Paulo o laelana le diphuthego
1Lešata leo ge le homotše, Paulo a bitša barutiwa, a laelana le bona, a tšwa a ya Matsedonia. 2A sepela le dinaga tšeo a tšama a kgothatša ba gona, a ba a ya nageng ya Bagerika. 3A fetša dikgwedi tše tharo a le moo. Ya re a sa re ke namela leselawatle la go ya Siria, a sebelwa gore Bajuda ba mo laletše; a boa ka tsela ya Matsedonia. 4A felegetšwa ke Sopatere wa Berea; ba Thesalonika e be e le Aristareko le Sekundo; le Gajo wa Derebe le Timotheo, ba Asiana e be e le Tigiko le Torofimo. 5Bona ba re eta pele ba ya go re letela Teroa. 6Rena, ge go fetile matšatši a magobe a sa omelwago, ra tsoga Filipi, ra namela leselawatle ra sepela matšatši a mahlano ra fihla Teroa; ra ba hwetša, ra dula moo matšatši a šupago.
7Ka letšatši la pele la go hlatlama Sabatha barutiwa ba phuthegela go ngwatha magobe. Paulo a bolela le bona a rata go tloga ka la ka moswana. Ya ba bošegogare a sa bolela. 8Ba be ba beile mabone a mantši moo ngwakong wa ka godimo wo ba bego ba phuthegetše go wona. 9Lesogana le lengwe, leina la gagwe ke Oitiko, o be a dutše ka lešobaneng, a swarwa ke boroko bjo bogolo, Paulo a sa fela a ile le polelo. Oitiko ka go fenywa ke boroko, a kodumela fase a le moo ngwakong wa godimodimo, a rwalwa a hwile. 10Paulo a tla a khunama a mo obamela a mo gokarela, a re: Le se ke la ferekana; bophelo bja gagwe bo sa le mo go yena. 11A boela ngwakong, a ngwatha bogobe a ya; gwa ba gwa sa a sa bolela le bona. Ya ba gona a welago tsela. 12Lesogana lela ba tloga nalo le phedile; ya ba go homotšwa gagolo.
13Ge e le rena, re be re etile pele, ra namela leselawatle, ra tloga ka lona ra ya Aso, mo re bego re tlo gahlana le Paulo; gobane o be a laetše bjalo; yena a rata go sepela ka maoto. 14Ge a nametše le rena moo motseng wa Aso, ra ya Mitilene. 15Ka la ka moswana ra tloga moo a leba Gio, ra feta ra leba Samo; ka la ka moswana ra tla ra khutša Terogilio, ra tsena Mileto ka le le hlatlamago. 16Gobane Paulo o be a rata go feta motse wa Efeso ka thoko, gore a se diege moo nageng ya Asiana gobane o be a re re hlaganele gore ka Pentekoste a be a flhlile Jerusalema, ge go kgonega.
17Moo motseng wa Mileto a roma motho a ya Efeso, a yo bitša bagolo ba phuthego. 18Ba tla go yena, a bolela nabo a re: Tše ke di dirilego lebaka ka moka ke na le lena go tloga letšatšing la pele ke sa tšo fihla Asiana, le a di tseba. 19Le tseba ka mo ke bego ke direla Morena ka go kokobetšwa gohle le ka megokgo e mentši, le ka meleko e bego e nkwela ka go lalelwa ke Bajuda. 20Le tseba ka mo ke sa kago ka le tima tše di kago le thuša, ka le anegela ka le ruta phuthegong le malapeng. 21Ya ba go hlatsela Bajuda le Bagerika gore ba boele go Modimo, ba dumele Morena wa rena Jesu Kriste. 22Gomme bonang! Bjale ke ya Jerusalema ke tlemilwe moyeng; mme ga ke tsebe se se tlogo ntiregela gona. 23Se ke se tsebago ke gore metseng yohle Moyamokgethwa o bee bohlatse bja go re se se ntetešego ke ditlemo le mahloko. 24Fela, tše bjalo ga ke re selo ka tšona; bophelo bja ka ke a bo nyatša, gore ke yo fetša mosepelo wa ka le modiro wo ke o gafetšwego ke Morena Jesu gore ke tiiše bohlatse bja Ebangedi ya kgaugelo ya Modimo.
25Bjale šedi! Nna ke tseba gore sefahlogo sa ka le ka se hlwe le se bona, lena ka moka ba ke bego ke tšama ke kwatša tša mmušo wa Modimo gare ga lena. 26Ke gona ke le hlatselago lehono ke re: Motho ge a timela, ga se molato wa ka. 27Gobane ga ka le tima selo; ke le boditše tšohle tše Modimo a di ratago. 28Itoteng gee; le lotole le mohlape ka moka wo Moya o Mokgethwa o le gafetšego wona, la ba badiši ba wona, gore le diše phuthego ya Modimo, ye a inyaketšego yona ka madi a gagwe yena mong. 29Gobane nna ke tseba gore mohla ke sepetše, le tlo tlelwa ke diphiri tše di jago batho, tše di sa šetšego mohlape. 30Le mo go lena beng go tlo tsoga banna, ba ba tlogo bolela ditaba tše šele, gore ba goge barutiwa ba tloge le bona. 31Phakgamang gee, le dule le sa lebale ge ke feditše nywaga e meraro, ke sa khutše mosegare le bošego ke le eletša bohle ka megokgo.
32Gomme bjale, bana bešo, ke le gafela diatleng tša Modimo le thutong ya kgaugelo ya yena eo a nago le maatla a go le agiša le go le nea kabelo le ba ba kgethegilego bohle. 33Ga go motho yo ke mo lopilego gauta le ge e le silifera le ge e le kobo. 34Tše ke phetšego ka tšona le bao ba ke bego ke na nabo, le tseba gore ke di diretše ka matsogo aka a. 35Dilong ka moka ke le bontšhitše mokgwa wa go re motho a itapiše, gore a hwetše sa go hlatlola bafokodi, go se lebalwe mantšu a Morena Jesu a a boletšego a re: Lešego la monei le phala la monewa.
36Ge a feditše go bolela ditaba tše, a khunama a rapela le bona ka moka. 37Gwa tsoga sello mo go bona bohle; ba ba ba gokarela Paulo ba mo atla. 38Lentšu le le ba hlokofaditšego gagolo ke ge a re: Le ka se ke la hlwa le bona sefahlogo sa ka. Ba mo felegetša ba mo fihliša leselawatleng.
