DITIRO TŠA BAAPOSTOLA 6

₁Mehleng yeo ya ge barutiwa ba ata, gwa tsoga dipelaelo mo go Bagerika, ba tsota Bahebere ba re: Bahlologadi ba rena ba a tingwa, ge go ntšhiwa dikabelo tša matšatši. ₂Ba lesome la metšo e mebedi ba botha lešaba la barutiwa, ba bolela ba re: Ga go a loka ge re tlogela lentšu la Modimo, ra ba ba go abela batho dijo. ₃Ke gona, bana bešo, hlaolang banna ba ba šupago, ba ba tsebjago gore ba lokile; ba ba tletšego Moyamokgethwa le bohlale, ba re kago ba gafela modiro woo. ₄Ge e le rena re tlo fela re tiišetša thapelong le modirong wa thuto.

₅Taba ye ya kgahla pitšo ka moka: Ba hlaola Stefano monna e a tletšego tumelo le Moyamokgethwa, le Filipi, le Prokoro, le Nikanoro, le Timone, le Paramena, le Nikolao mosokologi wa Antiokia. ₆Ba ba emiša pele ga baapostola; mme bona ba ba rapelela ba ba bea diatla.

₇Gomme lentšu la Modimo la enela, palo ya barutiwa ya ba e kgolokgolo motseng wa Jerusalema. Le lešaba le lentši la baperisita la bušwa ke tumelo.

₈Stefano yena, ka go tlala tumelo le maatla, a dira mehlolo e megolo le dika tša bohlatse mo setšhabeng. ₉Gwa tsoga ba bangwe ba thuto ya Balibertini, le ya Bakirene, le ya ba Alesandria, le ya ba Tsilitsia le Asiana, ba tla ba fetolana le Stefano. ₁₀Ba šitwa go fenya bohlale bja gagwe le moya wo a bego a bolela ka wona. ₁₁Ba ya ba hlohleletša banna ba bangwe ba ba rego: Re mo kwele ge a bolela mantšu a go goboša Moshe le Modimo. ₁₂Ba ferekanya setšhaba le ba bagolo le bamangwalo, ba mo wela godimo ba mo goga, ba mo iša lekgotleng. ₁₃Ba tšweletša dihlatse tša maaka, tša re: Motho e ga a kgaotše go bolela mantšu a go goboša Ngwako o mokgethwa le Molao. ₁₄Rena re mo kwele ge a re: Jesu wa Natsaretha o tlo phušola felo fa, a šatoša melao ye re e neilwego ke Moshe. ₁₅Bohle ba lekgotleng ge ba mo hlaba ka mahlo, ba bona sefahloga sa gagwe se swana le sefahlogo sa morongwa.