Morena, le ba lapa la gabo ka moka. Bakorinthe ba bantši ba ba kwelego lentšu ba dumela ba kolobetšwa.
9Morena a bolela le Paulo ponong a re: Se boife; o fele o bolela; o se homole, 10gobane ke na le wena. Ga go e a kago go iša letsogo a go dira bošula; gobane ke na le lešaba le lentši motseng wo. 11Paulo a fela a sa dula gona a fetša ngwaga le dikgwedi tše di selelago; a ruta lentšu la Modimo a le moo gare ga bona.
12Mehleng yeo go buša Gallio nageng ya Akaya, Bajuda ba tsogela Paulo maatla; ba lakana ba mo iša kgorong. 13Ba tla ba re: Monna e o ruta go direla Modimo ka mokgwa o ganwago ke molao.
14Paulo a sa re ke a bolela, Gallio a fetola a re: Lena Bajuda, ge e ka be e le bošaedi le ge e le bohwirihwiri bjo bobe, gona nka be ke le emela ka molao. 15Fela, ka ge e le phapang ya dithuto, le ya maina, le ya molao wa lena, go tlo bona lena. Nna ga ke rate go ba moahlodi wa ditaba tšeo. 16A ba raka mo kgorong. 17Ke mo Bagerika ka moka ba swerego Sostene mogolo wa phuthego ya Bajuda ba mo itia gona moo kgorong; Gallio a se ba iletše.
18Paulo ge a feditše lebaka leo a dutše moo, a laelana le bana babo ba tumelo, a leba go selela Siria, a tloga a na le Perisila le Akwila. Ba le motseng wa Kenkerea a ikota hlogo, gobane o be a itlemile ka keno. 19A fihla Efeso. Moo a šadiša boAkwila. Yena a ya phuthegong a bolela le Bajuda. 20Ba mo kgopela ba re a dule le bona lebakanyana; yena a se dumele. 21A laelana le bona a re: Ka monyanya o tlago nka se kgone go hlokega kua Jerusalema. Ge Modimo a rata, ke tlo buša ke etla go lena. A tloga moo Efeso ka leselawatle.
22Ge a fihlile Kesarea, a rotogela Jerusalema, a dumediša phuthego; a tsebo fologela Antiokia. 23Ge go fetile lebaka a le moo, a tšwa a phatša naga ya Galatia le ya Firigia, a tšama a tiiša barutiwa bohle.
24Motseng wa Efeso gwa tla monna e mongwe wa Mojuda. Leina la gagwe e be e le Apollo, e a tswaletšwego Alesandria. E be e le monna wa seboledi, yo maatla mangwalong. 25O be a rutilwe thuto ya Morena a ruta batho ditaba tša Jesu ka go fišega pelong le ka tlhaologanyo. Gomme o be a tseba kolobetšo ya Johane fela. 26A tla phuthegong a thoma go ruta ka mafolofolo. Akwila le Perisila ge ba mo kwa, ba mmiletša gagabo, ba mo hlathollela thuto ya Modimo gabotse. 27Mohla Apollo a rego ke fetela Akaya, bana babo ba tumelo ba mo tutuetša, ba ngwalela barutiwa ba gona, ba ba kgopela gore ba mo amogele. Apollo a fihla gona kua, mme ba ba dumetšego a ba tšweletša pele gagolo ka neo ya gagwe. 28A phegelela go kgodiša Bajuda ka go šupetša ka mangwalo gore Jesu ke yena Kriste.
